Jafnræðisregla?

á hún ekki að gilda sem víðast í viðskiptum?

Ég átti tal við fornvin minn Bjarna Kristinsson á Brautarhóli í Reykholti í Biskupstungum. Hann rekur þar verzlun fyrir almenning í uppsveitunum.

Hann sagði mér sögu af frönskum ferðamönnum sem hefðu fyllt stórt ker af íslenzkum góðostum til að taka með sér. En hjá mér sem aðeins þekkti þrjár ostategundir í uppvexti mínum, mýglon, kjúku og mysuost, er framförin í íslenskri ostagerð lyginni líkust. Ef franskir kaupa okkar osta þá er eitthvað við þá.

En svo spurðu ferðamennirnir Bjarna: Hvar er rauðvínið sem við þurfum með þessu?

Bjarni sagðist hafa orðið að segja þeim að þeir þyrftu að keyra út á Flúðir til að komast í ríkið.

Af hverju er bara áfengisútsala þar við hliðina á gamla kaupfélaginu en engin fyrir okkur vestan Hvítár? Er þetta jafnræðisreglan í framkvæmd spurði Bjarni?

Undir þetta má taka með Bjarna. Þarna í Reykholti í Bjarnabúð  er útbú Landsbankans sem ég veit ekki hversu nauðsynlegt er á seinni tímum rafrænna bankaviðskipta. Ég held að rauðvínssala væri nær lagi í húsnæðinu og myndi þjóna eigendum Landsbankans þarna í kring mun betur.

En sjálfsagt má ekki minnast á jafnræðisregluna  eða þjónustu við almenning þegar kaupfélagavaldið gamla er annars vegar.

Athugasemdir

[Vagn (IP-tala skráð) 7.9.2019 kl. 16:59]

Það þarf fjörugt ímyndunarafl eða mikla vanþekkingu til að tengja jafnræðisregluna skorti á vínbúð í göngufæri.

Jafnræðisreglan: Allir skulu vera jafnir fyrir lögum og njóta mannréttinda án tillits til kynferðis, trúarbragða, skoðana, þjóðernisuppruna, kynþáttar, litarháttar, efnahags, ætternis og stöðu að öðru leyti.    Konur og karlar skulu njóta jafns réttar í hvívetna.

[Predikarinn - Cacoethes scribendi , 7.9.2019 kl. 20:00]

Vagn.....kaupmenn eru ekki jafnir fyrir lögum hvað varðar hvað þeir mega selja úr hillum sínum.

[Vagn (IP-tala skráð) 8.9.2019 kl. 03:33]

Kaupmenn eru ekki jafnir hvað varðar hvað þeir mega selja úr hillum sínum. En vegna þess að það er ekki mismunun vegna trúarbragða, kyns, þjóðernisuppruna o.s.frv. þá er það ekki brot á jafnræðisreglunni. Mismunun vegna þess að sumir kaupmenn uppfylla ekki skilyrði fyrir heimild til verslunar með einhvern varning er ekki neitt brot. Palli pulsusali fær ekki að selja víagra nema fá fyrst lyfsöluleyfi. Bjarnabúð selur ekki vín án vínveitingaleyfis. Og vegna þess að þetta gildir jafnt um þá alla, óháð trú, kyni og húðlit o.s.frv., þá eru þeir jafnir fyrir lögum þó þeir séu ekki jafnir innbyrðis.

[Halldór Jónsson, 8.9.2019 kl. 09:46]

Það lék nú stundum orð á því að útsölustaðir ATVR væru valdir eitthvað með tilliti til nágrennis við rétta pólitík