Hverjum trúum við betur?

Bjarna  Benediktssyni og Glapinski pólska seðlabankastjóranum sem lýsti því  hvernig zlotíið pólska hefði bjargað þeirra endurreisnarmálum eða Þorsteini Pálssyni og hans fullveldisfyrirlitningarliði sem vill ganga í ESB og Evrópuherinn og henda krónunni, hafandi reynsluna frá hruninu 2009? 

Bjarni skrifar í Fréttablaðið í dag:

"Það ríki er vandfundið þar sem jöfnuður er meiri en á Íslandi. Þetta kemur skýrt fram í alþjóðlegum mælingum, þar sem lágtekjuhlutfall hefur mælst hvað lægst hér af evrópskum samanburðarríkjum og jöfnuður einna mestur. Ekki er nóg með að jöfnuður sé meiri hér en í samanburðarríkjum, heldur sýna álagningarskrár að bilið milli þeirra sem eiga mest og minnst verður sífellt minna.

Í svari við nýlegri fyrirspurn frá formanni Samfylkingarinnar kemur fram að hlutfall eigna efnuðustu prósenta landsmanna af heildarkökunni fer minnkandi. Þessi þróun hefur verið nokkuð stöðug undanfarin ár, en nú hefur hlutur þeirra ríkustu ekki verið lægri frá því í kringum síðustu aldamót. Með þessu er ekki sagt að „réttu hlutfalli“ sé náð eða ekki þurfi að vinna áfram að bættum kjörum þeirra sem minnst hafa. Alltént er þó orðræða þeirra sem stöðugt tala um séríslenska misskiptingu og óréttlæti nokkuð sérkennileg þegar staðreyndir málsins eru skoðaðar.

Það hefur verið keppikefli okkar Íslendinga um árabil að byggja hér samfélag þar sem allir geta freistað gæfunnar og náð árangri á eigin forsendum, en halda á sama tíma úti þéttu velferðarneti sem grípur þá sem þurfa.

Við viljum virkja kraftinn í einstaklingnum og skapa jarðveg þar sem fólk með góðar hugmyndir og framtakssemi að vopni getur blómstrað. Markmiðið er að stækka sífellt kökuna, frekar en að hugsa bara um hvernig á að sneiða hana niður.

Við aukum ekki hagsæld með því að jafna alla niður með hærri sköttum og útþenslu hins opinbera, eins og sumir flokkar tala ítrekað fyrir. Við siglum nú út úr tímabili heimsfaraldurs sem hefur sett mark sitt á flest svið samfélagsins.

Það er samdóma álit flestra að hér hafi náðst afburða góður árangur, bæði heilsufars- og efnahagslega. Ísland stóðst COVID-storminn betur en flestar þjóðir. Næstu misseri þurfum við að halda áfram fast við sömu gildi. Jöfn tækifæri umfram jafna útkomu. Trú á fólk, frelsi og framfarir. Þannig byggjum við saman enn sterkara Ísland. "

Það er um þetta sem verður kosið í haust.

Það byggist á því hverjum við trúum betur.

Athugasemdir

[Vagn (IP-tala skráð) 14.7.2021 kl. 13:48]

Krónan bjargaði. Allavega bjargaði hún því að stjórnvöld þurftu lítið að gera meðan Evrustjórnvöld þurftu sjálf að berjast við vandamálin. Gjaldeyrishöft voru einnig sett á svo öruggt væri að almenningur færi ekki að hafna björguninni. Og bankarnir gátu haldið vöxtum háum meðan Evrubankar voru reknir á nær engum vöxtum. Byrðunum var velt, með stórkostlegri hjálp krónunnar, á almenning. Þess vegna versnuðu kjör almennings hvergi meira en hér þegar laun lækkuðu um helming við hrun krónunnar. Uppboð á heimilum voru hvergi fleiri. Bankarnir okkar sýndu eftirtektarverðan hagnað og bestu afkomu OECD landa. Og þegar Evrulöndin voru komin á beinu brautina vorum við enn að berjast í kreppu með lágt metinn gjaldmiðil og urðum því vinsæll ferðamannastaður þeirra sem héldu fullum launum og versluðu fyrir Evrur og Dollara. Krónan bjargaði stjórnvöldum frá því að þurfa að fást við vandamálin. Það er gott að hafa gjaldmiðil sem fríar stjórnvöld frá vandamálum, finnst stjórnvöldum. Og stjórnvöldum finnst almenningur mega miklu til fórna fyrir þau gæði.

[Halldór Jónsson, 14.7.2021 kl. 21:11]

Kerran var greinilega ekki hér í hruninu til að verða vitni að því hvernig útflutningurinn og krónan náði okkur ótrúlega fljótt upp úr kreppunni og við náðum okkur langt um fyrr en evruríkin sem eru enn að ströggla sum hver.Túrisminn var líka lottóvinningur .

[Vagn (IP-tala skráð) 15.7.2021 kl. 05:41]

Almenningur í Evruríkjunum fann varla fyrir hruninu miðað við Íslenskan almenning. Ekki rugla saman kjörum almennings og vanda stjórnvalda. Heimili fóru á uppboð þó mörg fyrirtæki græddu á lágum launum í krónum og tekjum í evrum og dollurum. Hagur Íslensks almennings batnaði mörgum árum á eftir almenningi í Evrulöndum. Krónan passaði upp á það. Og hefði ekki orðið turistasprenging þá væru laun ennþá hálf og kreppuvextir á lánum. Það er ekki víst að við verðum eins heppin næst.

[Halldór Jónsson, 15.7.2021 kl. 16:05]

Kerran er fullyrðingasöm eins og venjulega. Þetta er endemis rugl. Íslendingar náðu sér hratt vegna krónunnar þar sem útflutningurinn tók við sér. T'urisminn var svo viðbót.En heimilinum var fórnað á altari banksteranna, Björgólfa og Ólavíusa með lánskjaravísitölunni óbreyttri. Skuldsetningin var líka orðin ósjálfbær í mörgum tilvikum og menn áttu enga möguleika að standa við lántökurnar sem voru gerðar á bjartsýninni einni.

[Halldór Jónsson, 15.7.2021 kl. 16:07]

Það er fróðlegt að skoða gengissöguna frá þessum tíma. Fullyrðingar um allt svart standast ekki.