VALITOR

er fyrirtæki sem er með lungann af íslenskum heimilum í gíslingu. VISA-reikningurinn er skelfing heimilanna sem dynur yfir um hver mánaðarmót. Því heimilin eru yfirdregin um einn mánuð og hafa þannig orðið ánauðugir þrælar kortafyrirtækjanna.

Þessu fjárplógsfyrirtæki Valitor hefur tekist að ánetja heimilin sér eins og fíkniefni í skjóli stöðugrar rýrnunar kaupmáttar. Áður fengu menn útborgað í seðlum í umslagi og síðan var ekki eytt meiru en þar var í þann mánuð. Man einhver ávísanaheftin og FITTIÐ?

Nú býður þetta flotta fyrirtæki meiri yfirdrátt á sanngjörnum 36 % vöxtum eða þar um bil, VISA-rað, VISA-bein blabla. Þetta er eiginlega siðlaust fyrirtæki grannt skoðað, eins og Fagin í Oliver Twist. Það gerir mönnum kleyft að ganga ekki með peninga á sér en kúgar alla seljendur vöru til að borga sér þóknun fyrir að selja  fólki sem á ekki fyrir vörunni. Sá sem borgar með seðlum fær engan afslátt fyrir það sem er auðvitað bullandi ósanngjarnt.

Nú var þetta ekki nóg. Fyrirtækið er uppvíst að glæpsamlegu hátterni.Ekki í fyrsta sinn sem íslenskt kortafyrirtæki lendir í því. Valitor er búinn að stela gríðarlegum fjárhæðum með því að útiloka samkeppnisaðila. Þetta er sannað mál. Og svo hvað?

Réttvísin segir að það er bara fyrirtækið sem er sekt. Það bara borgar eitthvað einhverjum sem enginn veit. Stjórnandinn, sá sem skipulagði starfsemina, hann er löngu farinn og orðin séff einhversstaðar annarsstaðar.

Hvar varð ásetningurinn um framningu glæpanna til? Í plastgerðinni sem býr til kortin? Í efnahagsreikningi fyrirtækisins? Enginn starfsmaður kemur þar nærri. Fyrirtækið er aðili að lögum.

Ef Albert Anastasia hefði stofnað fyrirtæki sitt MURDER Inc.( MORÐ hf.) á Íslandi, hver hefði afstaða íslenskrar réttvísi verið til fyrirtækisins? Afurðir fyrirtækisins yrðu algerlega á vegum þess? Enginn stjórnenda myndi bera minnstu ábyrgð á afleiðingunum? Hver er munurinn á VISA og t.d. fyrirtæki sem héti Rán & Gripdeildir ehf? Enginn ábyrgur innan fyrirtækisins? Bara efnahagsreikningurinn?

Ef menn í stjórnunarstöðum fyrirtækis aðhafast þannig að glæpsamleg  hegðun telst, þá  er vandséð hvernig er hægt að áfellast fyrirtækið fyrir gerðirnar.

Eiga glæpamenn að fara í fangelsi?. Eiga þeir að fá að gegna opinberum ábyrgðarstöðum?  Hvernig myndu Bandaríkjamenn svara svona spurningum  sbr. Maddoff, G.E. og fleiri slík mál?

Nei venur, hér er barrasta allt í keyinu!

Það er Valitor sem borgar.