Halldór Jónsson

9.10.2008 | 22:40

Endalok almenningshlutafélaga ?

Fyrir atburðina sem leiddu til endaloka bankana var stemningin svona hjá mér. Ætlaði að setja þetta í Mogga en það fórst fyrir

Eyjólfur Konráð Jónsson átti sér draum um almenningshlutafélög, sem yrðu lyftistöng framfara þjóðarinnar. Þessi félög áttu að starfa á breiðum grundvelli og bera hag allra hluthafa fyrir brjósti. Hann hefði aldrei getað gert sér í hugarlund hvaða örlög fjárglæframenn myndu búa þessum félögum í skjóli skuldsettra yfirtaka og glæpsamlegum yfirgangi gagnvart öllum meðeigendum.

Ríkisbankarnir voru seldir einkaðilum. Þeir gerðu útrás og blésu sig út í yfirskilvitlegar stærðir. Enginn nema Ragnar Önundarson hafði rænu á að vara við hvert stefndi. Og enginn ráðamaður hlustaði á hann heldur. Nú fellur Krónan og mun halda áfram að falla meðan íslenzku bankarnir kaupa upp hvert einasta cent sem Seðlabankinn setur á markað. Og leyfa sér svo að neita að selja fólki gjaldeyri.

Hvað á að horfa uppá þetta lengi ? Olíufélag fær ekki dollara fyrir olíufarmi. Fólk fær ekki úttekt af eigin gjaldeyrisreikningum. Er þetta nokkuð betra en hjá Mugabe í Zimbawe ? Þeir færa upp ársreikningana sína með ágætum gengishagnaði Fyrir hverja ?. Ekki trúa hluthafarnir einu orði sem stjórnendur þeirra segja. Bréfin í þeim falla í Kauphöllinni vegna algers trúnaðarbrests milli hluthafanna og eigenda almenningshlutafélaganna og þeirra ósífnu fjárplógsmanna sem stjórna þeim í krafti illa fengins meirihluta.

Lárus Welding, bankastjóri Jóns Ásgeirs, kemur í Silfrið hjá Agli og segir okkur blákalt að Glitnir sé í fínum málum. Viku seinna er bankinn kominn í þrot. Og svo kemur það í ljós, sem Ragnar Önundarson velti fyrir sér, hvort núverandi stjórnendur og eigendur einkabankanna væru á nauðsynlegu siðferðisstigi til þess að fara með innlán almennings. Svo var ekki. Sjóður 9, sem er sjálfstæð stofnun innan Glitnismerkisins, er gripinn með að hafa ráðstafað sparifé fólksins sem kaupir í þessum göfuga sjóði , í að kaupa skuldabréf gjaldþrota fyrirtækja í eigu stærsta hluthafans, Jóns Ásgeirs Jóhannessonar og föður hans Jóhannesar í Bónus. Gaukurinn verpti í hreiður litla sparifjáreigandans. Hugsið ykkur hvílík skítmennska !

Sjóðurinn stöðvar viðskiptin á meðan þeir í Glitni reyna að klóra yfir þetta. Taka tapið á Glitni. Fyrir mína hönd. Skrifa svo um það á heimasíðuna að þetta hafi allt verið misskilningur og allt eðilegt. Sem er hrein og klár lygi og brot á öllum heiðvirðum bankareglum.

Nú á þjóðin, líka við sem töpuðum okkar hlutum, að leggja fram stórfé til að kaupa almenningshlutafélagið Glitnir af þeim sem sönkuðu að sér ráðandi meirihlutum. Þessum gersimum sem segjast eiga fullt af peningum til að kaupa fleiri félög í útlöndum. Þeir eiga bara ekkert afgangs handa aumingja Glitni. Mínum gamla Iðnaðarbanka sem ég verslaði við allt lífið. Nú á ég að axla tapið en ekki þeir.Þeir svífa á vængjum vindanna meðan ég á ekki fyrir benzíni á mína rellu.

