Er hún Eva Káta ekki bara grínisti ?

Ég er eiginlega farinn að efast um hana Evu Kátu eða Joly.  Hún virðist hafa tíma til alls nema það sem við héldum að hún ætlaði að gera hér. Eftir að hún dúkkaði upp í Silfrinu hjá Agli og stökk eins og Pallas Aþena úr höfði Egils Seifs  inní hjörtu ráðvilltra stjórnvalda okkar, þá höfum við verið að bíða eftir að eitthvað gerðist.

Ekkert gerist nema það koma meldingar frá henni um að reka Valtý saksóknara af því að sonur hans vinnur í Existu. Má hún nokkuð vera að því að koma þessa tvo daga í mánuði sem hún ætlaði að koma hingað til að sækja milljónirnar sínar ?   Hún er  orðinn húsafyllisprófessor  uppí Skandinavíu milli þess sem hún situr á Evrópuþinginu.  

Stofnfjáreigendur í BYR voru prakkaðir til að leggja fram aukastofnfé í BYR uppá 30 milljarða. 10 milljarða fengu þeir til baka sem arð og rann sú upphæð sem innborgun á lánið í Glitni.  Skuldin fyrir restinni er  uppi í Íslandsbanka eða gamla Glitni, sem Jón Ásgeir átti þá.  Jón Ásgeir náði  30 milljörðum úr BYR og setti hann hérumbil á hausinní með  tapi uppá þá upphæð.

Bréf almennings eru núna verðlaus en stjórnin og stjórinn seldu sín bréf með stórgróða með svindli með MP-banka, Eseter Holdings og sjálftöku úr kassanum hjá BYR.  Bankaleynd, bankaleynd ! Og svo sitja þeir sem fastast í stjórninni útá svikið atkvæðaumboð.

Bréfin sem stofnfjáreigendur áttu eru að veði í bankanum Glitni sem Jón Ásgeir átti á þeim tíma. Þau verða núna  innheimt með því að Íslandsbanki hirðir þau fyrst á slikk eins og líklega var alltaf ráðgert. Svo verður hjólað í húseignir fólksins fyrir mismuninn.   Eina sem gekk ekki upp í dæminu hjá Jóni Ásgeir var að  hann missti Glitni í millitíðinni og líklega fer Byr á hausinn án þess að Jón fái nokkuð útúr honum. Bankaleynd, bankaleynd !  

Líklega vorum við stofnfjáreigendur bara hafðir að fíflum þegar við vorum heilluð af starfsmönnum BYRs og Glitnis til að kaupa þetta stofnfé með lánum frá Glitni og gróðavon. 

Murphy segir líka: It is immoral to allow suckers to keep their money. Og Murphy veit yfirleitt nokkuð hvað hann syngur. Líklega kann Jón Ásgeir  Murphys Golden Rule sem hljóðar svo: He who has the Gold makes the Rules.   

Þetta er kannski bara ímyndun ein hjá mér sem súrum og svekktum hálfvita. En maður hefur þá alltaf gaman að skrfa ævintýri á bloggið sitt eins og einskonar HosiAndersen.

Er hún Eva Káta  bara ekki að gera grín að okkur ? Er hún nokkuð svona sniðug eins og hún sagði okkur í gegnum miðilinn Egil ?  

 Jón Ásgeir og útrásarvíkingarnir voru þeir sem voru raunverulega sniðugir. Við og þjóðin vorum bara fíflin, þó að Davíð segist hafa vitað það allan tímann.

Allir okkar uppáhaldsglæpamenn ganga um prýðilega lausir og virðast hafa það fínt í útlöndum. Nægur tími til að raða pappírum eða hakka.  Fjármálaeftirlitið sefur sínum Þyrnirósarsvefni hvað svo sem stofnfjáraðilar í Byr æpa yfir þyrnigerðið um hjálp vegna stjórnarkjörsins. Sigurjón digri gerir grín  að okkur aulunum sem höfum trúað á gildi lífeyrissjóða. Já hann Murphy var ekki svo vitlaus.

Og líklega efast Eva Káta ekki um það  að reglur Murphys gilda allra best um Íslenska sparifjáreigendur. Og líklega ráðamenn líka.

