Eignarnám á Reykjavíkurflugvelli !

1946 , þegar Íslendingar tóku við Reykjavíkurflugvelli voru helstu forystumenn flugmála á Íslandi spurðir eftirfarandi spurninga :

 

1. Er það álit yðar að fært myndi vera að nota Keflavíkurflugvöll sem aðalflugvöll Reykjavíkur fyrir innnalandsflug og Atlantzhafsflugs ? Eða teljið þér að stækka beri Reykjavíkurflugvöllinn svo hann verði nothæfur sem aðalflugvöllur einnig fyrir Atantshafsflugvélar ?                                                                                                                                                                                                
2. Álítið þér, að leggja eigi niður Reykjavíkurflugvöllinn sem slíkan eða hann rekinn í núverandi stærð fyrir innanlandsflug eingöngu ?
3. Teljið þér fært að reka innanlandsflug með Keflavíkurflugvöllinn einan sem bækistöð hér við Reykjavík ?
4. Er það gerlegt að yðar áliti með tilliti til kostnaðar og staðsetningu að byggja nýjan flugvöll í nágrenni  Reykjavíkur fyrir innanlandsflugið ?
5. Eruð þér þeira skoðunar að Reykjavíkurborg stafi hætta af Reykjavíkurflugvelli ?

  

Þá voru svörin flest þau ,að besti kosturinn væri að hafa Reykjavíkurflugvöll á sínum stað.

 

Síðan hafa stjórnmálamenn í Reykjavík verið að bisa við að svara þessum sextíuára gömlu grundvallarspurningum á einhvern annan hátt. Og með hjálp allskyns mannvitsbrekkna utan úr bæ, sem vita allt betur en næsti maður.Allt án niðurstöðu .

 

Það er nefnilega enginn kostur nema annaðhvort að hafa völlinn kyrran eða fara til Keflavíkur. En þangað eru nú allt aðrar samgönguaðstæður en  voru 1946 með tilkomu bílahraðbrautar. Kostir sem menn veltu fyrir sér þá, eins og til dæmis flugvöllur á Álftanesi, eru einfaldlega ekki lengur inni í myndinni . 

 

 Höfuðborgin getur núna flutt margt af starfsemi sinni til Reykjanesbæjar án mikilla vandkvæða. Þar getur til dæmis Hátæknisjúkrahúsið þeirra Davíðs og Alfreðs risið, lansbyggðarráðuneytin geta flutt þangað og annað eftir því.

 

Samt er endalaust klifað á þessum grundvallarspurningum frá 1946, gjarnan  í pólitískum áróðurstilgangi. En engin fæst niðurstaðan frekar en þá. Ef til vill vegna þess,  að innst inni er enginn svo vitlaus að trúa því, að höfuðborg geti verið án flugvallar ? 

 

Afleiðingin er hinsvegar sú versta fyrir allt og alla. Flugvellinum er haldið í spennitreyju aðgerðaleysis og kyrrstöðu. Ekkert má byggja eða bæta, hvorki farþegaafgreiðslu innanlandsflugsins í 1200 fermetrum fyrir 400.000 farþega meðan aðeins 500.000 farþegar fara í gegnum Keflavíkurflugvöll á 22.000 fermetrum ! Né heldur má nokkurt flugskýli reisa á vellinum , ekki einu sinni til bráðabirgða , fyrir tuga milljarða flugflota viðskiptalífsins, sem vex ár frá ári, hvað þá fyrir grasrótarflugið .

 

 Það er aðeins skipulega sótt að flugvallarsvæðinu í gegnum skipulagsyfirvöld, með úthlutanir á landi flugvallarsvæðisins til allskyns starfsemi og gæluverkefna, sem á þangað ekkert erindi, svo sem . Háskólabygginga, íbúðarblokka, bílastöðva  og svo framvegis.

 

Við þessu er ekki nema eitt svar. Alþingi verður að taka af skarið og láta fara fram eignarnám á öllu flugvallarsvæðinu, sem er ekki þegar í þess eigu. Það er ekki hægt að láta þetta fólk, sem veltir sér ár eftir ár uppúr vegtyllunum í Borgarstjórn Reykjavíkur, með viðblasandi árangri, fara fram með þessum hætti gegn hagsmunum þjóðarinnar.