Hvað þeir gerðu við valdið, sem fylgdi meirihlutanum, er núna að koma í ljós. Er enginn af þjóðinni að velta fyrir sér hvað er verið að kaupa ? Hvað er mikið af útistandandi fé bankans komið á hendur hinn fjölmörgu fyrirtækja þeirra feðganna ? Er uppistaðan hugsanlega ónýtir pappírar á fallíttfyrirtæki feðganna ? Megum við biðja FME að birta listann yfir öll útlán Glitnis til feðganna ?. Ætli það verði ekki borin fyrir sig bankaleynd ?

Hefur enginn spurt um það hvernig það eignasafn bankans lítur út sem við þjóðin erum að kaupa ? Það er enginn vandi að telja skuldirnar sem eru á gjalddaga á næstunni. Hitt er líklega flóknara og ekki að búast við að þar sé allt jafn kristalltært eins og bæjarlækur. Því lengi er hægt að hræra í skjölum ef menn fá frið og frelsi til þess .

Einusinni var mér að gefnu tilefni kynnt sú bankaregla að ekki mætti neinn viðskiptavinur banka skulda eða vera ábyrgur fyrir nema sem svarar 1 % í bankanum. Og stjórnarmenn og aðaleigendur ættu alls ekki að vera í teljandi viðskiptum við sinn eigin banka heldur aðra banka. Í Glitni skulda æðstu stjórnendur og stjórnendur bankans 63 milljarða. Og færa síðan upp einhverja goodwill á móti uppá sömu upphæð. Og fyrri forstjóri Bjarni Ármannsson fluttur til Noregs með hundruðir milljóna úr sjóðum Glitnis í starfslokasamninga.

Hvert erum við komin frá hugsjónadögum Eykons og frjálshyggjunnar ? Oligarkar eiga ekkert sameiginlegt með frjálshyggjunni frekar en Tony Soprano stjórnarskrá Bandaríkjanna.

Endalok almenningshlutafélaga ?-Niðurlag

Íslendingar hafa aldrei fyrr staðið frammi fyrir jafn gríðarlegu tjóni á efnahagskerfi sínu og núi vegna framferðis örfárra. manna. Bæði löglausra og siðblindra.

Það er eiginlega furðulegt að líta yfir söguna frá gjaldþroti Hafskips. Það var líka almenningshlutafélag. Þá voru yfirmenn þess settir í gæsluvarðhald til þess að þeir gætu ekki spillt sakargögnum. Þannig fóru Bandaríkjamenn að við forstjóra Enron þegar grunur féll á að hann hefði ekki sagt rétt frá eða fært bækurnar rétt.

Hér gat Hannes Smárason stjórnarformaður tekið 4 milljarða úr sjóðum almenningshlutafélagsins Flugleiða og farið með þá Luxemburgar án frekari skýringa. Í krafti ráðandi hlutar Bónusarfeðga. Að vísu sagði forstjórinn samstundis lausu starfi sínu og margir stjórnarmenn sögðu sig úr stjórninni. Allir voru þeir samt þöglir sem gröfin og ekki vitað til þess að neinn opinber aðili hafi spurt þá hvað var á seyði. Af hverju þegir þetta fólk ? Er ekki hægt að hressa uppá minni þess með einhverjum ráðum ?

Mánuði síðar en Hannes fer með milljarðana kemur Pálmi Haraldsson í Fons heim frá Luxemburg með flugfélagið Sterling og selur Flugleiðum,. á eina 16 milljarða að því maður heyrði. Milljarðarnir komnir aftur í í hús. Enginn veit um kaupverðið hjá Pálma. En Sterling var nú frekar talið verðlítið um þessar mundir ef ekki fallítt. En maður getur sjálfsagt getið í eyðurnar. Maður ársins 2006 var í flugtaki með FL Group, sem var ekki lengur flugfélag landsmanna heldur fjárfestingafélag í eigu aðalleikendanna.

