Hryllir við Sjálfstæðisflokknum

segja Kratar í Kópavogi eftir fjölmennan fund sinn í gær. Talið er að jafnvel tuttugu manns hafi mætt en þess er vandlega gætt að engar myndir berist af salnum, aðeins háborði forystunnar sem var jú kjörin af hundrað manns á kaffihúsi fyrir síðustu kosningar.

Hvað skyldi það vera sem veldur þessu sálarástandi? Eru það einstakir menn í hópi bæjarfulltrúa Sjálfstæðisflokksins? Eru menn ekki saklausir þar til sök er sönnuð og dómur gengur? Eða er það stefnuskrá Sjálfstæðisflokksins? Eða er það einhver vanmetakennd vegna þess hvað liggur mikið eftir starf flokksins í meirihluta með Framsóknarflokknum í tvo áratugi? Er Samfylkingin svona sannfærð um að henni takist aldrei að toppa þann árangur? Enda er afrekaskráin ekki löng eftir tvö ár í meirihluta.

Er Samfylkingin svona sannfærð um að hana skorti andlegt atgerfi til jafns við Sjálfstæðisflokkinn? Vera má svo, en Samfylkingin má vita það að Sjálfstæðimsenn eru frekar aumingjagóðir og hafa oftsinnis ráðið inn krata til starfa hjá bænum þó stundum gegn betri vitund. Slíkt hendir hinsvegar aldrei Samfylkinguna, hvað þá VG. Þeir eru gegnheilir í andstyggð sinni á Sjálfstæðisflokknum og öllu sem honum viðkemur og ráða aldrei neinn nema sitt fólk.

Það er þessi vanmetakennd sem er þeim Samfylkingarmönnum, og raunar taglhnýtingnum í VG einnig, líklega erfiðust ef þeir þurfa að leita sér að nýjum samstarfsflokki.Þessvegna hryllir þá svona við Sjálfstæðisflokknum að þeir verða að fá Morgunblaðið til liðs við sig til að undirstrika þann skilning sinn á væntanlegum viðsemjendum.