Ragnar Önundarson

sá margvísi bankamaður skrifar raunsanna pistil á Facebook sem frammámenn okkar í kjaramálum mættu reyna að lesa sumir hverjir:

"Tveir stjórnmálaflokkar, Samfylkingin og Viðreisn, virðast ætla, einu sinni enn, að gera þráhyggjuna um evru að helstu ,,söluvöru” sinni fyrir kosningar. Þeir eru búnir að ,,mála sig út í horn” áður og virðast ekkert hafa lært eða skilið.

 

Ef gengi krónunnar er of hátt skráð, t.d. vegna aflabrests, verðfalls, brests í komu ferðamanna eða þess að við skiptum í kjarasamningum meiri tekjum á milli okkar en þjóðartekjunum nemur, þá versnar hlutfallið milli gjaldeyristekna og -gjalda og þar með verður skortur á gjaldeyri, sem leiðir til þess að hann hækkar í verði í krónum. Það er kallað gengislækkun.

 

Kaupmáttur okkar allra lækkar, við tökum höggið saman, eins og sannir jafnaðarmenn. Gjaldeyrisaflandi fyrirtæki lifa og hagkerfið réttir fljótt úr kútnum.

 

Ef menn búa hinsvegar við gjaldmiðil sem sveiflast m.v. þarfir annarra landa, t.d. Þýskalands (sem evran gerir að verulegu leyti) þá týna útflutningsfyrirtækin tölunni (þmt. ferðaþjónustufyrirtækin sem flytja náttúruupplifun út og afla á móti gjaldeyris). Starfsfólkið missir vinnuna og einhverjir sem þora þurfa að stofna ný fyrirtæki frá grunni, sem reynslan sýnir að er tímafrekt stórmál. Þess vegna er mikið atvinnuleysi viðvarandi í jaðarríkjum evrunnar, sem líða fyrir það að hún fylgir iðnríkjunum í miðju ESB.

 

 

Langvarandi atvinnuleysi er mesta og versta böl hvers samfélags.

 

Að gæla við hugmyndir um aðild að ESB og upptöku evru, sem mundu valda því að þeir sem missa vinnuna við gjaldþrot útflutnings-fyrirtækjanna þjáist einir, á meðan allir aðrir halda áfram að eyða gjaldeyrisvarasjóðum landsins þar til það kemst í þrot, væri réttnefnt glapræði.

 

Að stofna fyrirtæki og koma því í lífvænlegt horf er mikið mál, tekur langan tíma og er áhættusamt. Þrotlaus vinna og margar svefnlitlar nætur. Þetta er ástæða þess að atvinnuleysi yrði mikið og langvarandi, ef land með einhæft atvinnulíf og ólíkt þeim iðnríkjum Vestur-Evrópu sem ráða gengi evrunnar, tæki hana upp. Svonefnd ,,niðurfærsluleið” yrði eina úrræðið, þ.e. lækkun launa allra nema þeirra sem ráða launum sínum sjálfir. Sjálftökufólkið tekur nefnilega ekki þátt í niðurfærslunni.

 

Allir eiga að vita að full aðild að ESB er forsenda upptöku evru. Samt er rætt um upptöku evru eins og einfalt mál. Til að okkur verði óhætt að ganga í ESB yrðum við að virkja í stórum stíl og laða stóriðju til okkar í sama mæli, til að auka stöðugleika hagkerfisins.

 

Engin samstaða er um þetta og reynslan sýnir að sú stóriðja sem hingað vill koma, önnur en álbræðslur, er vandfundin.

 

Enn er nægur tími til leiðrétta ranga stefnu fyrir kosningar. Það ættu Samfylkingin og Viðreisn að gera. Það er ekki gæfulegt að leggja mál sín í dóm kjósenda ,,með óhreint mjöl í pokahorninu”.

 

Þarna er greint frá staðreyndum sem hafa ekki breyst í áranna rás. Hinsvegar hafa margir haft atvinnu  af því að afneita þessum atriðum og flagga öðrum sjónarmiðum. Allt hefur jafnan að sama brunni  borið. Ein króna verður ekki að tveimur nema hagnaður verði.

 

Það veit Ragnar Önundarson eftir langa reynslu.

Athugasemdir

[Vagn (IP-tala skráð) 6.3.2021 kl. 17:46]

Já, Ragnar Önundarson sem helst er þekktur fyrir karlrembu og samráð og markaðsmisnotkun sem forstjóri kreditkorta. Semsagt ekkert gáfnaljós, fastur í fornöld og með vafasamt siðferði. Þarna lýsir hann sinni pólitísku skoðun með fullyrðingum án raka sem standast skoðun. Menn geta því auðveldlega verið sammála honum eða ósammála. Hvort grein hans sé raunsönn fer eftir pólitískum skoðunum lesanda en ekki neinum sönnuðum staðreyndum. Þannig að þessi grein er ekki að kenna neinum neitt en virkar sem staðfesting fyrir þá sem hafa þessa trú. Þeir kalla trúarkenninguna staðreyndir og greinina raunsanna þó fullyrðingarnar séu hrekjanlegar. Hinir hafa heyrt þetta allt áður án þess að sannfærast og taka trúna. Trú Ragnars er ekki smitandi þó aðrir sanntrúaðir hrífist með prédikuninni.

[Nonni (IP-tala skráð) 7.3.2021 kl. 01:46]

,,skortur á gjaldeyri, sem leiðir til þess að hann hækkar í verði í krónum. Það er kallað gengislækkun"

Þetta er reyndar rangt. Gjaldeyrir hækkar í verði og þar með minnkar verðgildi krónunnar (gagnvart erlendum gjaldmiðlum). Það er lækkun krónu og hækkun (gengis) erlendra gjaldmiðla eða gengishækkun. Líka má tala um lækkun krónu og hækkun gengis (erlendra gjaldmiðla).

PS Ég biðst afsökunar á vöntun á íslenskum gæsalöppum, kerfið fer í fýlu við noktun þeirra sbr. „“

[Gísli Holgersson (IP-tala skráð) 7.3.2021 kl. 10:34]

Samfylkingin og Viðreisn og einstaklingar með sömu skoðun um að ganga til lags við ESB (skuldabandalagið), hverfa af Alþingi. Hverfum að öllu frá skuldbindingum og óstjórn ESB, sem engu skila til fámenni okkar ÍSLENDINGA, nema vandamálum. 

Við viljum eigin landamæri og eigin stjórnsýslu með styrkri löggæslu og landamæraeftirliti. 25/þúsund atvinnulausra er skelfilegt fyrir fámenni okkar-Covid plágan frá Kína og skítblankt RÍKIÐ segir fullt stopp á hælisleitendur, sem eru að kæfa fámenni okkar og íslenska menningu.

[Halldór Jónsson, 10.3.2021 kl. 21:37]

Þetta er óvenjulega vitlaus samsetning hjá Kerrunni um Ragnar Önundarson

[Vagn (IP-tala skráð) 11.3.2021 kl. 03:08]

Ææ, var ég að segja eitthvað sem ekki mátti um einhvern sem þú hefur sett upp á stall. Þér var nær að sækja hetju í hóp smákrimma sem geta látið kennitölu fyrirtækis taka á sig sökina þegar lög eru brotin. Ekki getur málstaðurinn verið beysinn ef hetjur hans eru svona.