ESB-heppni Spalar

er eins og himnasending í þessu kreppulandi þar sem endalaust er hægt að skrúfa og kreista þrautpíndan lýðinn.

Nú þegar Spölur er að nálgast enda þess tímabils sem maður hélt að hann hefði til að klára að greiða lánin sín og afhenda þjóðinni göngin eins og þá var talað, þá kemur ESB með þá himnasendingu að ekki megi gefa nema 13 % afslátt af veggjöldum. En 70 % veggjalda í Hvalfjarðargöng eru á miklu meiri afslætti en það. Mikill minnihluti borgar fullt gjald hvað þá mínus 13%. Nú má græða og leggja í kistur fyrir t.d.nýjum göngum.

"Gaman, gaman,sendu meiti peninga" setti Tolli í skeytið til yfirboðarans eftir fyrsta kvöldið í Kjöben. Allir sem segjast vera á móti ESB eru ávallt reiðubúnir að skjóta sér á bak við tilskipanir sambandsins ef þær geta gagnast til að snúa upp á náungann. Sorrí-Stina !, þú verður að borga meira vegma ESB. RARIK-Orkusalan, Orkuveita Reykjavíkur,Seðlabankinn-Fjármálaeftirlitið,Olíufélögin, Bankarnir, Sýslumenn,Eftirlitisiðnaðurinn, Flugmálastjórn, Spölur. Allir geta notað þessa dásemd ESB sem þjóðin vill ekki til að skrúfa náungann og skrúfa. Bara ekki ég og aðrir aumingjar þessa lands.

Heppni fyrir þetta þotulið að geta skotið sér á bak við hana ESB-frænku.

Vegarykið

sem var á öllum vegum landsins í gamla daga hefur minnkað með tilkomu olíumalarinnar á flestum vegum út um landið. Ýmsir fáfarnir vegir hafa fengið slitlag meðan aðrir bíða. Hvaða lögmál ræður geta menn dundað við að skýra, en líklega hefur þingmannadugnaður og atkvæðamisvægið eitthvað að segja.

Ég bý að hluta við Bræðratunguveg frá gömlu Tungufljótsbrú að nýja Flúðaveginum. Þessi spotti er mikið keyrður og hvenær sem er þurrt þá stíga rykmekkrinir til himins eins og í gamla daga og leggja sig yfir ferðamannaáninguna við Faxa.

Ég leitaði svara hjá Vegagerðinni hvort þetta gæti borgað sig að sjá allan ofaníburðinn hreinsast af veginum með þessum hætti þegar þurrt er og þegar rignir kemur þvottabretti svo hart að rútur geta ekki keyrt veginn. Ég gæti alveg verið rólegur var svarið, þetta hefur ekkert að gera með skynsemi. Peningaleysið og niðurskurðurinn væri orsökin

Ég fékk þær upplýsingar að þessi spotti minn yrði líkast til ekki lagfærður á minni lífstíð. Slíkt væri peningaleysið og niðurskurðurinn. Voila.

Rykbinding var mér sagt kostar 3 tonn af salti á kílómetrann og svo vinnan til viðbótar. Þó endingin sé varla nema 1-2 mánuðir, þá væri þetta þó skárra yfir blásumarið á þessum stað.Kostnaður yrði kannski hálfmilljón á kílómetrann yfir sumarið. Heflun og stöðugur ofaníburður á þenna veg hlýtur að kosta talsvert á hverju ári sem kæmi til móts við þetta.

Alvöru Klæðning á vegi kostar hinsvegar 10 sinnum meira. En dugir þá mörg ár væntanlega og kostar 5-6 milljónir á kílómetrann.

Ættu Íslendingar ekki að setja skyldubúnað í alla bíla sem skuldfæra fyrir aðgang að öllum jarðgöngum landsins þegar þau eru keyrð? Þá má leggja niður hliðið í Hvalfjarðargöngum og rukka fyrir Héðinsfjarðargöng, Vestfjarðargöng, Norðfjarðargöng, Vaðlaheiðargöng. Sáraeinfaldur og ódýr búnaður eins og SunPass í Ameríku skuldfærir smáupphæð fyrir hverja notkun á Visakortið. Í staðinn fá menn vegabætur og jarðgöng fyrr en ella.

Af hverju má þá ekki reyna eitthvað nýtt? SunPass kerfið getur meira að segja hleypt tilteknum Framsóknarmönnum og öðrum minnihlutahópum í útrýmingarhættu gratís í gegn ef menn telja það nauðsynlegt. En "Grimsby-lýðurinn" verði látinn borga eins og fyrri dagnn og standa undir framkvæmdunum.

