Baugspenninn

Guðmundur Andri Thorsson misbeitir skörpu stílvopni sínu í dag á síðum  hins gjaldþrota fjölmiðlaveldis Bónusfjölskyldunnar. Hann minnir eiginlega allnokkuð á hundinn sem situr fyrir framan lúðurinn  á myndinni af glymskratta Edisons, þegar hann hættir að skrifa vitrænt og fer að hræra steypuna fyrir boðskapinn úr lúðrinum.

Grípum niður í ritsmíð dagsins:

"....vitnis um þá mannkosti sem þrátt fyrir allt kunna að leynast með þessari þjóð.

En það er eitthvað að okkur. Djúpt og rótgróið í íslenskri menningu er eitthvað sem kom þessu samfélagi í koll - eitthvað sem lýsir sér í því að matreiðslumenn af öllu fólki skuli halda keppni í því að borða hratt og tilfinningalaust. Ástæðan er ekki sú að hér sé vont fólk upp til hópa. Þetta er ekki endilega "ógeðslegt þjóðfélag" eins og gömlu ritstjórarnir hvæsa á okkur með reglulegu millibili; við vorum ekki öll partur af gjörspilltu valdakerfi Sjálfstæðisflokksins með sínum Davíðsarmi og Björgólfsarmi, LÍÚ-armi, bændaarmi, Existaarmi, Baugsarmi og FL-armi og guðmávita hvaða öðrum örmum óteljandi, svo að á endanum var flokkurinn eins og kolkrabbi með parkinsonsveiki, stjórnlausir og samanflæktir armarnir að slettast um allt og brjóta í leiðinni og bramla allt sem brotnað gat. Við erum ekki öll glæpamenn eða hugsanlegir glæpamenn, ekki einu sinni öll "meðvirk".

Hann byrjaði að skrifa um siðleysi kappáts í hamborgurum og niðurstaðan er sú sem ég hef feitletrað hér að ofan. Kappátið er beintengt Sjálfstæðisflokknum maðksmognum af glæpamannaörmum þvers og kruss. Klykkir svo út með Faríseahugsun sinni um hversu hann þakkar Guði fyrir að vera ekki eins og þeir.

Í raun og veru er þetta niðurlag rithöfundarins svo heimskulegt, að það er varla hægt að hafa orð á þessu. Ég get reynt að virða honum það til vorkunnar ef þetta hefur komið svona orðrétt úr lúðrinum og hann sé bara að sýna húsbóndanum að hann er að vinna fyrir molunum  sem hrjóta til þeirra  leigupennanna á Fréttablaðinu af borðum erkifeðganna.

Það er langur vegur að mér hafi ég fundist ég vera staddur í hópi 1500 glæpamanna á landsfundum Sjálfstæðisflokksins til þessa.  En Guðmundur Andri Thorsson er auðvitað skyggnri öðrum mönnum og hefur séð þetta betur en ég allt saman án þess þó að hafa  nokkru sinni séð Ólaf kóng né heyrt.

Megi hin hræðilega Parkinsonsveiki sneiða hjá þessum  Baugspenna alla tíð.

Athugasemdir

[Árni Gunnarsson, 27.9.2010 kl. 10:20]

Ég las þennan pistil sem er óvenju beinskeyttur og líkaði vel. Mér sýnist að þú sért að túlka þarna eitthvað sem þú telur að maðurinn hljóti að hafa meint.

Hvergi sé nein merki þess að verið sé að skrifa frá herbúðum Baugs enda má öllum ljóst vera að á þeim bænum var meinlætalifnaður ekki stundaður með neinum áberandi tilburðum.

Hinsvegar má vel ræða um ofát, kappát og ólympíska drykkjusiði á Íslandi nútímans.

Og sú neysluhyggja sem innleidd var sem pólitísk framtíðarsýn af ármönnum kapítalisma og frjálshyggju sem hvorutveggja fór úr böndum vegna skorts á öllu eftirliti varð okkur lítil gæfa að ekki sé fastar að orði kveðið.

Og mér finnst það fallegt af Guðmundi Andra að benda þó á að þessi lýsing sem hann dró fram sé ekki algild lýsinga á atferli þessarar þjóðar.

En svo er þarna í Baugstíðindum önnur grein og síst verri.

Hún er eftir Sverri Björnsson hönnuð og ber titilinn:

Sjópróf á gullskipinu?

[Halldór Jónsson, 27.9.2010 kl. 10:43]

Ekki batnar þér mikið Árni minn eða kommatittunum ef þér finnst þetta fallegur pistill að nota Parkinsonsveikina til að ausa skít yfir hinn góða og heiðarlega stjórnmálaflokk Sjálfstæðisflokkinn.

