"Við eigum nóga peninga"

segir gersimin í banka allra landsmanna. Er eiithvað að því að kaupa lóð fyrir milljarð og toppa ÞG-Verk? Svo byggjum við nýjar höfuðstöðvar fyrir tífalt það verð. Kostar ekkert, bankamargfaldarinn sér um það eins og allir vita. Aðeins Seðlabankinn getur byggt ódýrar því hann greiddi með ávísunum á aðra þegar hann byggði "undir Svörtuloftum". "Situr enn með sollið fés...."

Það var ekki nóg þegar þjóðin felldi Icesave I,II og III. Nú skal þjóðin fá að borga Icesave IV í boði hans hátignar Steinþórs Pálssonar , litla 223 milljarða í gjaldeyri svo hann geti fengið að vera bankastjóri áfram í fallegri umgerð í Austurhöfninni. Og Steingrímur J.fái þar með uppreisn æru með forspárhyggju sinni.   Þeir Davíð og Bjarni geta séð um að útvega aurana sem vantar í heilbrigðisþjónustuna, fangelsið á Hólmsheiði og fleira smálegt sem síðasta ríkisstjórn lofaði landsmönnum.

Á þessi embættismaður ríkisins nokkurn sinn líka í stórhug og sjálfsáliti? Í alvöru?

Er ekki rétt að reisa styttu af honum við fjölfarna götu okkur almenningi til hughreystingar.Þá hættum við að væla og höldum kjafti því við öll hljótum að eiga "nóga peninga" án þess að vita það?

 

 

 

Athugasemdir

[Kjartan Sigurgeirsson, 15.5.2014 kl. 00:51]

Við verðum bara að vona að það verði ekki "byggt og búið" hjá þessum flottræflum.  Ef veislan er orðin svona fjörug finnst mér að við ættum að fá einhverja mola af veisluborðunum, ég hef ekki orðið var við neitt. 

[Halldór Jónsson, 15.5.2014 kl. 17:12]

Kjartan minn, ekki ertu þó að vonast eftir réttlæti? Þú ert nú lífsreyndari en það.

[Halldór Jónsson, 15.5.2014 kl. 17:14]

Hvaða athugasemdir voru annars gerðar við siðferðisstig bankastjórans í hans fyrra starfi? Meira að segja ítrekað. Þarf einhver að verða hissa á þessu útspili? Ekki Sigmundur Davíð að minnsta kosti.

[Kjartan Sigurgeirsson, 15.5.2014 kl. 20:32]

Rétt hjá þér Halldór, ég á það til að bulla eins og smákrakki.  Þekki ekki siðferðisstig bankastjórans, en það skyti skökku við, væri farið að gera siðferðiskröfur til þeirra, Velgengni banka virðist hafa verið í öfugu hlutfalli við siðferðisstig bankastjóranna.

[Kjartan Sigurgeirsson, 15.5.2014 kl. 20:35]

Ég fékk í dag skýringu á því af hverju það er LÍ svo mikið atriði að vera niður við höfn, en það ku vera vegna listaverks sem búið er að hanna við húsið. Passar víst illa annarsstaðar.