Engin ástæða til að örvænta?

Oftar en ekki er ég sammála Herði Ægissyni þegar hann skrifar um málefni líðandi stundar í Fréttablaðið, sem líklega hefur takmarkaðri lestur utan auglýsinga  hjá þegnum landsins samkvæmt Gallup könnunum, heldur en það lætur í veðri vaka.

Ég velti fyrir mér skilgreiningu hans á síðustu aðgerð Trumps varðandi flugbannið. Hann byrjar svona:

„Þegar hvatvís bjáni, sem var kominn út í horn heima fyrir vegna aðgerðaleysis við útbreiðslu kórónaveirunnar, stýrir voldugasta ríki heims – sem er hættuleg uppskrift – þá var kannski við því að búast að niðurstaðan yrði þessi. Ákvörðun Bandaríkjaforseta um að setja á flugbann við ferðum frá Evrópu til Bandaríkjanna í þrjátíu daga hittir ekkert ríki jafn illa fyrir og Ísland.

Áhrifin á ferðaþjónustuna, einkum Icelandair, og um leið efnahagslífið eiga eftir að verða gríðarleg.

Viðskiptamódel Icelandair byggist á því að ferja flugfarþega milli meginlands Evrópu og Bandaríkjanna og flugáætlun félagsins mun því riðlast umtalsvert. Það vinnur með Icelandair við þessar aðstæður að félagið er með nokkuð sterkan efnahagsreikning og lausafjárstöðu. Það mun samt duga skammt ef eftirspurn og bókanir halda áfram að vera hverfandi.

Líklega er aðeins tímaspursmál hvenær stjórnvöld þurfa að taka afstöðu til þess hvernig, frekar en hvort, eigi að koma flugfélaginu til aðstoðar í þessum þrengingum. Útilokað er að spá fyrir um hversu lengi þetta efnahagsástand mun vara.“

 

Hverjir eru hvatvísir bjánar í viðskiptum og hverjir ekki? Voru Björgólfarnir ekki einmitt slíkir menn þegar þeir fóru með Sanitas til Rússlands og stofnjuði BRAVO? Ekki þóttu öllum þeir vera raunsæir.Eða Össur, Samherjafrændur og svo framvegis? Stofnendur Loftleiða?

Hörður heldur áfram:

 „Eftir að hafa að mestu kosið að halda sig til hlés framan af hafa ríkisstjórnin og Seðlabankinn stigið fram og brugðist við með því að kynna margvíslegar aðgerðir. Það er vel og viðbúið að skýrari og umfangsmeiri aðgerðir muni líta dagsins ljóst á næstunni. Tíminn vinnur ekki með okkur.

Stór hluti ferðaþjónustufyrirtækja, í atvinnugrein sem er sérstaklega mannaflsfrek, mun ekki eiga fyrir launum um mánaðamót. Fjöldagjaldþrot blasa við og þúsundir manns eiga eftir að bætast við á atvinnuleysisskrá. Án mótvægisaðgerða verður atvinnuleysi farið að nálgast tíu prósent innan fárra mánaða.

Samkvæmt Lífskjarasamningnum taka samningsbundnar launahækkanir gildi eftir rúmlega tvær vikur. Aðilar vinnumarkaðarins hljóta að endurskoða tímasetningu þeirra við þessar aðstæður.

Hvað þarf að gera?

Mikilvægast er að fjármálastofnanir hafi burði til að hjálpa lífvænlegum fyrirtækjum í tímabundnum lausafjárvanda. Þar er aðkoma ríkisins með einum eða öðrum hætti óhjákvæmileg. Kreddur eiga að víkja fyrir köldu hagsmunamati. Stjórnvöld þurfa umsvifalaust að draga úr kostnaði bankanna við að binda eigið fé á móti útlánum þeirra fyrirtækja sem verður veitt aðstoð á erfiðum tímum. Afnema á sveiflujöfnunarauka sem leggst ofan á eiginfjárkröfur bankanna ekki síðar en strax. Skattar og opinberar álögur, sem hafa hækkað stjórnlaust síðustu ár, eiga að lækka. „