Ég held að þú skiljir hvorki upp né niður í hugtakinu frjálshyggja eins og þú notar orðið. Og víst held ég að það sé ekki tilviljun að menn skrifi svona skít um Sjálfstæðisflokkinn og Davíð Oddsson til að þóknast húsbændunum. En vel er maðurinn stílfær, það viðurkenni ég.

[Halldór Jónsson, 27.9.2010 kl. 10:53]

Niðurlagið á tilvitnaðri grein hjá þér endar svona:

" Þó að við farþegarnir höfum allir verið viti okkar fjær í villtu geymi í borðsalnum að fagna gullfundinum þegar slysið varð, eigum við rétt á því að allt málið sé rannsakað og dæmt ef sök er til staðar. Allir um borð hafa þurft að fara í gegnum ef og hefði í sinni prívat innri endurskoðun og þurft að taka afleiðingum gjörða sinna. Ekki er til mikils mælst þó stjórnendurnir geri það líka. Þar sem þeir voru í opinberum embættum þarf að gera það opinberlega.... Gleymum því ekki þó allnokkrir farþegar á fyrsta farrými hafi bjargað miklu af sínu þá misstu þúsundir allt. Tjónið er stórt og snertir alla, því okkar bíður að gera skútuna upp með miklum tilkostnaði."

Þú varst í geyminu á farrýminu og dansaðir í kringum gullkálfinn. Það má áfellast skipstjórann fyrir að hafa ekki uppgötvað að það voru ótíndir glæpamenn sem hann hafði sleppst lausum við borverkið í lestinni. Við hinir skipreika berum skaðann en glæpamennirnir fluttu bara til London eða reka skipa-og flugfélög í umboði nýju bankanna sem auglýsa grimmt í fjölmiðlunum um ágæti sitt. Þjóðin á skilið að vera kjöldregin fyrir þá heimsku sína að kjósa þetta lið sem nú situr á Alþingi og dundar sér við tilgangslausan fíflagang.

[Árni Gunnarsson, 27.9.2010 kl. 12:19]

Halldór Jónsson. Ég á ekki nema svona hálfa spönn eftir til að þurrka þig út af bloggvinalistanum mínum.

Nú tókst þér með andskotans prakkaraskapnum að láta mig hlaupa á mig með því að taka þig alvarlega í þessum ólánspistli. Auðvitað áttaði ég mig ekki á þessu fyrr en þú fórst að ávíta mig í tengslum við kommatittina. Og bættir svo úr! með því að vitna um  hinn góða og heiðarlega Sjálfstæðisflokk!

Þó sárnaði mér ekki að ráði fyrr en þú rifjaðir upp allan niðurlægjandi dans minn kringum helvítis gullkálfinn á útrásarskeiði þjóðarinnar.

Reyndar var hann kannski óþarflega tilkomumikill enda er ég næstum fatlaður af harðsperrunum.

En út af þessum kommatittum að ógleymdum þá líka frjálshyggjutittunum margnefndum. 

Þá kemur mér enn í hug viðureigng kóngsins manna á Bessastöðum og Jóns tittlings frá Ingveldarstöðum á Reykjaströnd og föður Björns annálaritara á Skarðsá.

Benedikt frá Hofteigi (kommúnisti eða anarkisti?) lýsir þessari viðureign í bókinni "Íslenski bóndinn" og lýkur henni með eftirfarandi orðum:

"Engum hefði komið til hugar að kalla kóngsins fóvita á Bessastöðum tittlinga. Til þess voru þeir allt of miklir tittlingar."

(endursagt eftir minni)

En ég tek undir ályktun þína um heimska kjósendur og verðskuldaða refsingu. 

Þar fór ég að minni venju innanhallt við alfaraleiðir og kaus Borgarahreyfinguna og skammast mín nú líklega minna en margir aðrir.

Sítrón á allt þetta lið!

[Árni Gunnarsson, 27.9.2010 kl. 12:37]

Tvær athugasemdir verða að vera á móti tveim:

Norræn velferðarstjórn Íslands tók hrakta skipshöfnina og ók með hana austur í Þórsmörk til aðhlynningar.

Rútan festist í miðri Krossá sem var í miklum hagvexti og þar situr hún enn.

Á öðrum bakkanum stendur björgunarsveit frá AGS og á hinum björgunarsveit frá ESB.

Báðar miða nú llinubyssum að rútunni en þegar að er gáð þá er björgunarlína í hvorugum skutlinum.

Önnur er hlaðin með kjarnaeldflaug en hin með napalmsprengu.

[Halldór Jónsson, 27.9.2010 kl. 12:57]

Ja mikið asskoti Árni, þaðhefði verið kronið sem fyllti mælinn hjá mér með að loka þessari vesælu bloggsíðu minni. Þú hefur kannski tekið eftir því að fólk er eiginlega hætt að lesa hana, þetta eru örfáar hræður á sólarhring sem koma við, þannig að eftirspurnin eftir mínum skrifum er sáralítil orðin. Og varla býður nokkur maður lengur sítrón.

