Hagkerfi dauðans

er það sem Íslendingar búa við um þessar mundir. Að verðbólga mælist lítil er ekki kynlegt í þjóðfélagi þar sem svo til engin fjárfesting á sér stað. Þjóðfélagi þar sem  ríkisbankar eru fullir af iðjulausum peningum, þjóðfélagi þar enginn treystir öðrum og í þjóðfélagi þar sem þegnarnir treysta stjórnvöldum alls ekki til að ráða við vandann fremur en Egyptar virðast treysta Múbarak 

Litlir hópar í útflutningsgreinum landsins, sem ganga vel í skjóli gjaldeyrishafta,  brýna nú busana og ætla sér skyndilausnir. Sigur þeirra með verkföllum mun svo auka enn á vanda þjóðfélagsins og koma verðbólgunni aftur á stað án þess að fjárfesting eða aukið traust muni fylgja kjararýrnun þeirra sem minna mega sín. 

Við þessar aðstæður berast boð frá Mávi Seðlabankastjóra um að nú séu stýrivextir ekki að þvælast fyrir neinum og Seðlabankinn skipti nú yfir í moll úr dúr.  Auðvitað, hvaða máli skipta stýrivextir í köfnuðu hagkerfi þar sem 7000 manns nettó úr hópi hinna bestu hefur flutt úr landi á tveimur árum ? Þessi landflótti gefur ríkisstjórninni og þjóðlygurum eins og Steingrími J. tækifæri til þess að halda því fram að atvinnuleysi hafi minnkað og landið sé að rísa.

Brottflutningurinn hefur hinsvegar aukið á eymd þeirra sem hvergi komast og rýrir þjóðarframleiðsluna verulega. Þannig mun þetta halda áfram meðan þessi ríkisstjórn ráðleysis og regluverks situr og keyrir Íslendinga dýpra ofan í for Sovéthagfræðinnar sem byggir á ríkisvæðingu alls sem andann dregur og er því  hagkerfi dauðans eins og allir ættu að vita núorðið.

 

Athugasemdir

[Sigurður Grétar Guðmundsson, 2.2.2011 kl. 13:41]

Það er langt síðan ég hef heilsað upp á þig Halldór en við vorum lengi samborgarar í Kópavogi. Aldrei vorum við vinir enda nokkuð langt á milli í skoðunum en við vorum heldur ekki fjandmenn.

Eigum við þá að segja að við höfum verið fjandvinir?

Þú mættir gjarnan kíkja inn á bloggið mitt en þar segi ég að almenningur sé orðinn hundleiður á svartagallsrausi og svívirðingum um þá sem eru að moka flórinn eftir þá sem steyptu okkur í Hrunið mikla í okt. 2008.

Heldurðu að það sé auðvelt verk?

Sá boðskapur sem kemur frá Seðlabanka Íslands sýnir að landið er að rísa, þess vegna finnst mér daðurlegt að þú sért enn á þeirri ömurlegu braut að sjá ekkert annað en dauðann og djöfulinn einsog fyrirsögn pistils þíns ber með sér:

Hagkerfi dauðans

Já fyrr má nú rota en dauðrota, ég tek ekkert mark á þessu rausi þínu en þið sem sjáið ekkert annað en gapandi gröfina framundan ættuð að efna ykkur í líkkistur sem allra fyrst, eða eru þær kannski á lækkandi verði með minnkandi verðbólgu?

Ef allt er að fara til fjandans er líklega ekki eftir neinu að bíða eða hvað?

[Halldór Jónsson, 2.2.2011 kl. 15:58]

Gaman að fá heimsókn frá "höfuðsnillingi" eins og Árni Jóh skilgreinir þig. Og takk fyrir samátið um daginn, það fór nú aldeilis vel um okkur þá. 

 En gott er að heyra að gamli komminn í þér hefur engu gleymt og ekkert lært. Það myndi Árni Jóh. skilgreina sem stefnufestu.

Það sem ég hef við þetta skrif hjá þér að bæta er svona:

 Okkar bíður fátæktin ein með tilheyrandi skiptingu á skorti  ef þið kommarnir fáið að halda áfram við hagstjórnina. Þá endum við eins og þið gerðuð í falli óskalandsins ykkar í Sovét-hagkerfunum. Þar hefur frjálshyggjan allstaðar verið kölluð til og lífskjörin hafa batna hægt og sígandi. Nú stefnum við sjálfir í þveröfuga átt undir forsæti þinna manna.

Hagvaxtarspár ykkar byggjast allar á erlendri fjárfestingu sem þið berjist svo gegn með öllum ráðum. Veit ekki hvernig þið ætlið að forðast hana þegar þið verðið búnir að koma okkur í EU, sem þið berjist svo djarflega fyrir undir öruggri forystu Steingríms J. með undirleik Ásmundar Daða og "Lilju Mós" eins og Jóhanna forsætiss kallar hana.

Verðbólgan verður engin hérna ef ekki mínus í því alkuli sem þið stefnið þjóðinni í.  Engin eftirspurn, =verðlækkun. Þetta ættir jafnvel þú að skilja. Ef ég kaupi ekki rör og pípulagningavinnu fer verðið hjá þér lækkandi.Og það eru engin rör í lagningu í þjóðfélaginu önnur en skítarör full af lygum og þvættingi.

Þegar íhaldsbláminn fer aftur að renna um æðar er fyrst von um betri tíð með blóm í haga.

En núna?

Sovét Ísland, óskalandið. Þú ert bara komið !  

[Halldór Jónsson, 2.2.2011 kl. 16:01]

Já, einmitt dæmið um líkkisturnar handa okkur íhaldskurfunum  og lækkandi verðá þeim bendir til þess að þú skiljir eitthvað í kapítalisma !

[Lúðvík Júlíusson, 2.2.2011 kl. 17:59]

samkvæmt þeirri peningastefnu sem tekin var upp árið 2001 þá eru engar iðjulausar krónur til í bönkum.

Ef vextir væru lækkaðir og þessar svokölluðu iðjulausu krónur færu út í eftirspurnina þá myndi eftirspurnin fyrst og fremst vera eftir erlendum gjaldeyri sem myndi fella krónuna.  Það væri þá lækkun krónunnar en ekki verðbólgan sem myndi örva innlent atvinnulíf.  Til þess að ná þessari örvun þá eru til fleiri leiðir en aukið peningamagn í umferð, td. afnám gjaldeyrishafta.