Evruspekingarnir gleymnu

fara mikinn í þjóðlífinu. Fyrrum formaður Sjálfstæðisflokksins og varaformaður vilja ólm kála fullveldi Íslands, ganga í ESB og taka upp Evru. 

Þetta fólk fylkir sér undir einhverju merki sem kallast Já Ísland,-.

Gunnar Heiðarsson gerir þessu fólki góð skil á blogg síðu sinni:

"Til er hópur fólks hér á landi sem kallar sig "já Ísland". Réttnefni þessa hóps ætti auðvitað að vera "nei Ísland", þar sem markmið þessa hóps er að koma Íslandi undir erlend yfirráð og skerða þannig sjálfsstæðið, eða "deila því" eins og talsmenn hópsins hafa stundum nefnt.

Ljóst er að þessi hópur ætlar sér stóra hluti í næstu kosningum. Beitt er öllum tiltækum ráðum, aflóga stjórnmálamenn og fyrrverandi ráðherrar eru dregnir upp á dekk og látnir skrif margar greinar í fréttamiðil hópsins, Fréttablaðið. Stjórnmálaflokkur hópsins, Viðreisn, lætur sitt ekki eftir liggja í umræðunni, en allir vita tilurð þess stjórnmálaflokks.

Efnisleg rök hópsins eru enn jafn ódýr og áður og jafn fá. Þar er einkum rætt um evruaðild. Notað er tækifærið þegar yfir heiminn gengur óværa sem lamað hefur allt athafnalíf, með tilheyrandi vandræðum fyrir flestar þjóðir. Þessu hefur fylgt að krónan okkar hefur lækkað nokkuð í verðgildi miðað við evruna, en þó ekki meira en svo að kannski megi tala um leiðréttingu.

Síðast þegar þessi hópur lét til sín taka hafði annað áfall gengið yfir heimsbyggðina. Ísland fór verr út úr því áfalli en margar aðrar þjóðir, enda hafði bönkunum verið komið í hendur glæpamanna, sem svifust einskis. Það hafði verið gert í krafti EES samningsins, sem Alþingi samþykkti með minnsta mögulega meirihluta án aðkomu þjóðarinnar.

Þessi hópur þagnaði þó fljótt þegar hagur landsins okkar fór snarlega að vænkast, mun hraðar en hjá öðrum löndum. Þar kom krónan okkur til hjálpar. Þá var ekki stemmning fyrir orðræðu hópsins og hann lét lítið á sér bera. Stjórnmálaflokkurinn hafði hins vegar verið stofnaður og lenti í hálfgerðri tilvistarkreppu, gat ekki talað um hugðarefni sitt og fór því að stunda popppúlisma af heilum hug. Vart mátti koma fram frétt um eitthvað sem betur mátti fara án þess að þingmenn flokksins stykkju fram í fjölmiðla eða tóku það upp á Alþingi. Það ástand varir enn.

Undanfarna daga hafa svokallaðir stjórnarskrársinnar látið mikið til sín taka. Heimta einhverja stjórnarskrá sem aldrei var samin, einungis sett mikið magn fallegra orða á blað og þjóðin spurð hvort notast ætti við þann orðaforða við gerð nýrrar stjórnarskrár. Ferlið um breytingu stjórnarskrár hófst að frumkvæði þáverandi formanns Samfylkingar, sem hafði náð því að gera formann annars stjórnmálaflokk að einum stærsta lygara þjóðarinnar, og sótt um aðild að ESB. Eitt stóð þó í veginum, en það var gildandi stjórnarskrá. Þann stein þurfti að taka úr götunni og upphófst þá eitthvert mesta sjónarspil sem um getur og stendur það enn. Allt til að Ísland geti orðið hjálenda ESB.

Á þeim tíma er já Ísland lét mest til sín taka í umræðunni, eftir hrun, voru stofnaðir nokkrir aðrir hópar þeim til andsvars. Því miður virðist lítið heyrast frá þeim í dag, þó þessi landráðahópur ríði nú röftum í fjölmiðlum landsins. Fari fram sem horfir mun sjálfstæði landsins verða að veði eftir næstu kosningar.

Því er full ástæða til að kalla upp á dekk alla þá sem unna sjálfstæði þjóðarinnar!"

Að hugsa sér að maður skuli hafa kosið þetta fólk á sínum tíma.Það verður mér til ævilangrar pólitískrar skammar.

Íslendingar á Spáni hafa grátið mikið í Útvarpi Sögu um hvað Evran sé búin að falla mikið . Það er helst að heyra á þeim að þeir vilja að Ríkið bæti þeim þá lífskjararýrnun sem ellilífeyririnn þeirra hefur orðið fyrir við rauðvínshækkunina hjá þeim þar í landi.

En þessir gengisspekingar sem heimta upptöku Evru ættu að minnast þess að hún kostaði 185 kr í október 2009.  Nú kostar hún 163 eða eitthvað svoleiðis.Þessu gleyma þessir spekingar.

Þeir gleyma kostum krónunnar okkar þar sem hagvaxtarfasinn hjá okkur er allur annar en í ræflasambandi gömlu Evrópu. Bara af því að við erum sjálfstæð þjóð og höfum sýnt að lífskjör eru til langtíma litið sífellt að batna á Íslandi og kaupmátturinn hefur vaxið mikið á síðustu árum.

Guð forði okkur frá Evruspekingunum í  Samfylkingarflokkunum báðum í næstu kosningum eins og garminum honum  Steina Páls og kúlulánakóngafólkinu gamla.