Henry Ford hafði sitt mottó þannig í viðskiptalífinu: " Never complain, never explain"

Okkar drengir kunna vel að skýra ekkert út. Hitt kunna þeir ekki að kvarta ekki heldur hrópað hátt yfir rangindum heimsins í gerfi Davíðs Oddssonar og hins mikla Satans Sjálfstæðisflokksins. Fái þeir ekki peninga eftir þörfum þá er bara verið að ræna þá eignum sínum. Af hverju borga þeir þá ekki sjálfir þegar Glitnir er í vandræðum ? Þeir segjast vera vel stöndugir og geta keypt mörg fyrirtæki í útlöndum ennþá. Bara ekki í greyinu Glitni. Hann eigum við að sjá um.

Hingað til hefur enginn krafið þá sagna af neinni alvöru um þeirra viðskiptasögur eins sumstaðar er gert. Eftir atburðinn hjá Sjóði 9 þá set ég orðið spurningarmerki við íslenzka Fjármálaeftirlitið sem mér finnst lítils virði.. Öll álagsprófin sem þeir gerðu, síðast í ágúst 2008 og kunngerðu að bankarnir væru ekkert að fara á hausinn Ekki sá það neitt athugavert við reikninga Glitnis áður en hann fór í þrot. Og eftir að þeir Hannes Smárason og Kári Stefánsson gátu látið 9 milljónir dollara gufa beinlínis upp í gegnum Luxemurg fyrir nokkrum árum í tengslum við hlutabréfasölu í DeCode, þá sýnist mér önnur yfirvöld eins og íslenzka skattakerfið til dæmis heldur lítils megnugt. Það getur hinsvegar ágætlega skrifast á við minni spámenn í leit að tuttuguogfimmeyringum.

Stofnanir íslenzka ríkisins sem lúta fjármálum og sköttum ráða ekki við ofurmenni viðakiptalífsins. Og dómsvaldið má sín einskis gegn og lögfræðingahernum eins og dæmin sönnuðu í réttarhöldunum yfir Bónusfeðgum. Sem þó höfðu klárlega notað peninga almenningshlutafélagsins Baugs til þess að leggja það undir sig sjálfa. Þessasr stofnanir standa sig þó afburða vel í viðskiptum við litla Hafskipsmenn eða tilfallandi sjoppueigendur.

Sem meðeigandi þeirra Hannsesar Smárasonar, Bónusfeðganna og Pálma Haraldssonar í Fons hef ég verið bjargarlaus áhorfandi að gjörðum þeirra. Nú tapa ég mínum hlutum eftir þeirra prógrammi. Mér finnst ekki að hvorki Davíð né ríkið sé ræninginn í þessu máli.

Ég held því miður, að afstaða margra til almenningshlutafélaga muni breytast verulega og lengi eftir þessa dagaog að framtíð kauphallarviðskipta á Íslandi með hlutabréf almenningshlutafélaga verði seint söm aftur. Almenningur á hvergi að koma nálægt hlutabréfum því að ræningjarnir eru sífellt á kreiki til að rupla og eyðileggja. Ef íslenzk almennigshlutafélög lenda alltaf átölulaust í ræningjahöndum eða þá bara fífla sem setja þau á hausinn með tómri vitleysu þrátt fyrir ofurlaun sem séní, þá er varla hægt að búast við að almenningur treysti nokkru sinni aftur á slíkt félagaform.

Þá höfum við farið langan frá þeim hugsjónum sem hann Eykon trúði á og boðaði okkur fylgendum sínum í þá daga

Flokkur: Stjórnmál og samfélag | Facebook

Athugasemdir

Heyr heyr, mæl þú manna heilastur. Þarna stakkst þú á þeim kýlum sem gröfturinn leyndist í.

