"Nokkrir þingmenn

Sjálfstæðisflokksins  hafa endurflutt þingsályktunartillögu Sigurðar Kára Kristjánssonar frá síðasta kjörtímabili um rannsókn á embættisfærslum og ákvörðunum íslenskra stjórnvalda og samskiptum þeirra við bresk og hollensk stjórnvöld vegna Icesave. Gerð er tillaga um sérstaka rannsóknarnefnd með víðtækar rannsóknarheimildir.

 

 

Starf íslenskra stjórnvalda á síðasta kjörtímabili er samfelld röð mistaka og þar fer Icesave-málið vafalítið fremst í flokki þó að önnur séu líka risastór. Ef þjóðin hefði ekki gripið inn í væri býsna nöturlegt um að litast á landinu og sjálfsagt að kannað verði hvernig ráðherrar stóðu að málum.

 

 

Margt annað kallar á ýtarlega skoðun, svo sem afhending stjórnvalda á nýju bönkunum í hendur kröfuhafa. Ásgeir Jónsson hagfræðingur hefur bent á að hefði hagnaður bankanna runnið til Íslands en ekki kröfuhafanna hefði ríkið nánast getað unnið upp tap sitt af falli þeirra.

 

 

Gríðarhátt skuldabréf í erlendri mynt sem þáverandi stjórnvöld samþykktu á milli gamla og nýja Landsbankans er þriðja dæmið um afdrifarík mistök sem landsmenn eru enn að súpa seyðið af.

 

 

 

Þeir stjórnmálamenn sem ákafastir voru að rannsaka mistök og kalla saman landsdóm á síðasta kjörtímabili geta varla sett sig upp á móti því að þessi mál verði rannsökuð í þaula."

 

Svo segir í Staksteinum Morgunblaðsins.

Þó að hefnigirnin sé manni tiltæk fyrir þá svívirðilegu aðför sem Geir H. Haarde mátti þola af hálfu Steingríms J. Sigfússonar og meðreiðarsveina hans þá er maður ekki mikill talsmaður þess að auka á báknið og opinberan kostnað. En við eigum ekki að gleyma afleiðingum hatursofsóknum þessa manns og annarra á hendur pólitískum andstæðingi. Við sitjum uppi með afleiðingar pólitískra afglapa þessa sama manns sem eru þjóðarslys og verða seint bætt.  Getum við svarað öðruvísi og betur en með því að einangra þennan mann og meðreiðarsveina hans frá öllum áhrifum í íslenskum stjórnmálum? Eigum við ekki að reyna að lágmarka öll pólitísk samskipti við þessi öfl? 

Öðru eins hefur sjálfsagt verið eytt en í það að draga þennan fyrri ráðherra fyrir Landsdóm sem hann verðskuldar margfalt og fleiri með honum. Hvað sem gert verður verðum við að vona að núverandi ríkisstjórn takist að lágmarka skaðann af afglöpum síðustu ríkisstjórnar og við blasa.

Að því verða "Nokkrir Þingmenn" að vinna sem best með öðrum þar til hæfum.