Jón Gunnarsson

alþingismaður var á fjölmennum fundi í Sjálfstæðisfélaginu í Kópavogi í morgun. 

Jón ræddi atvinnumálin sem mjög brenna á fólki um þessar mundir. Hann sagði það stefnu Sjálfstæðismanna að það yrði betra að lifa á Íslandi á næsta ári en á þessu sem væri að líða. Og enn betra yrði að lifa á Íslandi á  þar næsta ári og koll af kolli.  Að þessu myndi flokkurinn vinna.

Mikið verk væri framundan að reisa við efnahag landsmanna eftir viðskilnað síðustu ríkisstjórnar. Hún hefði meðal annars sett sjávarútveginn í uppnám með óraunhæfri veiðigjaldatöku sem hefði lent með mestum þunga á litlum og meðalstórum fyrirtækjum um landið. Jón sýndi línurit sem greinilega sýndu viðbrögð fyrirtækjanna við ofurskattlagningunni sem greinilega snarkipptu úr fjárfestingaráformum þeirra. Þetta væri eitt dæmið um trú vinstri manna á skattheimtuleiðinni til að leysa skammtímavanda ríkissjóðs.Stefna Sjálfstæðisflokksins væri að byggja upp atvinnuvegi um landið allt sem reynslan hefði sýnt að væri það sem árangri skilaði.

Jón ræddi málefni stóriðju og orkuframleiðsluna. Fram kom að raforkuframleiðsla Íslendinga á mann er helmingi hærri en Norðmanna sem eru aftur helmingi meiri á mann  en framleiðsla iðnvæddu Evrópuþjóðanna. Við höfum því algera sérstöðu. Jón ræddi líka hugmyndir um sæstreng sem ræddur hefur verið milli Íslands og Skotlands án viðkomu í Færeyjum. Jón sagði að Íslendingar myndu aldrei kosta framleiðslu eða lagningu slíks strengs frekar en við hefðum byggt álverin hérlendis. En þetta þyrfti að rannsaka vel því margt mælti með raforkusölu um sæstreng og margt væri líka á móti. Þjóðin þyrfti að hámarka afrakstur auðlinda sinna. Stóriðja hefði fært okkur mikinn ávinning en hún væri ekki takmark í sjálfu sér, aðeins ein styrk stoð í efnahagslífi landsmanna. 

Jón ræddi ferðamannaiðnað landsmanna og taldi að ferðmannafjöldi færi fljótlega yfir milljónina. Ferðamenn sköpuðu núna um fjórðung af gjaldeyristekjum  landsmanna  sem væri mikil breyting á frá því á árum áður þegar að sjávarútvegurinn hefði einn staðið undir henni. Íslendingar þyrftu að stuðla að vali  á þeim ferðamönnum sem best af sér gefa. 

Fundarmenn deildu um álagningu virðisaukaskatts og kvaðst Jón vera hlynntur sem víðtækastri skattskyldu án undanþágna meðan vaskurinn leggðist ekki á björgunarsveitirnar! En þær eru sem fyrr alfa og omega í huga Jóns sem var þar í forsvari um árabil. 

Fundarmenn lögðu fjölda fyrirspurna fyrir Jón Gunnarsson sem svaraði þeim flestum af þeirri alúð og kostgæfni sem hann leggur á hvert mál. Það var þó að vonum að hann bað Sturlu bílstjóra sem er orðinn dyggur fundarmaður í félaginu að láta af þessum sífelldu spurningum sem láta að því liggja að allir útgerðarmenn séu þjófar og misyndismenn sem eigi stórreignir á Tortólaeyjum eða sólarströndum. Skipaðist Sturla nokkuð við þetta og kom með málefnalegar spurningar eins og oft áður því Sturla er vel heima í mörgum málum og aufúsugestur á þessum fundum.

Var gerður góður rómur að fyrirlestri Jóns Gunnarssonar og svörum við spurningum fundarmanna.  

Ástæða er til þess að hvetja alla til að mæta á þessa föstu fundi í Sjálfstæðisfélagi Kópavogs sem eru haldnir á hverjum laugardegi kl 10:00-12:00 í Hlíðarsmára 17. Þar er ávallt á boðstólum góðgæti fyrir huga og hönd eins og var í morgun á þessum ágæta fundi  með Jóni Gunnarssyni alþingismanni. 

Athugasemdir

[Jónatan Karlsson, 1.12.2013 kl. 11:41]

Góðan daginn Halldór.

Ég er þér fremur sammála um jákvæðni og góðan vilja Jóns Gunnarssonar, en á þó erfitt með að skilja hvernig þið erki Sjálfstæðismennirnir þarna á "Kópavogs fundunum" getið verið svo blindir og undirgefnir að vegsama valdbeitinguna í næsta nágreni við ykkur og er ég auðvitað að tala um vegalagninguna í Gálgahrauni, sem spillingar óþefinn leggur af langar leiðir.

Auðvitað mætti líka minna þig á borgarfulltrúana tvo í höfuðborginni, sem samþykktu aðalskipulagið og þar með dauðadóminn yfir Reykjavíkurflugvelli og verða síðan að launum líklega færðar upp í baráttusæti á framboðslista flokksins í vor.

Þið væri e.t.v. ráð í tilefni aðventu að bjóða sönnum Sjálfstæðismanni á borð við séra Halldór í Holti í næstu laugardags samkundu hjá ykkur og ekki þó endilega til að reka út illa anda, heldur aðeins til að vekja góða menn til umhugsunar og dáða.

[Halldór Jónsson, 1.12.2013 kl. 21:57]

Við erum því miður ráðalausir og valdalausir í þessu máli. Garðabær hefur Bessastaðavaldið hjá sér og hýða tilfallandi Jóna Hreggviðssyni.

Ég get sjálfur ekki séð af hverju gamla vegastæðið var ekki nógu gott.