Annars hafa menn bara vegarykið áfram.

Skíthrædd !

eru þau greinilega orðin skötuhjúin Steingrímur J. og Jóhanna að Landsdómur verði notaður á þau sjálf þegar þau fara frá. Ekki er að efa að hægt er að semja langa syndalista á Steingrím að minnsta kosti sem hann getur dundað sér við afneita næstu árin. Honum er ekki vandara um en Geir Haarde. nema sakir á Steingrím eru knallharðar staðreyndir í krónum og aurum en ekki huglægt mat eins og í tilfelli Geirs.

Nú ganga allskyns ráðstefnur, fundir og ályktanir um það að rétt sé að leggja Landsdóm niður úr því að búið er að brúka hann á íhaldið. Þessi furðulegi saksóknari Alþingis gengur um og skammar dómendurna fyrir að hafa ekki réttað betur og harðar yfir Geir.

Margt finnst mér benda til þess að þetta sé skipulagður áróður af hálfu skötuhjúanna Jóhönnu og Steingríms til að snúa upp á réttarkerfi landsins sér í hag þegar þægilegir þingmenn verða ekki lengur til að passa þau.

Þau eru greinilega skithrædd um að búmerangið geti komið í andlit þeirra sem köstuðu því.

Örvita Alþingi

er það sem manni finnst blasa við þegar maður horfir agndofa á aðfarir vinstri meirihlutans á Alþingi.

Nú er fimbulfambað um gerbyltingu á stjórnaráði Íslands, Það á ekki að fækka opinberum starfsmönnum eða spara í einu eða neinu: Allt verður við það sama og í húsakosti og hefðartildri. Það er verið að búa til ný nafnspjöld á hurðir og hús og flækja skipurit sem hafa þá einu afleiðingu að enn færri vita hvað á að gera og ótal tækifæri skapast til að vísa málum fram og til baka án afgreiðslu. Og þótti þó mörgum ærin ruglandin fyrir.

Svo er eytt tímanum í breytingar á fiskveiðistjórnun sem allir aðspurðir hafa sagt að séu hrein vitleysa í besta falli og óundirbúin. Og svo á að setja á þjóðaratkvæðagreiðslu um spurningarnar um stjórnarskrá í haust sem hver viti borinn maður sem skoðað hefur finnast þær út í hött og ósvaranlegar hvað þá brúklegar til nokkurs hlutar fyrir þjóðina. Vanti stjórnarskrárbreytingar er það Alþingis að setja þær fram. Þetta búsáhaldabyltingarþing var hinsvegar gersamlega ófært um slíkar athafnir og lét það því í undirverktöku útí bæ.

Það er eins og þetta Alþingi sé að keppast við að setja lög og reglur útí bláinn eins og allri sögu þjóðarinnar verði lokið þegar valdatíma þess lýkur á næsta ári. Hitler hélt líka í byrginu sínu 1945 að saga þýsku þjóðarinnar væri á enda og gaf út skipanir í samræmi við það sem menn brosa skiljanlega að í dag.

Það verður verk sem bíður nýs fólks og nýs Alþingis að sópa vitleysunni sem runnið hefur frá þessu aumasta Alþingi lýðveldisins útaf borðinu og byrja upp á nýtt á raunhæfum ráðstöfunum.

Fjögur ár í framarasókn þjóðarinnar eru farin í vaskinn og fjármunum hefur verið brennt í dellur og drauma örvita fólks sem ætlar að gerbylta Íslandssögunni á þeirri örskotssund sem það situr á þessu örvita Alþingi.

Hversvegna þjóð?

hefði manni kannski getað dottið í hug að spyrja sig þegar Egill Helgason fékk Manuel Hinds til að taka undir með sér að rakka niður íslensku krónuna. Ísland væri svoddan örþjóð með örmynt og greiddi þessvegna hærri vexti en aðrir. Þessi örþjóð sem kemst fyrir í einni blokk á Manhattan og leiðari Morgunblaðsins gerir að umtali í dag á snilldarlegan hátt.

Vissulega getur umræðustjóri ríkisins hann Egill Helgason fengið marga viðmælendur sína, bæði "vitleysinga og hagfræðinga" til að undirstrika skoðun sína á smæð Íslendinga og nauðsyn alþjóðavæðingar. En ætti hann þá ekki sjálfur að hætta með Kiljuþáttinn sinn um leið?. Því hvað hefur örþjóð að gera með eigið mál og bókmenntir þegar allir kunna ensku?

