Bravó Bjarni

hvernig þú tekur á máli afturhaldspostulans og staðreyndafalsarans Þorvaldar Gylfasonar. Manni sem er gersamlega fyrirmunað að fara rétt með nokkurn hlut í stjórnmálum vegna pólitísks ofstækis og samviskuleysis gagnvart réttum málum:

Pistill Bjarna í heild sinni:

„Það er sennilega til vitnis um það að allt er að komast í sitt fyrra horf, þegar atvinnumál hagfræðings og fyrrverandi stjórnmálaforingja verða að stórfrétt. Ætli maður eigi ekki bara að vera þakklátur fyrir það.

Á Norðurlöndunum er gefið út rit um efnahagsmál sem kallast Nordic Economic Policy Review. Fjármálaráðuneyti norrænu ríkjanna fjármagna ritið, sem er gefið út undir hatti norrænu ráðherranefndarinnar. Þetta er ekki óháð fræðirit, heldur er því ætlað að styðja við stefnumótun norrænu ríkjanna í efnahagsmálum.

Nú eru sagðar fréttir af því að Þorvaldur Gylfason hafi ekki fengið að vera ritstjóri þessa blaðs. Ástæðan sé sú að starfsmaður íslenska fjármálaráðuneytisins hafi vakið athygli á þátttöku hans í pólitísku starfi og ráðuneytið hafi komið í veg fyrir að hann fengi vinnuna. Þetta eru megindrættirnir í fréttaflutningnum, sem hefur verið hlaðinn rangfærslum og starfsmaðurinn nafngreindur og settur í forgrunn á mjög ósmekklegan hátt vegna ákvörðunar sem var ekki á nokkurn hátt hans. Af þessu tilefni minni ég á að starfsmenn ráðuneyta starfa í umboði og á ábyrgð ráðherra. Þótt ekki séu öll samskipti borin undir mig ber ég á þeim ábyrgð og í þessu tilviki endurspeglast vilji minn um að tilnefna hvorki né samþykkja Þorvald Gylfason til þessara starfa. Reyndar hafði mér aldrei dottið í hug sá möguleiki og enginn nefnt hann við mig.

En þá að kjarna málsins, tilnefningu og ráðningu ritstjóra. Um hana er fjallað í starfshópi sérfræðinga í fjármálaráðuneytum Norðurlandanna. Starfið er ekki auglýst, heldur fer fram umræða í hópnum um þá einstaklinga sem hvert ráðuneyti leggur til. Engar sérstakar hæfniskröfur eru gerðar aðrar en þær að viðkomandi njóti trausts allra sem að valinu koma. Fulltrúi fjármála- og efnahagsráðuneytisins lagði fyrir mína hönd til konu sem hefur mikla reynslu af störfum, rannsóknum og skrifum á þessu fræðasviði. Til vara voru tvö önnur. Hvorugt þeirra var Þorvaldur Gylfason.

Að þessu sögðu vil ég leggja áherslu á að ákvörðun um ráðningu er tekin samhljóða, krafist er samsinnis allra fyrir ráðningu. Ekkert slíkt samþykki lá fyrir þann 1. nóvember sl., þegar Þorvaldi á að hafa verið boðin vinnan, sem var áður en nafn hans hafði nokkurn tímann verið nefnt við fulltrúa fjármálaráðuneytisins. Reyndar er það svo að þegar ég heyrði af þeirri uppástungu var ég afar skýr um að hann kæmi ekki til greina, enda tel ég að sýn og áherslur Þorvaldar Gylfasonar í efnahagsmálum geti engan veginn stutt við stefnumótun ráðuneytis sem ég stýri.

