Kreppan er hérna !

Óvenju hógvær Steingrímur birtist í Kastljósinu í kvöld.  Eitthvað er honum  brugðið því hendurnar gengu ekki upp og niður á sama krafti og í ræðustól Alþingis á mánudagskvöldið.  Helst var að skilja á honum að kreppan væri að hluta til huglægt ástand. Hann væri búinn að gera svo heilmikið í skuldavanda heimilanna.  það þyrfti að skoða hvað væri hægt að gera meira. 

 Hann var ekki beðinn um skýringu á hversvegna gerðir greiðsluaðlögunarsamningar væru aðeins á annað hundraðið talsins alls eftir allt starf ríkisstjórnarinnar.  En svo merkilegt sem það er þá er um fjórðungur allra þessara greiðsluaðlögunarsamninga  gerður í litla BYR.  Afganginum er deilt á alla hina ríkisbankana sem Steingrímur hefur ráðið  allan tímann,  meðan BYR, í andarslitrunum,  var að gera sína samninga.  En nú er Steingrímur búinn að skipta þar um skrár og kennitölu undir sinni forsjá og sparkaði okkur stofnfjáreigendum útí hafsauga. Þannig fór um sjóferð þá og alla okkar fyrirhöfn. 

En höfuðvandinn í gerð þessara greiðsluaðlögunarsamninga er sagður það, að innheimtumenn ríkissjóðs, hverra yfirmaður heitir Steingrímur Jóhann,  og svo Íbúðalánasjóður, hvers yfirmaður heitir Árni Páll, setja sig yfirleitt  þversum í öllum málum og hindra framkvæmdir. Ríkisinnheimtan gengur á fullu hvað sem Steingrímur skrafar um annað.  Heimatilbúinn vandi ríkisstjórnarinnar sjálfrar  kemur í veg fyrir framkvæmdir við þetta djásn hennar og auglýst stolt. 

Svona var eiginlega allur málflutningurinn hjá Steingrími Jóhanni, fjármálaráðherra og formanns Vinstri hreyfingarinnar,- græns framboðs.  Allt er til vandlegrar skoðunar og endurskoðunar og leiðir okkur hugsanlega að lokum á græna ódáinsvelli framtíðarinnar.  En ekkert virðist hafa komið í ljós á samanlögðum valdatímanum sem nálgast nú tvö ár, sem líklegt er til að vinna á uppboðsvandanum sem magnast með hverjum degi.  Þetta var svo mikill vandi sem helltist yfir þjóðina í einu segir Steingrímur.  Þetta segir sami maðurinn sem ætlaði með félaga Svavari  að leggja drápsskuldir Icesave á þjóðina. Og er enn að reyna að koma þessum aktygjum uppá  bak við tjöldin.  Bráðum hafa einir 60 milljarðar bara í vöxtum af samningnum sparast við að hafa farið í þjóðaratkvæðagreiðsluna og afstýrt slysinu. Atkvæðagreiðslu sem Steingrímur og Jóhann lýstu óþarfa því þau væru með góðan samning á borðinu.

 Fimm Héðinsfjarðargöng aðeins í vöxtum !

Steingrími  dettur ekki í hug að mótmælin beinist gegn áframhaldandi setu hans sjálf í ríkisstjórn. Núna heimtar hann að stjórnarandstaðan komi og fari að skoða þetta með þeim Steingrími og Jóhönnu !  En með því sklyrði að þau sitji  áfram í ríkisstjórn. Ekki er þörf á neinni þjóðstjórn nú meðan völ er á óbreyttu ástandi sagði Steingrímur.

Engar tillögur komu frá Steingrími í upplausn fyrirtækjanna, sem bankarnir hafa innleyst. Ekki minnst á málefni  BYR, sem stóð sig svona best í greiðsluaðlögunarsamningum margnefndu.  Tjón okkar fyrrum stofnfjáreigenda er orðið algert og við horfum nú fram á innheimtu Íslandsbanka gegn okkur til greiðslu á skuldum vegna stofnfjáraukningarinnar sem við vorum plötuð í af Jóni Ásgeiri og hans meðreiðarsveinum.  Að vísu hikar gamli bankinn hans Jóns, nú Íslandsbanki,  eitthvað við að leggja í hópinn á þessari stund og býður nú frestun innheimtu í eitt ár.  Var þó áður búinn að afskrifa slíkar skuldir hjá ólögráða börnum stjórnarmanna sem hann hafði lánað við það sama tækifæri.  Sárast er fyrir hinn almenna stofnfjáreiganda að horfa uppá það  að Sérstakur Saksóknari virðist ekki ætla að lögsækja nema helminginn af þjófunum sem í krafti stjórnarsetu sinnar rændu BYR innanfrá og settu hann á hausinn.

