Líffræði?

Svo segir í Mogga: 

"Hólmfríður Gísladóttir [e-mail]

»Það er hlutverk fjárlaganefndar að hafa eftirlit með fjárlögum, þannig að það er mjög gott að nefndin ræki það hlutverk. Það var kallað eftir skýringum og við veittum skýringarnar og þá tel ég og vona að það sé fullnægjandi,« segir Ragnheiður Elín Árnadóttir, iðnaðar- og viðskiptaráðherra, um ummæli Vigdísar Hauksdóttur, formanns fjárlaganefndar, sem gagnrýndi í Morgunblaðinu í gær að 234 milljónir króna hefðu verið veittar til framkvæmdasjóðs ferðamannastaða án samþykkis Alþingis.

 

Í tilkynningu sem birt var á vef atvinnuvega- og nýsköpunarráðuneytisins á þriðjudag kemur m.a. fram að um hafi verið að ræða sérstaka úthlutun »vegna verkefna sem talin voru sérstaklega brýn vegna verndunar náttúru og öryggissjónarmiða«.

 

»Það var samþykkt þarna aukafjárveiting í ríkisstjórn á grundvelli þess að málið væri aðkallandi og þyldi ekki bið og færi þess vegna á fjáraukalög, með fyrirvara um samþykki Alþingis að sjálfsögðu,« segir ráðherrann.

 

En er þetta forsvaranleg aðferð - hvað ef Alþingi samþykkir ekki fjárveitinguna?

 

»Því verða þeir að svara sem fara með framkvæmdahliðina á lögunum,« segir Ragnheiður Elín en bendir á að ríkisstjórnin hafi verið einhuga í ákvörðun sinni og að stjórnarflokkarnir hafi drjúgan meirihluta á þingi......."

Er ekki náttúrleg líffræði  fyrir alla og líka ferðamenn að fá að tappa af veitingunum? Er það ekki brýnna en nýjar hellulagnir?

 

Svo segir enn i Mogga:

Ingileif Friðriksdóttir [e-mail]

Kaffihús og veitingastaðir í miðbæ Reykjavíkur þurfa að þola stríðan straum fólks sem eingöngu kemur inn til að nýta sér salernisaðstöðu staðanna. Hefur þetta gert það að verkum að margir velta því fyrir sér hvers vegna ekki séu fleiri almenningssalerni í miðbænum.

 

Starfsmenn kaffihúsanna Kaffitárs og Kaffi Sólon á Bankastræti og veitingastaðarins Le Bistro á Laugavegi voru sammála um það að töluvert væri um fólk sem kæmi inn á staðina til þess eins að nota salernið. Sólveig, starfsmaður Le Bistro, segir talsverðan fjölda fólks koma inn á staðinn á hverjum degi í þessum tilgangi. Hún segir þetta geta valdið óþægindum, sérstaklega þegar mikið sé að gera. »Fyrir utan kostnaðinn sem því fylgir í þrif og pappír og öðru,« bætir hún við.

 

Þjónar veitingahússins Café Paris taka undir þetta, og segja oft á tíðum röð myndast á salerni staðarins. Klósettin eigi fyrst og fremst að þjóna viðskiptavinum, og geti það orðið vandamál þegar þeir þurfi að bíða í röð fyrir aftan fólk sem einungis komi inn til að nýta sér aðstöðuna.

 

Á vef Reykjavíkurborgar kemur fram að almenningssalerni séu staðsett víðsvegar um miðbæ Reykjavíkur. Fjögur almenningssalerni séu í bílastæðahúsum í miðborginni, í Traðarkoti, Kolaporti, Vitatorgi og á Laugavegi 86-94. Kolbrún Jónatansdóttir, framkvæmdastjóri Bílastæðasjóðs, segir þessar upplýsingar úreltar, enda sé búið að loka öllum klósettunum. »Það er enginn mannskapur frá okkur í húsunum og þar af leiðandi neyddumst við til að loka þessum klósettum,« segir hún. »Það þarf að sinna þessu ef þetta á að vera opið.«

(Er þetta ekki dæmigert fyrir stjórn vinstrimanna á Reykjavík. Þeir hreinlega vita ekkii neitt um neitt?) 

 

Almenningssalernin sem virk eru í miðbænum eru því aðeins þau sjö sjálfvirku salerni sem eru á Frakkastíg, Hlemmi, Hljómskálagarðinum, á Ingólfstorgi, Mæðragarði, Ráðhúsinu og á Vegamótastíg. Stærsta almenningssalerni miðborgarinnar er þó í tónlistar- og ráðstefnuhúsinu Hörpu, að sögn Jakobs Frímanns Magnússonar, miðborgarstjóra Reykjavíkur. »Það er eitthvað sem ætti ekki að vera gert að viðvarandi ástandi,« segir hann.

 

Árið 2006 var starfshópi falið að skoða málefni almenningssalerna í Reykjavík og skilaði hópurinn skýrslu og tillögum til úrbóta í júní sama ár sem enn er unnið eftir.(SIC!) Hópurinn lagði meðal annars til að Núllið í Bankastræti, þar sem áður var almenningsklósett, yrði endurbyggt. »Pípulagnir og allt slíkt er til staðar og það er búið að teikna upp hús sem yrði sýnilegt í suðurátt frá Bakarabrekkunni, en það hafa ekki enn fengist peningar í það verkefni,« segir Jakob. Hann telur mikla þörf á fleiri almenningssalernum í miðborginni, enda sæki hundruð þúsunda manna borgina heim á hverju ári, og grunnþjónusta sem og salerni þurfi að vera til staðar. »Það þarf að mæta þessari nýju staðreynd sem blasir við núna með auknu streymi ferðamanna og bregðast hratt við,« segir hann. 

Jahá, Ný staðreynd að milljón ferðamenn þurfi að pissa? Gott hjá Jakobi. 

Makalaust að allir tala um ágæti ferðamannaiðnaðar. En engum detta í þær líffræðilegu staðreyndir sem fylgja? Mér sagt að víða um land séu salernispappírsleifar í hrúgum meðfram gönguleiðunum. Alveg í stíl við þjóðlegar hefðir gagnamanna.

Einföld líffræði?