Við þurfum að innleiða áþekka löggjöf og t.d. bandaríkjamenn eru með sem taka á svona glæpamönnum. Þar eru menn kyrrsettir í keðjum í boði FBI ásamt fullu fæði og húsnæði í boði alríkisstjórnarinnar þar til mál þeirra eru full rannsökuð og dæmd. Þá fyrst er frystingu eigna og innistæðna þessara kóna aflétt - ef dómurinn gefur tilefni til. Hérna rjúka menn í einkaþotunum til útlanda með skottið fyllt af fjármunum almenningsfélaga án þess að nokkur spyrji þá óþægilegra spurninga á borð við þær sem þú nefnir, hvað þá að eignir og innistæður séu kyrrsettar, né rannsakendur settir í mál þeirra.

Hvað varðar hvítþvott þann sem Björgólfur vildi fá sér á Hafskipsmálið, er það að segja að Ragnar Hall sýndi fram á það í greinargerð sinni um daginn að þegar öll kurl voru komin til grafar og kröfur greiddar og eignum komið í verð að þrotabúið átti einungis um 20 % upp í kröfur. Þá var víst mikið af kröfum sem var vísað frá þar sem þeim var ekki nægjanlega lýst í búið eða of seint komnar fram, þannig að raunverulega var gjaldfærni búsins minni en 20 %. Björgólfur "gleymir" að framreikna gjaldþrotakröfuna í óðaverðbólgunni og því virðist sem að gjaldfærnin hafi verið meiri.

Þá segir sagan að Ingimar nokkur í JetX hafi kynnst Al Capone aðferðum af hálfu Björgólfsfeðga þá þeir voru í Rússíá forðum. Fróðlegt væri að fá af þeim málum fréttir ef sannar reynast.

Predikarinn - Cacoethes scribendi , 9.10.2008 kl. 23:43

Takk fyrir góðan pistil frændi.

Ágúst H Bjarnason, 10.10.2008 kl. 07:51

Sjá góða grein um Viðreisn lands og þjóðar eftir Ársæl Valfells hér.

Ágúst H Bjarnason, 10.10.2008 kl. 09:28

Kannski mislas ég áðan eða að Egill hefur leiðrétt. Greinin er eftir Ágúst Valfells. Yngri eða eldri?

Ágúst H Bjarnason, 10.10.2008 kl. 11:02

Þakka góðan pistil Halldór.

Ómar Bjarki Smárason, 10.10.2008 kl. 12:13

SVo var verið að gera grín að okkur og við kallaðir afturhaldsseggir og Ragnar púkó.

Ég er að fara að verða þreyttur á að hafa rétt fyrir mér um ,,eignir" félaga.

Hvenær í dauðanum fóru menn að setja inn ,,óefnislegar eigur" í efnahagsreikning ?

Svo er sprenghlægilegt, að horfa a´alla þessa gaura, sem trúðu á Breta og WC. þetta lið þarf áfallahjálp til að ná utanum RAUNVERULEGA SKÍTLEGT EÐLI BRETA.

Kaninn seldi þeim skít í formi Vöndla, nú er lyktin að verða óbærileg á Fleet street.

Þá ráðast þeir að okkur því þeir vilja dreyfa athyglinni.

Manstu hvað þeir sögðu um Landhelgisstríðinu

Bjarni Kjartansson, 10.10.2008 kl. 12:40

Sælir á ný. Set hér inn merkt innlegg Láru Hönnu þar sem hún setti 12 greinar Ragnars Önundarsonar.

Lára Hanna Einarsdóttir 11.10.2008

Ég safnaði greinunum eftir því sem þær birtust, átti allar nema eina í fórum mínum og setti þær inn í myndaalbúm hér á blogginu. Greinarnar eru 12, hver annarri athyglisverðari. Þær eru listaðar hér á eftir í dagsetningaröð ásamt útdrætti úr hverri grein. Smellið á nafn greinarinnar og haldið áfram að smella þar til læsileg stærð fæst. Ég minni líka á eldra viðtal Egils við Ragnar sem ég birti hér ásamt fleiri viðtölum.