 

Athugasemdir

[Jenný Stefanía Jensdóttir, 24.6.2009 kl. 02:51]

Já Halldór, umhugsunarvert.  Maður spyr sig, hvaða fjandans (ó)sýnulegu öfl, standa í veginum fyrir því að súrir og svekktir hálfvitar eins og ég og þú, fái uppreisn æru, fáum að leggjast í alvöru útrásar víking, réttlætis og skynsemi þegar "heilvitarnir" fá að skokka um prýðilega lausir og liðugir. 

Halldór, ég veit að þú ert skynsemin uppmáluð en  hver stjórnar þessu eiginlega?

[Dúa, 24.6.2009 kl. 09:35]

Hún er ráðgjafi við rannsóknina. Svo er allt annað mál hvort nokkkuð er farið að hennar ráðum. Það er ekki ýkja langt síðan tekið var viðtal við sérstakan saksóknara í tómri skjalageymslu. Ég ætla að vera paranojuð og halda að einhverjir og einhver öfl komi í veg fyrir almenninlega rannsókn.

[Bjarni Kjartansson, 24.6.2009 kl. 10:22]

Mjög tel ég það væri uppbggilegt fyrir Evu að sitja morgunlangt við eldhúsboðrið í húsi einu við Skerjafjörð og hlusta á hvað húsbóndinn þar hefur að segja(eða gæti haft að segja) um víkinga fyrr og nú.

Einnig tel ég það upplýsandi fyri rsömu Evu, að skoða frávísunardóma þeirra dindla sem við dómstóla okkar vinna, bæði í héraði og uppi við Arnarhól (spurning hvort þeir séu eins og álfar út úr sama hól).

 Annars, veistu hvað er í gangi hjá ,,einkaframkvæmdarmönnum" í Samgöngumiðstöðvar málinu?  Er það rétt að þeir krefjsit eignarhalds á flughlöðum up á 10Ha ??

Vonandi stoppa mínir fulltrúar í borgarstjórn slíkavitfirru.

Í afflugsbruni !!!!!

Meira seinna vinur

[DanTh, 24.6.2009 kl. 12:48]

Við skulum ávalt minnast þess, þegar þessi umræða er tekin, að fyrri ríkisstjórn gaf þessum glæpamönnum syndaaflausn. 

Ég tel ráðamenn fyrri ríkisstjórnar hafa sett þjóðina á sakamannabekk frami fyrir alþjóða samfélaginu, því ekki mátti leita sökudólga á efnahagshruninu.  Þannig veittu stjórnvöld spunameisturum þeirrar svikamyllu sem að lokum leiddi til hrunsins, skjól í faðmi  sínum. 

Núverandi stjórn er sama ræfils ómyndin og fyrri ríkisstjórn í þeim efnum.  Hún hefur nefnilega enn ekki haft dug né kjark til að fara gegn þeim öflum sem hér frömdu einn mesta efnahagsglæp sögunnar.  Þess í stað leitar hún allra leiða til þess að senda okkur landsmönnum reikninginn fyrir efnahagsbrotum þeirra. 

Ég tel menn ættu að gæta varhug við þeim öflum sem stöðugt reyna að gera Evu Joly  tortryggilega sem ráðgjafa í þessu máli.  Það hentar mjög vel þeim sem vilja hindra framgang þess réttlætis sem þjóðin krefst.  Það er augljóst að það er róið öllum árum að grafa undan trúverðugleika og heillindum hennar í hennar starfi.  Ég vona að hún þrauki með okkur en láti ekki eiturnöðrurnar hrekja sig á brott. 

Okkar og hennar kappsmál er að þeir sem leiddu þessa ógæfulegu svikamyllu yfir þjóðina, verði dregnir fyrir dóm og gerðir persónulega og fjárhagslega ábyrgir fyrir gjörðum sínum.

Hagkerfi heillar þjóðar hefur verið eyðilagt af fámennum hópi manna sem eru þegnar þessa lands.  Ég spyr mig þeirra spurningar, hvað þarf að fremja stóran glæp gagnvart þessari þjóð til þess að hann megi flokkast undir landráð? Ég tel þessa menn, landráðamenn.  Í þann flokk falla forsvarsmenn bankanna og þeir stjórnmála og embættismenn sem tengdust þessu með einum eða öðrum hætti.