Hjá þjóðinni gengur önnur síbylja sem er orðin næsta þreytandi þó að Agli sé ekki einum um að kenna. Er þessi sífelllda vaxtaumræða ekki farin að tröllríða þessi þjóðfélagi? Það er eins og öll tilveran snúist um að taka lán á lán ofan og stynja svo þegar á að borga til baka? Öllu máli skipti hver sé vaxatprósentan á lánunum? Örlán, hraðpeningar, íbúðalán, Visa-raðgreiðslur, Lán og aftur lán. Ekki hvort greiddir séu vextir á sparnað? Enginn virðist sjá samhengið í því að erlendir peningar streymdu til landsins í hávexti Seðlabankans og núverandi hættu á að þeir vilji fara til baka í alþjóðlega vaxtaleysið? Af hverju komu þeir hingað? Hvað þarf til að fá þá vera um kyrrt?

Heill söfnuður manna undir sjálfskipuðum kórstjórum hrópar á verðtrygginguna burt. Kórinn veltir ekki fyrir sér hvaðan peningar eiga að koma. Þetta fólk ætti hugsanlega að lesa bók eftir Njál Ferguson um tilurð peninganna. Það myndi þá frekar gera sér grein fyrir því hver vilji lána þeim sína peninga án þess að eiga von í að fá þá til baka og hversvegna.

Það hrópar ekkert af þessu fólks um það hvernig eigi að verðtryggja sparnað svo að eitthvað fé myndist i sjóðum. En án sparnaðar einhverra er ekkert hægt að lána út. Og af hverju eiga sparendur skilyrðislaust að tapa? Jú Murphy segir það í lögmálum sínum að það sé siðlaust að láta bjálfa halda fé sínu. Og Murphy hefur yfirleitt rétt fyrir sér.

Júlíus Björnsson subprimelánagúrú og Jón Magnússon í verðtryggingarkórnum eru löngu búnir að reikna ú hvernig hægt sé að lána peninga þannig að þeir tapist hratt og örugglega og íþyngi ekki lántakendum um of. Júlíus skilur það hinsvegar betur en Jón að allur peningur heimsins rýrnar eftir ákveðnu lögmáli hvort sem hann heitir króna, pund eða dollari og það hefur áhrif á lánskjör. Til dæmis hefur dollarinn tapað sem nemur 85 centum af sér síðan Nixon afnam gulltrygginguna fyrir margt löngu. Og 98 centum af dollara Roosewelts.

Örþjóð, með örmál, og örkrónu. Af hverju á hún ekki bara að leggja niður tunguna, bókmenntirnar og krónuna, friða hvalinn og refinn og ganga í ESB ?

Hversvegna erum við að reyna að vera þjóð?

Hvað er kvartmilljarður?

milli vina?

Nokkrir hinna vitlausustu þingmanna sem setið hafa á Alþingi á lýðveldistímanum hafa nú sameinast um að leggja Sjórnlagaráðstillögurnar í ráðgefandi þjóðaratkvæði 20. október. Kostnaðinn áætla þeir 250 milljónir. Þá hefur ekki verið tekið tillit til pí-faktorsins, sem er margföldunarstuðull á allar fjárhagsáætlanir þingmanna af vinstra vængnum.

Sjálfsagt finnst þessu liði þessi fjárhæð lítil miðað við þann árangur sem þeir telja sig ná fram. Sem er gersamlega hulinn venjulegu fólki enda kynntar spurningar svo margræðar og órökréttar að enginn árangur verður af þessu brölti.

Þingmenn stjórnarandstöðu vinna því vel fyrir þjóðina með því að koma í veg fyrir þessi áform með filibuster ef með þarf. Enda er ekki ólíklegt að velvilji Jóhönnu sé tryggur í þessu máli þar sem þetta er greiðsla hennar til Hreyfingarinnar fyrir stuðninginn. Og bros hennar mun verða sem hjá Goðmundi á Glæsivöllum þegar Þór Saaari furðar sig á hvað illa gangi að koma málinu hans fram eins og fyrri daginn. En hans mál er ekki hægt að selja á uppboði eins og mál Jóhönnu. Lincoln sagði að það væri hægt að plata marga oft en aldrei alla alltaf. Nóg um það.

20. október! Kvartmilljarður í kosningabaráttu? Þá verður farið að hilla verulega undir betri tíð með blóm í haga hjá þessari þjóð.