Prófkjör

opið öllum flokksmönnum og stuðningsmönnum notar Sjálfstæðisflokkurinn einn flokka. Kostnaðarsöm aðferð og auðvitað ekki gallalaus og margir hæfileikar fara ónýttir frá borði.

Litlu ljótu flokkarnir hafa yfirleitt ekki neinar þær hugsjónir sem vekja áhuga fólks þannig að þeir eru ekki í dýrum vandræðum með að raða á framboðslista sína og þá eftir þörf frambjóðenda til opinberrar framfærslu.

Ég tel samt að Sjálfstæðisflokknum hafi þá miðað best þegar niðurstöður prófkjara og dómur fólksins hafa verið virtar.

Frambjóðendur þurfa skiljanlega að sprikla og auglýsa sig sem best þeir kunna. Síðan eru misjafnlega valinkunnir menn að skrifa til stuðnings hinum og þessum frambjóðendum. Hvaða áhrif þau skrif hafa veit ég ekki. Gætu hugsanlega alveg orðið til að fæla frá eins og að?

En ég get nú samt alveg reynt að taka þátt í slíku athæfi upp á von og óvon. Ég trúi nefnilega á það að ég sé að segja satt þegar ég mæli með að einkadóttir mín Karen Elísabet bæjarfulltrúi í Kópavogi fái brautargengi í prófkjöri Sjálfstæðismanna í Kópavogi sem lýkur í þessari viku.

Kaen skrifar skynsamlega í marga fjölmiðla sem kjósendur vonandi lesa. Hún hefur verið okkur foreldrunum góð dóttir og lifað vel og skynsamlega það sem af er. Annars er hún Karen fráskilin móðir tveggja yndislegra stúlkna sem eru óviðjafnanlega góðar við ömmu og afa.

Mig langar að tilfæra einn texta sem hún skrifaði sem mér finnst lýsa henni vel:

"Ég kem úr mjög karlægum heimi, á þrjá eldri bræður og slóst viljug við þá.

 

Vann frá 13 ára aldri í Steypustöðinni, öll sumur, jóla og páskafrí og í verkfallsfríum. Ég var sett í appelsínugulan galla og fékk minnstu skóstærðina af öryggisskóm sem til var í búðinni og leidd inn á verkstæðið.

 

Þar vann ég með yfir 30 körlum, lang yngst og eina konan/stelpan á svæðinu, var aldrei kölluð neitt nema "stelpan". Mér var m.a.kennt að rafsjóða og var sett í öll skítverk sem mönnum datt í hug. Enda var ég dóttir forstjórans og tilvalið að pína hana aðeins.

 

Ég þótti lunkinn við að pússa og sprautulakka steypubílana, fékk einnig að leysa af í eldhúsinu (enda kona) og svo í steyputurninum.

 

Þarna dúsaði ég til 19 ára aldurs. Ég lærði einnig að rífa kjaft, svara fyrir mig og fara með klúrar vísur. Ég gaf mig aldrei, og mér þótti orðið vænt um marga karlana þarna sem reyndust mér vel, sumir voru samt vafasamir og forðaðist ég þá.

 

Eitt fallegasta hrós sem ég hef fengið var, þegar Ottó yfirmaður var spurður með smá fyrirlitningu "hvernig stendur eiginlega stelpan sig hérna"?

Stelpan!!!! hún er besti vinnumaður sem ég haft! "

 

Þeir sem muna hann Ottó Gíslason vita að hann var afar hreinskilinn maður og fáum líkur að samviskusemi.

 

Hún Karen vílar ekki fyrir sér að fara með hendurnar í kalt vatn ef með þarf og er ófeimin við að segja sínar skoðanir á mönnum og málefnum.

 

Hún verður traustur liðsmaður í Sjálfstæðisflokknum og enginn þarf að efast um að hún reynir sitt allra besta í hverju máli.Og seint myndi hún yfirgefa flokkinn sinn í miðjum straumi eins og tíðkast á vinstri vængnum og þykir fínt.

 

Takir þú þátt í að velja fólk á lista Sjálfstæðisflokksins við komandi AlÞingiskosningar máttu alveg muna eftir stelpunni.

 

Kannski er ekki við hæfi að ég sé að skrifa svona henni dóttur minni til stuðnings og hún gjaldi þess. En ég tek sjansinn á að menn komi auga á kosti hennar umfram mína.

 

Prófkjör eru erfið þegar slíkt mannval er í boði sem er í Prófkjöri Sjálfstæðismanna í Suðvestur-Kjördæmi en dómnum verður víst að hlíta.  

• UTANKJÖRFUNDARATKVÆÐAGREIÐSLA

  • Fer fram í Valhöll, Háaleitisbraut 1 frá klukkan 10-16 alla virka daga.
  • Þriðjudaginn 1. júní verður utankjörfundaratkvæðagreiðslan opin frá kl. 10 til 19

  KJÖRDAGAR, 10., 11 og 12 júní.

  Opnunartími á öllum neðangreindum kjörstöðum

  • 10. og 11. júní er opið frá 17:00 – 20:00
  • 12. júní er opið frá 09:00 – 18:00

  Kjörstaðir:

  • Garðabær – Félagsheimilið, Garðatorgi 7
  • Hafnarfjörður – Félagsheimilið, Norðurbakka 1a
  • Kópavogur –
    • 10. og 11. júní er kosið í félagsheimilinu, Hlíðarsmára 19
    • 12. júní er kosið í Lindaskóla, Núpalind 7
  • Mosfellsbær – Félagsheimilinu Kjarna á fyrstu hæð, Þverholti 2
  • Seltjarnarnes – Félagsheimilið, Austurströnd 3.

   

Athugasemdir

[Helga Kristjánsdóttir, 9.6.2021 kl. 13:31]

Gott að vera einlægur,en í mig var hringt í gær og minnt á frænda minn Jón Gunnarsson.Dóttir þín sendi Arnari mínum sms, bæði vorum  við efins allt kjörtíkabilið um Sjálfstæðisflokkinn. En mér finnst það ekki við hæfi að taka þátt í prófkjöri flokks og kjósa svo annan.Minnir að fólki þætti það bara eðlilegt. En ég kemst ekkert nema í hjólastóli sem Arnar flytur mig oftat í,hin börnin eru út á landi og erlendis. þau sem eru heima svo afar upptekin um þessar mundir. Ég er sammála því sem þú skrifar um dóttur þína. Mín skoðun er að veigamestu mál þjóðarinnar eru í lausu lofti-kröftugri orð á ég ekki til(nema blót! Passar ekki í umræðu um Ísland.

[Bjarni Jónsson, 9.6.2021 kl. 16:55]

Ekki trúi ég hún hafi alizt upp í karlægum heimi, heldur karllægum.

[Ómar Geirsson, 9.6.2021 kl. 20:43]

Blessaður Halldór.

Falleg skrif.

Megi dóttir þinni ganga sem best, ég sé að hún hefur góðan bakgrunn og hefur fengið gott uppeldi.

Svo má heldur ekki gleyma Vörðum sjálfstæðis þjóðarinnar, þið verið að passa uppá þá, þið þarna sem kjósið ykkar fólk.

Kveðja að austan.

[Símon Pétur frá Hákoti (IP-tala skráð) 10.6.2021 kl. 08:32]

Þar sögðu allir þingmenn "Sjálfstæðisflokksins" já við 3. Op. ESB.

Ekki veit ég hug dóttur þinnar í því máli, en sé hann sem þinn, þá óska ég henni og Arnari Þór Jónssyni efstu sæta að prófkjöri loknu.