  

Ef ráðherrrana og Alþingismenn skortir pólitískan kjark þá er aðeins eitt eftir. Láta fara fram þjóðaratkvæðagreiðslu um líf eða dauða Reykjavíkurflugvallar í næstu sveitarstjórnarkosningum eða Alþingiskosningum um allt land.

 

Framtíð Reykjavíkurflugvallar er slík grundvallarspurning, að það er aðeins þjóðin öll sem getur best svarað henni með beinum hætti án þess japl og jamls og fuðurs, sem hefur einkennt umræðuna frá 1946. Reykjavíkurflugvöllur er þjóðareign en ekki pólitísk skiptimynt í sveitarstjórn.

Athugasemdir

[Ómar Bjarki Smárason, 3.11.2007 kl. 22:30]

Gott að sjá að þú heldur þessu máli vakandi Halldór. Ég hef grun um að þeir sem eru á móti Reykjavíkurflugvelli, þar sem hann er nú, sé fólk sem aldrei stígur upp í flugvél og þarf yfirleitt ekki að ferðast út af höfuðborgarsvæðinu. Þannig ætti kannski að gera skoðanakönnun meðal þeirra sem nota flugið og spyrja þá álits á staðsetningu vallarins. Það að leita ráða hjá þeim sem aldrei fljúga mætti líkja við það að spyrja þá, sem aldrei þurfa til tannlæknis, hvort leyfa eigi deyfingu við rótfyllingar og aðrar slíkar aðgerðir, þó vissulega sé þessi samlíking nokkuð langsótt..... Líklega er óhjákvæmilegt að kjósa um þetta á við tækifæri, t.d. samhliða forsetakosningum næsta sumar. Það er ekki sanngjarnt að Reykvíkingar einir ráði staðsetningu flugvallarins, því hann er landsmanna allra, og kannski einskonar nýlenda landsbyggðarinnar í Höfuðborginni, enda flugvallarlandið í eigu ríkisins. Ef Reykvíkingar sætta sig ekki við það að landsbyggðin hafi þennan sjálfsagða aðgang að Höfuðborginni og finna sig þar óvelkomna, nú þá er ekkert annað að gera en að finna okkur nýjan Höfuðstað, þar sem allir landsmenn eru aufúsugestir, líka þeir sem búa í Reykjavík.  En haltu endilega áfram á þessari braut, því ekki veitir af að það heyrist í „hinum þögla og hógværa meirihluta“ þeirra sem nota þurfa flugið.Kveðja,Ómar Bjarki Smárason

[Jóhannes Pálsson, 4.11.2007 kl. 18:24]

Halldór þetta er rétt hjá þér, það er með ólíkindum hvað stjórnmála menn draga okkur á ákvörðun um staðfestingu á því að Reykjavíkurflugvöllur verði áfram þar sem hann er.  Það er sjálfsögð krafa okkar sem búum utan höfuðborgainnar að hafa auðveldan aðgang að borginni, sérstaklega í ljósi þeirrar staðreyndar að stjórnmálamenn staðsetja nánast alla opinbera þjónustu í Reykjavík. Ég er einn af þeim sem nota flugvöllinn mikið. Ég hef lent oftar en einu sinni í því að ferðast í gegnum Keflavík til Egilsstaða og það er ljóst að ferðatíminn mun lengjast um 4-6 tíma ef maður þarf að skjótast á fund í bænum, ef innanlandsflugið verður flutt til Keflavíkur.  Í dag fer ég iðulega að morgni eða um miðjan dag suður  og heim aftur að kvöldi, en með flutningi flugvallarinns úr miðborginni mun þetta verða ógerningur. Ég tek undir með þér að Alþingi eða Samgönguráðuneytið verður að tryggja að það land sem þarf undir flugvöllinn, og er ekki í eigu Ríkisins verði tryggt, þannig að misvitrir stjórnmálamenn í Reykjavík hafi ekki einir um það að segja að flugvöllurinn verði áfram þar sem hann er.

[Jóhann Páll Símonarson, 5.11.2007 kl. 13:11]

Heill og sæll Halldór.

Ég tek undir með þér og þeim sem taka undir með þér. Við eigum að standa vörð um að innanlandsflug verði á sínum stað. Þessi unga kynslóð sem nú vex úr grasi veit ekkert um sögu vallarins þess vegna vill það flugvöllinn burtu. Ef við ætlum að hafa þjónustu við borgarbúa og landsbyggðina þá á þessi flugvöllur að vera á sínum stað annað kemur ekki til mála að minni hálfu.

Jóhann Páll Símonarson.