Ég á líka Ísland

er fyrirsögn yfirlætislausrar greinar í Morgunblaðinu í morgun eftir Stefaníu Jónasdóttur Sauðárkróki sem lætur mann staðnæmast við.

Stefanía segir:

"Ísland er land mitt, fagurt og gott föðurland, sem er einstök perla á stórum skítahaug þar sem auðvald og fyrirtæki í nafni hagnaðar hafa arðrænt móður jörð og gert að haug. Græðgin er svo óskapleg að allt er eyðilagt í leiðinni. Og þessar vesalings mannverur láta eins og það sé búið að sauma vasa á líkklæðin og ætla að hafa allt með sér þegar þar að kemur. Búið er að gleyma að ganga okkar hér á jörð á að vera einföld með kærleika, lítillæti og auðmýkt að leiðarljósi. Því miður er við völd hjá okkur fólk sem er hagnaðurinn og græðgin uppmáluð.

Aldrei er talað til okkar nema um fjármál. Stjórnmál eru meira en peningar. Það eru aldrei töluð huggunarorð né uppörvun, - við þurfum á því að halda að finnast við vera þjóð. Ég fer fram á að þið hugsið til framtíðar og seljið ekki Kínverjum land hér. Kínverja vantar landrými, norðursjávarleiðina og fleira það sem við höfum aðgang að. Þeir flæða yfir þar sem þeir ná fótfestu og við erum fámenn þjóð. Þeir fara sínu fram þar sem þeir eru og virða ekki mannréttindi, hvað þá land- eða dýraréttindi.

Það sorglega er að ég á ekki að þurfa að skrifa þetta, - þið vitið þetta allt, en samt skálið þið í kampavíni, Ólafur Ragnar og fleiri, en í hina röndina þykist þið hafa áhyggjur af mannréttindum. Svo Guð hjálpi okkur, vitið þið yfir höfuð nokkuð hvað þið eruð að gera eða segja? Ísland er land mitt og ég vil ekki að óviturt fólk hafi ráðin yfir því.

Ég sem þegn segi nei við þessari landssölu. Mál ykkar gegn Geir Haarde einum sýnir hversu ómerkileg þið eruð. Ég treysti ykkur ekki.

Guð varðveiti Ísland.

STEFANÍA JÓNASDÓTTIR,
Sauðárkróki. "

Skyldu ekki vera nokkrir sem hafa velt fyrir sér hversu langt einstakur Íslendingur getur gengið í að ráðstafa landinu? Getur ein þjóðaratkvæðagreiðsla um til dæmis verið nóg til að afsala fullveldinu og þar með rétti þjóðar til landsins um alla framtíð og verið skuldbindandi fyrir óbornar kynslóðir? Hafði Einar Þveræingur þessa hugsun á tæru þegar hann lagðist gegn því að gefa kónginum Grímsey?

Gæti ég og nægilega stór flokkur með mér samþykkt að ráðsatafa Íslandi til að verða fylki í Kanada? Eða Bandaríkjunum? " Ég á etta, ég má etta" hugsun útrásarvíkingsins sem er nokkuð viðtekið siðferðisprinsíp í landinu.

Hversu langt nær eignarráttur minn yfir landskika sem ég á samkvæmt Notarius Publicus á Selfossi? Get ég leyft Lichtenstein að setja þar upp herstöð?

Eða eiga aðrir þetta Ísland með mér?

Athugasemdir

[Valdimar Samúelsson, 10.10.2011 kl. 10:21]

Góð grein hjá Stefaníu. Halldór þakka fyrir að sýna hana hér og veist þú þú getur samkvæmt lögum selt hvaða þjóð landið þitt og þeir sem kaupa geta stofnað ríki samkvæmt montevideo convention lögunum.   

Montevideo Convention segir að þú getir stofnað þitt eigið land/þjóð samkvæmt lögum samþykktum 1933 í Montevideo, SA. Þessi Montevideo-samþykkt segir líka að land/þjóð skuli tilkynna hvað þeir vilja og að þeir hafi virt alþjóðleg lög. Þetta er útdráttur úr grein minni sjá alla: http://pappir.mbl.is/index.php?alias=IS-MBL&s=3699&p=82955 

Það sem er ótrúlegast er að við höfum löglærða á alþingi og þeir vita ekkert eða kæra sig kollótta um alþjóðleg lög og málefni. Við seljum orku okkar við seljum vatnið okkar og hvað taka þeir upp næst. sjáum keflavíkur bæ. Þeir eru búnir að selja allar eignir bæarins ásamt sál.