[Einar H. Björnsson, 24.6.2009 kl. 14:45]

Það er alltaf gaman að lesa bloggið þitt Halldór, það er einhver ferskleiki yfir skrifum þínum sem gerir þau skemmtileg.  Lýsingar þínar á "afrekum" fyrri stjórna með einkavæðingu bankanna og óbilandi trú á útrás "viðskiptajöfranna" og hinu íslenska efnahagsundri eru alveg frábærar.

Leitt er að lesa að þú sjálfur hafir verið fórnarlamb í BYRs málinu, en þú varst nú ekki einn um það.  Hinir bláeygu stofnfjáreigendur létu blygðunarlausa bankabófana plata sig illilega.  Ekki furða þótt þú sért súr og svekktur, en hálfviti ert þú ekki - þótt þú verjir Gunnar I. Birgisson fram í rauðan dauðann.  Hinn pólitíski kompás þinn bara skakkur - spurning hvort hægt sé að stilla hann af.

Að allt öðru.  Nú er laxveiðivertíðin að hefjast og ég sá í athugasemdum við blogg frúarinnar á Torfastöðum í Biskupstungum, að þú ert ekkert hrifinn af þessu hafbeitarævintýri sem þar fer fram.  Þau eru nú ekkert ódýr veiðileyfin hjá Lax-á, tæpar 80.000,- dagurinn á "prime time".  Er hægt að kaupa veiðileyfi hjá ykkur á Bergstöðum fyrir minni pening?  Heldurðu að þessi á verði einhvern tíma sjálfbær með 98% veiðiálagi ofan Faxa, eins og var á sl. ári?  En frúin á Torfastöðum kýs þögnina.

[Halldór Jónsson, 24.6.2009 kl. 15:39]

Jenný, á heimasíðu DanTh er kannski að finna skýringu. Fjölmiðlarnir eru enn í eigu víkingaliðsins og skrifa því þeim þóknanlega. Þetta er sérstaklega áberandi á Fréttablaðinu þar sem skoðana Jóns Ásgeirs er gætt ágætlega en ég les helst ekki DV af ýmsum ástæðum, ma. vegna þess hversu skítlegir þeir kókfeðgar hafa verið í garð vinar míns Gunnar Inga sem ekki hefur gert þeim neitt. 

Nei Einar minn, við erum nú ekki svo siðlausir á Bergstöðum að selja veiðileyfi heldur reynum við að trufla Lax-á sem minnst þó við bleytum færi stökum sinnum eigendurnir.

Við veiddum raunar jafnvel meira áður en Lax-á og Drífa eyðulögðu lífríki árinnar með leyfislausu hafbeitarverkefni sínu og yfirgangi .  Við erum að reyna að verjast þessu liði sem ætlar að valta yfir okkur, hvernig sem það svo fer.

Satta að segja hefur þetta Tungna-lið, með Drífu fremsta,  vaðið áfram með þvílíkri heimsku gagnvart Lax-á að undrum sætir.

 Þeir samþykktu strax eftir tillögu Margeirs oddvita að afsala sér öllum tekjumöguleikum til frambúðar í hendur Lax-á og borguðu sjálfum sér út félagssjóðinn þannig að nú er ekki einu sinni til fyrir frímerkjum. Því Lax-á borgar auðvitað ekki neitt fyrir afnotaréttinn af ánni.

Þú verður bara að borga þinn hundraðþúsundkalla hjá þeim ef þú vilt veiða í Tungufljóti.

[Elle_, 24.6.2009 kl. 17:35]

Eva Joly hefur sjálf sagt að þeir sem vilja hefta rannsókn glæpa ráðist oft að rannsakendum glæpanna.  Ljótir og rangir hlutir hafa verið og munu verða sagðir og skrifaðir um Joly og hina rannsakendurna af þeim hópi.  Eva Joly ætti að mínum dómi að stýra glæpa-rannsókninni.  Kennum heldur yfirvöldum um að rannsóknin gangi ekkert.   Þeir voru með hlægilega undirmannað embætti rannsakenda við vinnu við rannsóknina.  Og vil taka undir með DanTh.

