Davíð hafði rétt fyrir sér

en ríkisstjórnin rangt.

Þetta er sigur lýðraæðisins stamaði Össur auminginn út úr sér þegar fréttamaðurinn spurði hann hvort þetta væri ekki ósigur fyrir hann og ríkisstjórnina sem hefði viljað borga. Nei, nei sko þetta er sigur lýðræðisins sagði Össur flaumósa.

Akkúrat var það sigur lýðræðisins að Forseti Íslands hafði vald til að taka málið úr höndum ríkisstjórnarinnar og leggja það í dóm þjóðarinnar. Þetta er samkvæmt stjórnarskrá lýðveldisins Íslands. Til þess að byrgja þann brunn vill þessi sama ríkisstjórn okkar nú eyðileggja stjórnarskrá okkar með einhverrri ritgerð saminni í einskonar Gaggó-Vest stíl sem engin samstaða er um á Alþingi né meðal þjóðarinnar né heldur nein reynsla komin á hvernig hún virki þegar á reynir. Hún skal í ykkur segir ríkisstjórnin og reiðir hnefann.

Enginn núlifandi Íslendingur hefur orðið fyrir öðrum eins árásum af vinstri flokkunum eða beinum árásum af kommaskríl á heimili sitt og Davíð Oddsson fyrir það eitt að halda fast á málstað Íslands og neita að láta þjóðina bera ábyrgð á skuldum Landsbankans.

Eftirfarandi tilvitnanir eru úr viðtali Agnesar Bragadóttur við Davíð frá 5.júlí 2009:

" Davíð Oddsson, fyrrverandi seðlabankastjóri, telur að samningurinn sem samninganefnd ríkisins hefur gert við Breta og Hollendinga um skuldbindingar ríkissjóðs vegna Icesave séu hryllilegustu mistök sem gerð hafi verið allt frá árinu 1262. Hann segir að staðfesting Alþingis á ríkisábyrgðinni, sem ríkisstjórnin og fjármálaráðherra leita nú eftir myndi dæma þjóðina til ævarandi fátæktar. Davíð féllst á að veita Morgunblaðinu viðtal um Icesave-samningana, þátt Landsbankans, Seðlabankans og stjórnvalda. Blaðamaður hitti Davíð á heimili hans í fyrradag.

“ Nú hafa stjórnvöld gert samning við Breta og Hollendinga um greiðslur ríkissjóðs vegna Icesave. Samningurinn og ríkisábyrgð vegna hans er nú til umfjöllunar á Alþingi. Hvernig horfir þetta við þér, Davíð? Á Alþingi að staðfesta þann samning sem gerður hefur verið?

Mér finnst að menn séu komnir langt fram úr sér, þegar þeir eru að velta því fyrir sér hvort samningurinn um Icesave er slæmur eða góður.
Menn verða að hafa önnur atriði fyrst í huga, eins og það hvaða fyrirbæri þessi Icesave-samningur svonefndi er. Það byggist allt á því að einkalánastofnun, Landsbankinn, stofnaði til innlánsreikninga, fyrst í Bretlandi, svo í Hollandi, án þess að leita nokkurrar ábyrgðar frá ríkinu. Þeir byrjuðu smátt og í upphafi jukust innstæðurnar á þessum reikningum hægt, en síðar jókst vaxtarhraðinn mjög.

Það er ákveðinn hópur manna sem stendur í þeirri trú, að þetta einkafyrirtæki, Landsbankinn, hafi getað safnað milljónum punda, hundruðum milljóna punda, eða hvaða upphæð sem menn kærðu sig um, þar sem ábyrgðin væri öll á íslenskum skattborgurum, án þess að þeir hefðu hugmynd um þann ofurþunga sem var að leggjast á þeirra herðar.

Þetta fær auðvitað ekki staðist og ég lét stjórnendur Landsbankans margoft vita af því sjónarmiði Seðlabankans að það væri engin ríkisábyrgð á þessum innlánum . "

" En hvers vegna fær það ekki staðist, að um ríkisábyrgð sé að ræða?

" Framhjá því hefur með öllu verið horft, hvernig þessi innlánstryggingasjóður sem menn vilja nú láta íslenska ríkið bera ábyrgð á, er til kominn. Hann er þannig til kominn að samkvæmt Evrópureglum sem við erum bundin af, gegnum Evrópska efnahagssvæðið (EES) þá er ákveðið að í kringum bankakerfið skuli koma á tilteknum tryggingasjóði sem er tryggingasjóður viðkomandi bankakerfis, jafnvel þótt lagaramminn sé settur af viðkomandi ríki hverju sinni. Hvergi er það sagt að ríkið hafi neitt með þann sjóð að gera. Hugsunin er sú og er í sjálfu sér alls ekkert galin, að bankarnir í viðkomandi landi borgi tiltekna prósentu af innlánum inn í sjóð, sem eigi síðan að mæta því ef einhver bankinn lendir í vandræðum.

