Halldór Jónsson

14.3.2010 | 20:01

Mogginn í sókn !

Ég rakst á skarplega færslu hjá Vilhjálmi Eyþórssyni. Ég leyfi mér að undirstrika kafla úr skrifi hans um fjölmiðlana og Morgunblaðið:

"Tjáningarfrelsið landinu hefur nú verið bjargað. Loks virðist aftur vera kominn alvöru fjölmiðill. Eitt blað sem talar máli almennings í landinu og er eins og flestir sæmilega réttsýnir og skynsamir menn bæði á móti Icesave og Evrópubröltinu......

Ég fæ ekki betur séð en að löngu niðurlægingartímabili Morgunblaðsins sé nú lokið með aðkomu nýrra manna að ritstjórn blaðsins. Það virðist aftur vera að verða það sem það einu sinni var: Lang- marktækasti fjölmiðill landsins. Og ég er hér ekki einungis að tala um pólitík. Ég man það líka vel frá þeim árum sem ég skrifaði Íslenskan annál að Mogginn var nánast alltaf með bestu og lang- áreiðanlegustu fréttirnar og frásagnirnar, jafnvel þótt pólitískir andstæðingar ættu í hlut. Að sjálfsögðu er ekki hægt að búast við algeru hlutleysi af neinum fjölmiðli. Slíkt eru einungis draumórar, sæmandi einfeldningum. Mogginn var samt alltaf langbestur, víðsýnastur og marktækastur íslenskra fjölmiðla. En á þessu varð breyting á síðari árum. Þetta gerðist hægt og hægt, kannski þegar Matthías Johannesen hætti ritstjórn, kannski síðar, en vinstrisinnaðar kjána- áherslur urðu smám saman æ meira áberandi á síðum blaðsins. Þetta náði kannski hámarki á Mbl.is þegar núverandi formaður Blaðamannafélagsins hafði þar völdin, en fréttaflutningur hennar var nánast ógreinanlegur frá Þjóðviljanum gamla. Raunar var Mogginn orðinn, undir fyrrverandi ritstjórn líkastur Þjóðviljanum eins og hann var orðinn síðustu árin, rétt áður en hann dó, eitthvað allt allt annað en við, gamlir vinir og stuðningsmenn blaðsins áttum að venjast......

Ég þekki Davíð Oddson ekki neitt en mér hefur alltaf litist vel á manninn og verið honum sammála í flestum málum. Hann virðist þó fara í taugarnar á mörgum, svipað og Ólafur Ragnar Grímsson fer gífurlega í taugarnar á mér eins og stundum hefur komið fram á þessari síðu. En því ber að fagna að Davíð og samverkamenn hans eru nú að endurreisa Moggann og færa hann aftur upp í þann virðingarsess sem honum ber meðal íslenskra fjölmiðla."

Ég vil lýsa þeirri skoðun minni, að það er eins og bera saman gamla Tímann og Þjóðviljann og Morgunblaðið í þá daga að bera saman Fréttablaðið núna og Morgunblaðið. Baugstíðindum er haldið upp gjaldþrota af Samfylkingunni þrátt fyrir milljarðaóreiðuskuldir útgefendanna bara af þeirri flokksþjónkun og ríkisstjórnarstuðningi sem blaðið sýnir. Baugsveldið kyndir blaðið upp með auglýsingum eins og ekkert hafi í skorist og heldur því uppi. Blaðið er annars hundleiðinlegt og miklu ljótara en Mogginn í alla staði. Langflestir skríbentar eru þar vinstrisinnar, besserwisserar og evrópubandalagsagítatorar og eiga það sameiginlegt að hata Sjálfstæðisflokkinn, Morgunblaðið og Davíð Oddsson í þeirri röð.

Ég veit ekkert hvernig Mogginn gengur fjárhagslega, ég vona bara að hann gangi áfram. Það yrði algert svartnætti í þjóðlífinu ef rödd Morgunblaðsins eins og hún er núna héldi ekki áfram að hljóma í landinu. Rödd Davíðs er rödd skynseminnar á þeirri öld fíflsins sem við nú lifum.

Mogginn er í sókn !

Flokkur: Stjórnmál og samfélag | Facebook

Athugasemdir

Ég þakka. Mogginn er vissulega ekki fullkominn fremur en önnur mannanna verk, en hann ber nú af, ekki síst í ljósi þess að nánast allir aðrir fjölmiðlar eru nú í höndum vinstri manna og/eða Evrópu- kjána. Langflestir fjölmiðlamenn fá raunar launaumslagið sitt beint úr vösum Baugs- forkólfanna, en afgangurinn er hjá RÚV. Hljóðviljinn gamli er nú þar einnig kominn yfir í sjónvarpið eftir að fréttastofan þar var sameinuð. Svo undarlegt sem það kann að virðast er yfirgnæfandi meirihluti landsmanna bæði á móti Icesave- og Evrópu- bröltinu en þetta endurspeglast ekki í neinum fjölmiðli öðrum en Mogganum.

Aðeins einn falskur tónn heyrist í allri þessari sinfóníu, rödd segir það sem flestir eru sammála um ef marka má skoðanakannanir: Mogginn.

Vilhjálmur Eyþórsson, 14.3.2010 kl. 20:56