[Elle_, 24.6.2009 kl. 17:44]

Og vil líka segja að ég held ekkert að Halldór vilji hefta rannsóknina þó hann sé kannski farinn að efast um Eva Joly.  Halldór skrifar oft stórkostlega pistla og sem ég les oftast.

[Einar H. Björnsson, 24.6.2009 kl. 23:28]

Halldór minn, ég sagði þetta með veiðileyfin í Tungufljótinu meira í hálfkæringi heldur en alvöru.  Annars sá ég eftirfarandi klausu hjá litlum veiðiklúbb sem heldur úti bloggsíðu.

"Þótt langt sé liðið á september eru menn enn að berja á laxinum enda fiskur enn að ganga af fréttum að dæma. Allavega fór Saxi við annan mann í Tungufljót í Biskupstungum um helgina og þeim gékk bara nokkuð vel. Átta laxar enduðu á landi auk þess duttu nokkrir af en það sem vakti mesta athygli er að um hádegi mætti gengi á stígvélum á austurbakkan með þunga spúna og grýttu ótt og títt yfir flugulínur okkar manna enda gáfust þeir upp og pökkuðu saman. Þetta mun vera sama svæði og Björninn var að veiða í sumar.
Maður hélt að það væru veiðifélög í öllum ám og einstakar jarðir gætu ekki veitt/selt upp á sínar eigin spýtur!??"

[Halldór Jónsson, 24.6.2009 kl. 23:51]

Já Einar minn,

Við á Bergstöðum höfum orðið að þola stanslausan ágang veiðimanna frá Lax-á, sem ryðjast yfir okkar land í leyfisleysi. Þetta gengi getur alveg eins hafa verið frá þeim eins og okkur. Eða hvaða lið sem er, því menn ryðjast yfir land annara eins og ekkert sé bæði til gæsa og laxveiða. Við höfum bara ekki haft afl til að verjast þessu.

[Halldór Jónsson, 24.6.2009 kl. 23:59]

Já og EE Elle, ertu þú ekki hefðardama ?Af hverju hefurðu þessa leynd ?  Allavega þakka ég þér fyrir hlý orð í minn garð og það gleður mig ef einhver hefur gaman að lesa mín skrif. Nei ég vil sko ekki hefta rannsóknir en finnst hafa verið heldur dusilmannlega staðið að þeim.

Ég ber bara saman hvað tökum Enron-gæjarnir voru teknir vestanhafs fyrir svipaðar sakir. Þar fá menn krómarðar manséttur strax og hótelpláss og fá ekkert að hafa lambhúshettur yfir hausnum eins og hér tíðkast við handtökur og réttarhöld.  

[Halldór Jónsson, 25.6.2009 kl. 00:05]

Félagi Bjarni

Nei ég veit ekkert hvað er í gangi í þessari flugstöðvarvitleysu. Könnunin mín er að stabílisérast í 86 % fylgi við Reykjavíkurflugvöll, þannig að þín aðflutta dreifbýlisafstaða um að loka vellinum er í algerum sérvitringaflokki.

Það þurfa fleiri en þú að lenda hér eftir flóttanna af landsbyggðinni. Þú mátt ekki loka vellinum fyrir þeim þó að þú sért lentur úr þinni ferð.  

Annars er ég til í að fljúga með þér af Reykjavíkuirflugvelli ef þú átt aur afgangs í benzín til að sýna þér hver dýrð og dásemd þessi völlur er - perla Reykjavíkur !

[Halldór Jónsson, 25.6.2009 kl. 00:12]

Dan Th, ekki veit ég hver þú ert frekar en EE elle. Mér finnst að þið eigið ekkert að vera að fela ykkur á bal við sinhver nöfn. þið eruð alltof skýr til þess að vera svona í feluleik. Ég tek undir þriðju málsgrein þína af heilum hug.'+

Ég er alls ekki að því sem þú segir í 4. málsgrein um Evu Joly. Ég hefði sjálfur farið öðru vísi að ef ég hefði mátt ráða rannsókn málsins. En ég bara ræð engu.

Samkvæmt 6. málsgrein viltu beita þá landráðadómum. Er það svona afgreiðsla og Norðmenn sýndu Quisling eða viltu senda þá í betrunarvist á Snæfellsnes ?