 

Eru þær fjárhæðir sem við blasa í samdrætti heimsviðskiptanna ekki mögulega af þeirri stærðargráðu að ekki verður við ráðið haldi veiran áfram langdreginni göngu sinni? Verður lokaorrustan ekki að fara fram sem fyrst til að herirnir geti farið að sækja fram  aftur? Eru þetta tímar stofnunar þjóðasjóðs. Tímar almennra launahækkana og friðlýsinga virkjunarkosta?

Greininni lýkur Hörður svo:

„Fyrirséð er að ríkissjóður verður rekinn með umtalsverðum halla á yfirstandandi ári. Það skiptir ekki máli. Það er erfitt að fegra stöðuna eins og sakir standa. Hún er grafalvarleg. Aðgerðir stjórnvalda eiga að taka mið af því að efnahagsáhrifanna af kórónaveirufaraldrinum gæti allt þetta ár. Ólíkt fjármálahruninu mun almenningur hins vegar ekki finna fyrir þessu með sama hætti.

Þrátt fyrir gengisveikingu, sem er hjálpleg við þessar aðstæður, þarf ekki að óttast aukna verðbólgu og kaupmáttur launafólks mun ekki dragast mikið saman. Þar skiptir sköpum að við höfum búið vel í haginn.

Það er kreppa í vændum en með réttum og skjótum ákvörðunum, sem grundvallast á heildstæðri áætlun, eru allar forsendur fyrir því að hún verði skammvinn og viðspyrnan kröftug. Engin ástæða er til að örvænta.“

Spurningin er hvort okkur tekst að finna einhverja leið út úr þessu? Hvernig verður Ísland í September ef hér ríkja atvinnuleysi, fjármálakreppa, heilsuleysi, fólksfækkun eftir mikið mannfall? Hvað með verðtryggingu lána almennings? Á að endurtaka leikinn frá hruninu þegar eignir almennings voru gerðar upptækar? 

 

Er ályktun Harðar rétt eða röng ?

Er engin ástæða til að örvænta? 

Athugasemdir

[GÍSLI HOLGERSSON - ICELAND (IP-tala skráð) 13.3.2020 kl. 13:15]

"HVATVÍSIR BJÁNAR" FLÖGRA UM NORÐURHÖFIN OG TALA NIÐUR TIL USA, LANDSINS OG LEIÐTOGANS, DONALDS J.TRUMP, SEM RÉTT HEFUR HAG AMERIKU OG STUTT AMERISKA BORGARA MEIR EN SJÁLFTÖKULIÐ DEMOKRATA Í HVÍTA HÚSINU TIL ÁRATUGA. USA HEFUR BLÓMSTRAÐ Í TÍÐ TRUMPS OG ENN STERKARA VERÐUR AMERIKA EFTIR NÆSTU KOSNINGAR VARÐANDI GETULAUSA ANDSTÆÐINGA DEMOKRATA. BREYTIÐ TALI OG YFIRLÝSINGUM YKKAR Á LEIÐTOGANUM DONALD J.TRUMP. SÝNIÐ EKKI "MINNIMÁTTARKEND" YKKAR Í SJÓNVARPI OG ÚTVARPI GAGNVART LEIÐTOGANUM.

AMERIKA MUN BJARGA OKKUR ENN OG AFTUR OG FLUGINU LÍKA. SEMJIÐ VIÐ TRUMP OG FÉLAGA UM ALLA ÓMENGAÐA FRAMLEIÐSLU ÍSLENDINGA. GERIÐ SAMNINGANA Á KEFLAVÍKURFLUGVELLI OG FÁIÐ KARLINN "LEIÐTOGANN" TIL AÐ ENDURNÝJA FLUGBRAUTIRNAR, SEM KOSTAR EKKERT FYRIR ÍSLENDINGA?.