Augljóst er að svona kerfi er hugsað fyrir lönd þar sem bankar eru hundrað, tvöhundruð talsins, eða þaðan af fleiri, enda gengur hugsunin upp gagnvart slíkum löndum. Þegar slíkur fjöldi banka greiðir reglubundið af innstæðum sínum í tryggingasjóði, þá er staða sjóðsins slík, að hann getur hæglega mætt því þótt tveir til fimm, sex bankar fari á hausinn.

En þegar bara þrír bankar eru í landinu, fyrir utan örfáar smærri fjármálastofnanir, eins og háttar til hér á landi, þá sér hver maður í hendi sér að tryggingasjóður sem þeir eiga að byggja upp til þess að verjast á erfiðleikatímum, er mjög veikur og getur engan veginn staðið undir allsherjar bankahruni eins og hér varð.

Þegar svo kemur í ljós að þessar Evrópureglur eigi ekki við um Ísland í rauninni eða gangi að minnsta kosti alls ekki upp þar, þá koma menn með þá eftiráskýringu, að fyrst reglurnar af hálfu Evrópusambandsins hafi verið svona gallaðar, þá hljóti að vera ríkisábyrgð á öllu saman. Þetta er forsenda sem menn gefa sér og á hvergi stoð í lögum.

Enginn lögfræðingur, sem er ekki hagsmunagæslulögfræðingur í einhverjum skilningi, hefur komist að þeirri niðurstöðu að svona geti þetta verið. "

Í viðtalinu koma fram ýmsar setningar sem gott er að rifja upp við þessi tímamót:

" Þið getið út af fyrir sig sett Björgólf Guðmundsson á hausinn og eruð sjálfsagt komnir langleiðina með það, en þið hafið ekkert leyfi til þess að setja íslensku þjóðina á hausinn, “ sagði Davíð Oddsson, fyrrverandi seðlabankastjóri, við þá Halldór J. Kristjánsson og Sigurjón Þ. Árnason, bankastjóra Landsbankans, á fundi í Seðlabankanum snemma árs í fyrra, þar sem bankastjórarnir reifuðu sjónarmið Landsbankans um að ríkið bæri ábyrgð á Icesave-skuldbindingum Landsbankans."

" Þetta eru ekki skuldbindingar íslenska ríkisins, þetta eru ekki skuldbindingar íslenskra borgara, þetta eru skuldir Landsbankans, " segir Davíð.

Davíð telur að yfirlýsingar ráðherra núverandi ríkisstjórnar, bæði Jóhönnu Sigurðardóttur forsætisráðherra og Steingríms J. Sigfússonar fjármálaráðherra, um að Íslendingar séu skuldbundnir Bretum og Hollendingum hvað varðar Icesave, hafi stórskaðað málstað Íslendinga.

Hann segir að Bretar og Hollendingar eigi að sækja að Íslendingum með því að fara dómstólaleiðina. Við viljum borga skuldir okkar, en við viljum fá úr því skorið að við séum bundin að lögum að borga.

" Er það virkilega svo að íslensk stjórnvöld ætli án lagaheimildar að taka á sig stórkostlegar erlendar skuldbindingar að kröfu Breta og fl.? " spurði Davíð Oddsson seðlabankastjóri Geir H. Haarde forsætisráðherra í bréfi þann 22. október 2008.

Það er hollt að rifja þetta upp við þessi tímamót í skugga þeirra ofsafengnu árása sem vinstra liðið hefur staðið fyrir gegn Davíð Oddssyni. Davíð hvikaði aldrei frá sannfæringu sinni og varði hagsmuni Íslands svo lengi sem hann mátti gegn samstilltum hatursárásum Jóhönnu Sigurðardóttur og Steingríms J. Sigfússonar sem að lokum flæmdu Davíð úr embætti Seðlabankastjóra ásamt tveimur öðrum grandvörum bankastjórum Seðlabankans. Slíkt var offorsið og heiftin að engu var eirt.

Það eru margir Íslendingar sem telja dagana þar til að þessi ríkisstjórnarskötuhjú, Jóhanna Sigurðardóttir og Steingrímur Jóhann heyra gleymskunni til. Össur má fylgja þeim þangað mér að meinalausu.

Davíð hafði rétt fyrir sér en þau rangt.

Athugasemdir

[Heimir Lárusson Fjeldsted, 28.1.2013 kl. 20:51]

Davíð fær uppreist æru.

[Helga Kristjánsdóttir, 28.1.2013 kl. 21:48]

Þau voru eins og mannýg naut og hefðu rekið hornin í gegn um hann,kæmust þau nær,þau eiga að skammast sín.