Það er meira en sjálfsagt að mæta fyrir þingnefnd og rekja þessi sjónarmið nánar. Þá gefst mögulega tækifæri til að fara nánar ofan í saumana á því hvers vegna ég tel Þorvald Gylfason tæplega eiga samleið með mínu ráðuneyti í þessu verkefni eða yfirhöfuð um önnur stefnumarkandi mál. Það verður þá í fyrsta sinn sem ég ræði um mögulegt samstarf við Þorvald Gylfason en ekki þarf að leggjast í mikla rannsóknarvinnu til að finna út hvaða hug Þorvaldur hefur borið til þeirra ríkisstjórna sem ég hef setið í undanfarin ár. Ef þörf krefur skal farið betur yfir það fyrir þingnefnd.

Ég mun þá einnig kalla eftir því hvernig fulltrúi Samfylkingarinnar telur það óeðlileg afskipti af ráðningu ritstjóra Nordic Economic Policy Review að fjármálaráðuneytið samþykki ekki umyrðalaust hugmyndina um Þorvald Gylfason. Ekki að ég efist um að hæfnisnefnd Samfylkingarinnar hafi borið Þorvald saman við aðra tilnefnda, en dugar það eitt og sér? Og hvers eiga aðrir þeir sem óformleg tillaga var gerð um að gjalda?

Þegar til kastanna kom var Ísland ekki eina ríkið sem ekki féllst á tillögu um ráðningu Þorvaldar Gylfasonar, eins og starfsmenn norrænu ráðherranefndarinnar hafa upplýst Þorvald um. En telji hann sig eiga eitthvað inni vegna óuppfylltra væntinga þarf hann að reka þau mál við þann sem sendi honum þetta meinta atvinnutilboð, – í fullkomnu heimildar- og umboðsleysi. Mögulega mun hann njóta fulltingis einhverra þingmanna Samfylkingar, jafnvel Pírata, á þeirri leið. Spurning er bara hvort það væru ekki óeðlileg afskipti af þeirra hálfu af ráðningu í starf sem aldrei hefur verið auglýst.“

Þetta var snöfurlega að verki staðið. Bjarni er ekki eins og Dagur B. Eggertssona sem alltaf flýr í skjól nafnlausra undirmanna til að firra sig ábyrgð.

Pereat Þorvaldur!

Bravó fyrir Bjarna!

Athugasemdir

[Jósef Smári Ásmundsson (IP-tala skráð) 11.6.2020 kl. 16:31]

Mér er nú nokkuð sama um Þorvald Gylfason, finnst hann leiðinlegur. En er ritsjóri þessa tímarits aðeins sitjandi út þetta kjörtímabil ? Hvað ef það tekur við vinstri stjórn eftir næstu kosningar þarf þá ekki ritsjóri sem er hægra megin í pólitíkinni að víkja og annar í stíl við Þorvald að taka við?

[Helga Kristjánsdóttir, 11.6.2020 kl. 23:58]

Dagur fær glósurnar hvern einasta dag og eru oft ekkert annað en smekkur fólks um hús og tré; Til hvers eru undirmenn ef ekki að svara asnalegum spurningum. 

[GÍSLI HOLGERSSON - ICELAND (IP-tala skráð) 12.6.2020 kl. 10:14]

Það er GOTT hjá BJARNA að taka ÁKVARÐANIR. Sammála.

[Húsari. (IP-tala skráð) 12.6.2020 kl. 14:47]

Sæll Halldór.

Fátt hefur glatt mig heitar og
innilegar þessa síðusta daga
en að Þorvaldur Gylfason skyldi
ekki ráðinn ritstjóri að tilteknum
snepli.

Allt er það eigingirni mín og sjálfselska
en Þorvaldur er sá allra síðasti sem ég vil
missa úr þjóðmálaumræðunni því fám mönnum
sem ég hef fylgst með í gegnum tíðina veit
ég búa yfir jafn gneistandi atorku og baráttuvilja, -
nema ef vera skyldi helstu andstæðinga hans í stjórnmálum, -
þar sem málin snéru á haus!

[GÍSLI HOLGERSSON - ICELAND (IP-tala skráð) 12.6.2020 kl. 23:20]

Vonandi verður "kona" ekki ráðin í stað Þorvaldar?. Þá getur Þorvaldur Gylfason farið í Evrópumál og rukkað miljónir fyrir að vera "maður"?.