Athyglisvert um Fréttablaðið

eru eftirtaldar upplýsingar í ritinu Mannlíf sem kemur inn um lúguna með Fréttablaðinu sem auglýsir sig sem víðlesnasta blað landsins og kom í dag 4. október 2019.

Þar stendur svo:

 

"Illa gengur að auka lesturinn

Samkvæmt skráningu á vef Fjölmiðlanefndar er Torg ehf. í eigu 365 miðla ehf. og HFB-77 ehf. Félögin eiga helming hvort um sig.Félög í eigu Ingibjargar Pálmadóttur eiga 99% í 365 miðlum en HFB-77 er dótturfélag Varðbergs ehf.,sem er alfarið í eigu Helga Magnússonar.

Tilkynnt var um kaup Helga á 50 % hlut í Torgi í júní sl.og tók hann þá sæti í stjórn.Helgi hefur fjárfest í ýmsum fyrirtækjum og er stjórnarformaður Bláa lónsins.Ingibjörg er stjórnarformaður Torgs og Jóhanna Helga Viðarsdóttir framkvæmdastjóri.

Ritstjórar Fréttablaðsins eru Davíð Stefánsson, sem var ráðinn inn í maí sl.,og Ólöf Skaftadóttir.Blaðið er gefið út sex sinnum í viku og dreift í 80 þúsund eintökum. Torg rekur einnig tímaritið Glamour og vefina frettabladid.is, markadurinn .is og glamour.is. Lestur á blaðinu hefur dalað nokkuð síðustu ár en samkvæmt Gallup stóð hann 52% í janúar 2015 en mælist nú 37.9%. Þá hefur blaðið misst enn fleiri lesendur í aldurshópnum 18-49 ára. Í janúar 2015 lásu  48.8% einstaklinga undir fimmtugu blaðið en 28 % lesa það í dag."

Bendir þetta til þess að meiri hluti 80.000 eintaka Fréttablaðsins fari beinustu leið í ruslið?

40.000 eintök myndu líklega nægja ef burðarásar þjóðfélagsins, þessi 28  % einstaklinga undir fimmtugu, sem eru væntanlega þeir sem standa undir mestu neyslunni í þjóðfélaginu fengju blaðið til sín?

Afgangurinn sé þá bara árás á regnskógana og framleiðsla á gróðurhúsalofttegundum?

Nú er blaðið greinilega ekki pólitískt hlutlaust heldur hallt undir Evrópusambandið og sjónarmið góða fólksins. Það er með sömu slagsíðu og RÚV og þess vegna held ég ekkert upp á það og sakna þess ekki þegar það berst ekki í lúguna mína. 

Mér finnst, af því að ég er auðvitað íhaldsblók sem les Moggann, Fréttablaðið hreinlega lítt spennandi blað þó að ég fletti því áður en ég fleygi því með öðru rusli.

 

Ég les leiðara Harðar Ægissonar þá sjaldan sem hann skrifar, sleppi yfirleitt öðrum leiðurum. Ég les Þorvald Gylfason oftast á fimmtudögum til að ergja mig á endurteknum lygum hans um þjóðaratkvæðagreiðsluna um stjórnarskrárskrípið hans. En stundum skrifar hann þó um athyglisverðar staðreyndir í hagfræði og er þá skemmtilegur enda fróður maður og víðlesinn.

En þar með er lesefnið í blaðinu upptalið hjá mér. Maður sér auglýsingarnar stundum með öðru auganu en ekki hef ég tölu á því hverju ég tek eftir.

Mannlíf er gefið útaf Birtingi. Hann hefur tapað hundruðum milljóna og aðstoðarmaður dómsmálaráðherra, Hreinn Loftsson hæstaréttarlögmaður losaði sig út úr félaginu í fyrra þar sem hann getur ekki stjórnað félagi sem er á leið í gjaldþrot.

En nú er betri tíð í vændum því Lilja Alfreðsdóttir ætlar að fara að veita ríkisfé í svona útgáfur vítt og breitt til að bjarga þeim. Sámur fóstri þarf samt ekki á slíkri aðstoð að halda og mun ekki sækja um, www.samurfostri.is

 

Þar með er þetta víðlesnasta Fréttablað landsins, það eina sem þó skilar hagnaði, en líklega það skuldugasta um leið, afgreitt hjá mér, hvað sem væntanlegum ríkisstyrkjum líður.

 

Athugasemdir

[Þorsteinn Siglaugsson, 4.10.2019 kl. 15:33]

Lestur dagblaða fer dvínandi. Sjálfur kemst ég ekki í gang á morgnana nema renna yfir Moggann og Fréttablaðið og vikan er ómöguleg ef Spectator kemur ekki inn um lúguna. En mig grunar að í þessu tilheyri ég deyjandi tegund.

[Jón Valur Jensson, 5.10.2019 kl. 02:18]

Já, rekur þú eða átt þú, Halldór, þetta myndarlega landsbyggðarblað, Sám fóstra, sem kemur út í 37.000 eintökum og "er dreift í hvert hús frá Reykjanestá austur um og allt til Fjallabyggðar"?

• Til hamingju þá með það!

• og þitt vil ég gengi að vaxi,

• en falsandi Fréttablað

• sem fyrst láti´af sínu baksi!