[Hrólfur Þ Hraundal, 28.1.2013 kl. 21:56]

Takk Halldór.  En svona til athugunnar að þá veit ég ekki til að Davíð hafi misst neina æru.  Það eru klárlega einhverjir aðrir sem henni hafa nú glatað.  En þeir hinir sömu vita ekki sín axarsköft nú fremur en þá.       

[Björn Emilsson, 28.1.2013 kl. 23:51]

Á þessum örlagatímum fyrir islenska þjóð ber að kalla til alla krafta Islands, Davið Oddsson er þar fremstur í flokki.

[Gunnar Rögnvaldsson, 29.1.2013 kl. 01:04]

Þakka þér Halldór fyrir að skrifa færsluna og þér Hrólfur fyrir að segja það sem ég hugsaði - og ykkur öllum fyrir að vera til. 

Kveðjur

[Halldór Jónsson, 29.1.2013 kl. 08:34]

Þakka ykkur öllum yndislegu bloggvinir. Það eykur manni trúa á að mannkynið sé ekki alveg glatað í forheimskun að verða var við ykkur og ykkar hugsanir.

[Óskar Helgi Helgason (IP-tala skráð) 29.1.2013 kl. 12:46]

Heill og sæll Halldór; sem og aðrir gestir, þínir !

Halldór síðuhafi - Heimir - Nafna - Hrólfur - Björn og Gunnar !

Óverðskulduð lofrulla ykkar; til dýrðar Sunn- Mýlzka afstyrminu, Davíð þessum Oddssyni, er gjörsamlega á skjön við raunverulega atburðarás, sem leiddi til þeirra hörmunga, sem yfir okkur gengu; Haustið 2008 - og síðan, gott fólk.

Sjáið þið ekki samhengið ? Davíð Oddsson, auk nokkurra valhoppara hans, hönnuðu regluverkið í þágu Banka Mafíunnar, á kostnað íslenzks almennings alfarið, og því fór, sem fór.

Davíð; ætti að sitja hlekkjaður í grjótinu, ásamt Jóhönnu og Steingrími, og öðrum þeim, sem af áfergju eigin gróðahyggju, hafa grafið undan samlöndum sínum, grímulaust.

Ættu Kambódíumenn ekki bara; að endurreisa Pol Pot, og hyski hans, eftir allt það, sem þar gekk á, forðum ?

Reynið; að jarðtengjast til hins illa raunveruleika, gott fólk.

Með beztu kveðjum; sem jafnan, af utanverðu Suðurlandinu /  

[Eyjólfur G Svavarsson, 29.1.2013 kl. 16:52]

Halldór takk fyrir þessa grein, og ykkur hinum sem hafa skrifað, nema Óskari Helga Helgasyni. Hans skrif kann ég ekki að meta, og ég held að hann sé andsetinn, og það þurfi að senda á hann Prest. Eða hvað finnst ykkur?

[Óskar Helgi Helgason (IP-tala skráð) 29.1.2013 kl. 20:16]

Komið þið sæl; á ný !

Eyjólfur G Svavarsson !

Sjálfur; getur þú verið andsetinn, af þínum frjálshyggju- og óraunveruleika órum.

Ég segi einfaldlega hlutina; eins og þeir blasa við hverjum óbjöguðum manni, sem ekki er haldinn einhvers konar órum, á brún trúarlegrar upphafningar;; eða lotningar, fyrir mannskemmandi fígúrum stjórnmála, og pretta, ýmiss konar.

Sá; virðist vera helztur, munurinn; á okkur að minnsta kosti, Eyjólfur minn.

Og; grandskoðaðu betur, Íslandssögu liðinna ára - sem áratuga, Eyjófur G Svavarsson.

Hann; getur stundum verið napur - sannleikurinn, gott fólk.

Sízt lakari kveðjur; öðrum fyrri /

 

[Eyjólfur G Svavarsson, 31.1.2013 kl. 00:43]

Þú ert altaf jafn hress Óskar minn.kv.

[Óskar Helgi Helgason (IP-tala skráð) 31.1.2013 kl. 00:59]

Komið þið sæl; sem fyrr !

Eyjólfur G Svavarsson !

Jú; þakka þér fyrir - að tiltölu, er ég nokkru hressari, eftir að Svartasta Skammdeginu tók að réna, að nokkru.

Að öðru leyti; lízt mér ekkert, á framtíð : lands og miða og fólks og fénaðar, fyrr en þá; að okkur tækist að svæla frá okkur, Helvítis hvítflibba- og blúndukerlinga ger alþingis, ágæti drengur.

Eigum nóg til; af harðduglegu fólki, úr framleiðslu- og þjónustu greinunum, til þess að halda, utanum okkar mál, bærum við gæfu til þess, að velja þann skynsamlega kost, ágæti drengur.

Sömu kveðjur; sem seinustu, vitaskuld /