Sannleikurinn um Sorpu

er að hún er byggð á þráhyggju vinstrimanna um moldargerð og landspjöll með sorpurðun frekar en skynsemi. Framleiðslu metangass um leið og þeir kaupa rafmagnsstrætóa. Aðeins óskynsemi efst í allri ákvarðanatöku.

Sannleikurinn um Sorpu er tekinn fyrir í afburða grein Sverris Ólafssonar í Morgunblaðinu í dag. Þar er sannleikurinn um afleiðingar ranghugmyndanna rakinn. Í stað þess að nýta þá gríðarlegu orku sem í sorpinu er fólgin á arðbæran hátt er miklum fjárhæðum varið í að grafa vandann í jörð og eyða verðmætunum í stað þess að nýta.

Sverrir segir:

"Yfirvöld höfuðborgarinnar í miðjum faraldrinum gjört heyrinkunnugt að nauðsyn beri til að hækka gjaldskrá Sorpu um allt að þrjú hundruð prósent og veiti ekki af. Kostnaðurinn við að höndla ruslið sé orðinn þvílíkur.

Tíðindi þessi hafa orðið tilefni fimm dálka forsíðufyrirsagnar Moggans og er það ekki að undra nú er þjóðin öll leitast við að halda kostnaði innan skikkanlegra marka og að hafa taumhald á verðbólgunni.

Undantekning er borgarstjórnarmeirihlutinn í Reykjavík, sem telur það ekki eiga við um sig. Raunar ætti ráðslag þetta ekki að koma á óvart.

Í ljósi sögunnar hefur stjórn vinstrisinnaðra öfgaflokka og viðhengja þeirra jafnan fylgt fjárhagsleg óreiða og furðuráðslög, sem ganga þvert á almenna skynsemi, ráðdeild og hagkvæmni. Ástand sorphirðumála höfuðborgarinnar er ljós vitnisburður um það.

Fyrir allnokkru var ráðist í byggingu gas og jarðgerðarstöðvar á vegum Reykjavíkurborgar. Það var víst gert framhjá kerfinu og því urðu borgaryfirvöld aldeilis hissa er hún var risin án heimildar með tilsvarandi aukningu á skuldasúpu borgarinnar, sem vart er á bætandi.

Forstjórann þurfti svo að reka fyrir tiltækið en það sem verra var, að í ljós kom að stöðin var eiginlega meinloka, því að hún býr til afurðirnar gas, moltu og skítalykt aðeins úr hluta af heimilissorpi.

Óvíst er að nokkur vilji kaupa gasið og nóg er til fyrir á landinu af mold, sem er efni skylt moltu.

Afgang sorpsins, sem nýtist ekki í framangreindar afurðir, þarf svo að flytja úr landi eða urða. Fáir vilja láta urða hjá sér vegna framangreindrar lyktar, sem von er.

Það er nú engin furða að hækka þurfi gjaldskrárnar, þegar búið er að eyða öllum þessum peningum í tóma þvælu eins og hér hefur verið gert. En það sér kannski ekki á. Syndalisti borgarinnar er fullur af alls konar þvælu.

Í fjölmörgum heimsborgum vítt um lönd og álfur hafa verið reistar fullkomnar sorpbrennslustöðvar, sem leysa þennan vanda. Öllu heimilissorpi er dembt í þær og brennt við háan hita. Úrgangsplast reynist ágætis brennsluefni, allur reykur er hreinsaður, stöðvarnar geta því verið í íbúðahverfum vandræðalaust, úrgangurinn er steingerð möl, sem nýtist ágætlega sem púkk í akvegi eða undir járnbrautarteina, afurðin er auðseljanleg orka og engin vandamál eru skilin eftir fyrir kynslóðir framtíðar til að leysa.

Þriðjungur Vínarborgar nýtur raforku og varma frá einni slíkri stöð, sem er augnayndi á að líta, skreytt að utan af listamanninum heimsfræga Hundertwasser. Engin ólykt og ilmandi skógur á ýmsum hæðum byggingar brennslunnar. Tæknin er margreynd og svínvirkar.

Ætli hefði nokkuð þurft að hækka gjaldskrá Sorpu ef afurðir gas- og jarðgerðarstöðvarinnar væru auðseljanlegar á góðu verði?

Hvernig skyldi standa á því að slík sorpbrennsla er ekki risin í Reykjavík jafn augljóst og það ætti að vera? Skyldi það vera vegna þess að meirihlutinn er með eyru, augu og heilabú lokuð gagnvart raunverulegum nauðsynjamálum?

Í hinum dreifðu byggðum landsins hafa verið reistar misheppnaðar sorpbrennslur, byggðar á úreltri tækni. Þær hafa flestar verið aflagðar vegna mengunar og rangrar notkunar. Óþarfi er að láta slík spor hræða. Með réttum búnaði og réttri notkun er sorpbrennsla góður kostur.

Sorp- og jarðgerðarstöðin í Álfsnesi nýtist kannski í framtíðinni í púkk undir akvegi eftir að hún hefur verið rifin og almennileg sorpbrennsla reist. Það gerist kannski, þegar núverandi meirihluta hefur verið steypt og nýir fulltrúar með opin augu, eyru og heilabú eru komnir til sögu.

Varla fyrr."

Þetta er sannleikurinn um rangar grundvallarákvarðanir í sorpmálum. Öflug orkuvinnslustöð í Álfsnesi getur þjónað öllu landinu sem er að kæfa sig í sorpi.

Það verður víst að bíða þess að fólk með fullu viti komist að í sveitarstjórnum á landinu. Bræðingsmeirihlutanum í Reykjavík er gersamlega fyrirmunað að taka nokkrar skynsamlegar ákvarðanir í sorpmálum fremur en samgöngu-og skipulagsmálum. Eina sem það fólk getur er að að taka meiri lán og telja slíkt sér til tekna.

Á meðan rekur allt á reiðanum í Sorpumálum sem öðrum málum.