Hvor sagði hvað?

Hvor sagði hvað — Össur eða Steingrímur?

Áskorun var í mbl.is sem ég tók þar sem ég hélt að það sem kæmi frá öðrum þessara tveggja væri auðþekkjanlegt af ýmsum sökum.

En ég klikkaði á þessu eins og mörgu öðru. Þessari einkunn var deilt til mín að loknu prófinu: 

 

"Þú fékkst: 10 / 15

 

Umsögn: Nokkuð gott. Þú fylgist prýðilega með umræðunni og lest helstu okkar helstu stjórnmálaskörunga eins og Andrés-blað. Það er ekki ólíklegt að þú hafir kosið Bjarta Framtíð í vor þó að málstaður Pírata hafi líka höfðað til þín."

Ég geld þess líklega að lesa frekar Andrésblöðin en bækurnar eftir þessa höfðingja. Eru þeir ekki bara að reyna að skrifa söguna upp á nýtt til að reyna að berja í bresti fyrir heimskupörin?

Össur og Steingrímur leystu engan vanda þjóðarinnar þó þeir væru að þvælast þetta í fjögur dimm og dáðlaus ár. Hefði Forsetinn ekki bjargað okkur frá því versta sem þeir ætluðu að klína á þjóðina þá værum við enn verr settir.  Ekki dettur mér í hug að fletta þessum bókum þeirra. Aðalatriðið er að þeir eru orðnir áhrifalausir nöldrarar sem fæstir taka minnsta mark á. 

Mig varðar akkúrat ekkert um það sem þeir skrifa eða segja.  Ég hef meiri áhyggjur af rústinni sem þeir skilja eftir sig. Og ég held að hvorki Píratar né þessi nýi próventuhafi Gnarrsins Guðmundur Steingrímsson hafi nokkur ráð sem duga mér.

Hér er bullandi kreppa ennþá. Allt er í hönk hvert sem litið er frá sjónum til þéttbýlisins. Ferðamennska er láglaunaiðnaður þar sem Íslendingar láta útlendinga féfletta sig. Ekki kemur hjálpræðið þaðan. Annar iðnaður er í limbó. Lífeyrissjóðir eru þeir einu sem  kaupa og kaupa allskyns innlent rusl eins og enginn sé morgundagurinn. Ríkið horfir aðgerðalaust á þá fara með skattféið í allskyns brask sem enginn veit hvernig muni enda.

Í stað þess gæti Ríkið hirt eignir sínar út úr þessum lífeyrissjóðum og borgað upp allar skuldir ríkissjóðs. Sem myndi skilja eftir sig 90 milljarða árlegan sparnað sem væri þá hægt að sukka með. Já til dæmis  í Landspítalann og Hörpuna svo eitthvað sé nefnt.

Hverslags linkind er þetta annars í þessum ráðamönnum okkar ? Af hverju sækja þeir ekki þessa réttmætu eign ríkissjóðs í stað þess að láta einhverja spekúlanta sem enginn kaus braska með og kannski tapa henni?

Af hverju erum við að láta ríkissjóð burðast með allar þessar skuldir þegar það á alla þessa peninga inni hjá þessum apparötum? 

Athugasemdir

[Guðmundur Jónsson, 15.12.2013 kl. 23:13]

Fékk 14 af 15 og umsögnina

þegar ég svaraði spurningunum reyndi ég að ímynda mér í hvaða samhengi þær pössuðu við tilsvör, annarsvegar trúðs (Össur) og hinsvegar kjána að reyna hljóma gáfulega (Steingrímur).

[Sigurgeir Jónsson, 16.12.2013 kl. 07:47]

Vandræðin eru þau eins og þú veist, að krónueignir í íslenskum krónum.og gildir þá einu hver á þær,þú ég eða lífeyrissjóðir,eru í raun einskis virði þegar til langtíma er litið.Til þess að skapa heilbrigt efnahagslíf verður að kasta íslensku krónunni endanlaga.Þú veist Halldór jafnvel og ég að það sem lifeyrissjóðirnir skrá í efnahagsreikningi er í skásta falli hægt að verðmeta sem 50% þegar litið er til næstu 10 ára.Þess vegna er hugsanlega skársti kosturinn að taka lífeyrissjóðina eignarnámi og gera upp skuldir ríkisins og gefa síðan gengið frjálst.Sjálfsögðu væri hægt að gera þetta á sama hátt með gjaldmiðils breytingi eins og bent hefur verið á varðandi snjójhengjuna.Það er engum til góðs að eiga ýmindaða peninga. 

[Sigurður Þórðarson, 17.12.2013 kl. 14:51]

Jóhanna styður Oddnýu Harðardóttur sem, segir Össur ekki fara með rétt mál um meintan ágreining þeirra varðandi þróunaraðstoð.