Þessi Borgarahreyfing hefur sosum dugað eins og aðrir smáflokkar, þeir leysast upp innanfrá og geta ekki á sárshöfði setið hvor við annan. Í hvaða armi flokksins ertu núna? Ég vona að þu fylgir henni Birgittu því mér líst svo fjandi vel á hana , bæði sem kvenmann og líka þingmann, því mér finnst hún bara helvíti klár og vel er hægt að senda hana til útlanda málfarslega séð. Þráinn er búinn að axla sína kommagæru aftur og kominn heim til sín. Annan eins húmorista og hann þekkir maður ekki, þetta er höfuðsnillingur á bókmenntasviðinu sem ég vona að þú sért mér sammála um. Hann Þór Saari hefur sosum talað oft óvitleysislega, en ég veit ekkert um það hvort er framtíð í honum. Ætluðu þeir nokkuð að vera til frambúðar þessi hreyfing?

En mér líka oft vel þínir refilstigar innhallt við þjóðbrautirnar og er alls ekki úrkula vonar um að þú lesir Sjálfstæðisstefnuna einu sinni til og sjáir það sem ég sé, að þetta er eins skilgreinda hugsjónin sem nokkur flokkur hefur að leiðarljósi. Hver hefur auðvitað sína djöfla að draga, Framsókn situr uppi með Finn Ingólfsson, Sigurð Einarsson, Óla í Samskipum og gott ef ekki Hreiðar Má, Samfylkingin með Jón Ásgeir og Pálma og VG með Steingrím J.og félaga Svavar.

Sjálfstæðisflokkurinn á fá afreksmenn meðal útrásarvíkinganna. Hann á sinn skerf af stjónarbjálfum eins og aðrir en hlutfallslega líka marga mun betri menn og farsælli en aðrir flokkar., þó ekki nema þess vegna að hann er langstærsti flokkurinn.

Hugsaðu þig nú um Árni minn og legðu þessa fordóma og fyrrur á hilluna og farðu að hugsa rökrétt. Þá sérðu að okkur ríður á að varðveita sjálfstæði landsins umfram allt fyrir landssöluöflunum í Samfylkingunni. Hvergi er eindregnari andstaða gegn tollabandalaginu ESB en í Sjálfstæðisflokknum. Og ekki getur þú verið mótfallinn því, "að vinna í innanlandsmálum að víðsýnni og þjóðlegri umbótastefnu, á grundvelli einstaklingsfrelsis og atvinnufrelsis, með hagsmuni allar stétta fyrir augum."

Velkominn í eins hugsjónaflokkinn sem í boði er í íslenskri pólitík:Sjálfstæðisflokkinn, sem hefur ekki þurft að breyta einum staf í stefnuskrá sinni frá 1929.

[Árni Gunnarsson, 27.9.2010 kl. 13:49]

Fullur klökkva þakka ég veisluboðið Halldór minn.

En Ertu ekki að villast með Þráin fulltrúa minn á Alþingi? Ég man ekki betur en að hann sé genginn til liðs við Framsóknarflokkinn. Sérðu hann undir hinni undur geðþekku kommagæru? 

Það er laukrétt hjá þér að Sjálfstæðisflokkurinn hefur ekki breytt stafkrók í stefnuskrá sinni frá 1929.

Hvort hann hefur ævinlega unnið eftir henni gæti verið efni til umræðu í stuttan bloggpistil.

Mér finnst meira um vert hvernig aksturinn var hjá ökumanninum sem olli slysinu en það hvort hann kunni umferðarreglurnar. 

Íslenska þjóðkirkjan hefur ekki breytt stafkrók í boðun sinni síðan 1550 að ég hygg.

Nóg um það mál allt og biskupana líka. 

[Kristján P. Gudmundsson, 28.9.2010 kl. 10:07]

Ég vil þakka ykkur báðum, Árna og Halldóri, fyrir stórskemmtilega ritrimmu. Þið hafið báðir töluvert til ykkar máls.

Halldór minn mér finnst þú gleyma því, að síðasti Landsfundur Sjálfst.-flokksins samþykkti ályktun um, að ákveðnir þingmenn hans legðu inn umboð sín til setu á Alþingi, eða man ég þetta ekki rétt ?

Árni,síðast er ég vissi til var Þráinn Bertilsson, þingmaður Hreyfingarinnar, sem áður hét Borgarahreyfingin , genginn í raðir Vinstri Grænna (rólegu deildina ? ), Er hann örugglega kominn heim í sinn gamla flokk, Framsóknarflokkinn ?

Með kveðju frá Siglufirði (Vesturbæ Fjallabyggðar), KPG.