Steingrímur fór eins og köttur í kringum spurningar um afstöðu AGS til flatra höfuðstólslækkana skulda. Sagði þær verða ríkinu svo ofboðslega dýrar og misvirkar.  Sagði vandamálalánin vera 1200 milljarðar (heyrði ég rétt?) og allir sæju að 10 % kostuðu 120 milljarða.  En getur fólk á vergangi getur orðið meira vandamál ef ekki tekst að finna lausnir ?   Fréttir um þau 1200 manns sem þurftu aðstoð í dag til að seðja hungur sitt í dag bentu ekki til þess að ríkisstjórnin hafi fundið lausnir á vanda heimilanna.  

Steingrímur  sagði að mótmælin á Austurvelli væri áminning til allra þingmanna að gera betur, ekki bara til sín og ríkisstjórnarinnar. Kokhraustur sagði hann að stjórnarandstöðunni væri sæmst að  hjálpa ríkistjórn hans við að leita að lausnum en ekki vera með stöðugt áreiti við sig.  Kosningar væru auðvitað mesta óráð þar sem svo mikið væri eftir óleyst framundan eins og kjarasamningar.  Allt  var greinilega mögulegt í stöðunni NEMA það, að hann fari sjálfur frá ! 

Steingrímur skilur greinilega hvorki upp né niður í því að hverju reiði fólksins beinist. Hún beinist auðvitað að þingmeirihluta Alþingis  og úrræðaleysi ríkisstjórnarinnar.  En Steingrími dettur ekki í hug að þessi reiði beinist að niðurstöðunni eftir tveggja ára starf hans sjálfs. Hann segir að ríkisstjórnin væri vinnandi nótt og dag að lausnum en gengi bara ekki betur.  Honum finnst sjálfsagt að ríkisstjórnin haldi áfram að leita lausna, það fari hugsanlega að birta eftir einhver ár.

Eiginlega fannst mér Steingrímur minna mig á það þegar  logið var uppá  Maríu Antoinette að hún hefði sagt þegar mótmælendurnir hrópuðu fyrir utan gluggana á höllinni. "Af hverju  borðar fólkið ekki bara kökur ef það hefur ekki brauð?  "

Kreppan er ekki aðeins huglægt ástand eins og Steingrímur lét að liggja.

Kreppan er hérna! 

 

Athugasemdir

[Edda Karlsdóttir, 6.10.2010 kl. 22:47]

Sammála þér í þessu. Ég sat einnig og horfði á vesalings manninn sem skilur hvorki upp né niður í öllum þessum látum á Austurvelli undanfarna daga. Talar svo um kreppuna sem huglægt ástand!Þvílík móðgun við fólk sem er að missa allt sitt. Erfitt að fá skilninginn í lag á þeim bæ sýnist mér. Það er eiginlega alveg ótrúlegt hvað Steingrímur og Jóhanna eru skilningslaus á þau skilaboð sem er verið að senda þeim þessa dagana, fólk í þúsundatali stendur fyrir framan Alþingishúsið með kröfuspjöld og lýsa frati á ríkisstjórnina, krefjast þess að þau pakki saman og fari fyrir fullt og allt og helst í gær, en ekkert virðast þau fatta samt. Held satt best að segja að þau skilji þetta ekki fyrr en þau verða borin út, gætu jafnvel þá rekið upp stór augu og spurt hvað væri í gangi!

[Kjartan Sigurgeirsson, 7.10.2010 kl. 09:13]

Góð grein Halldór, mér finnst þú gleyma einu smáatriði, eða ef til vill ertu uppgefinn á að tala um það, en þar á ég við meðhöndlun RUV á ráðherrum ríkistjórnar Jóhönnu. 

Álit mitt á Þóru hefur aukist með hverju Kastljósi sem hún stýrir viðtölum, hún hefur verið málefnaleg og leitt fram trúverðug svör frá viðmælendum sínum.  Í gær hrundi það til grunna mér varð illt af því að hlusta á hvernig hann SJS komst upp með þvæluna alveg gagnrýnilaust af hálfu spyrjanda. Er það eðlileg veruleikafirring að telja að 8.000 manns hafi komið saman á Austurvelli til að mótmæla stjórnarandstöðunni, eða svona í mesta lagi aðeins verið að áminna stjórnina um að hún væri ef til vill ekki á alveg réttri leið.