Er ekkert að marka?

Á heimasíðu útvarps Sögu eru stöðugt skoðanakannanir í gangi. Þáttaka er misjöfn eins og gengur, frá hálfu þúsundi í mörg þúsund.

Nú segja sumir að hlustendur útvarps Sögu séu að stofni til öðruvísi en gengur og gerist, sérvaldir nöldrandi eldri borgarar eða hvaðeina. Og greinilegt er ef menn hlusta á innhringiþættina að þar kennir ýmissa grasa.

Ein slík er um það hvort draga eigi Steingrím J. til ábyrgðar fyrir meinta ólöglega sölu á bönkunum 2009? 88 % af 664 þáttakendum eru þeirrar skoðunar.

446 af 511 vilja að Alþingi grípi inn í skipulagsákvörðun meirihlutans í Reykjavík um að loka neyðarbrautinni á Reykjavíkurflugvelli. 

 Svo er spurt hvort eigi að afturkala leyfi til moskubyggingar á Reykjavík?

Þá greiða 368 atkvæði og 91 % eru á því að afturkalla slíkt leyfi.

Er eitthvað að marka svona kannanir? Það orkar tvímælis. En það má líka líta á þetta sem vísbendingu um tilfinningar almennings. Hvort sem þær séu hollar eður ei.Vulgus, Indoctus, Mobile,-- Horrendum Que sagði Rómakeisari um þegna sína!

Nú hafa stjórmálasamtök sett það á  stefnuskrá sína að opna fyrir möguleika á þjóðaratkvæðagreiðslur um hin ýmsu mál.  15 % kjósenda eiga að geta  komið slíkri atkvæðagreiðslu af stað að því að fregnir herma frá stjórnarskrárnefnd. Spurning hvort 16 % kjósenda geti með gagnundirskrift komið í veg fyrir slíka þjóðaratkvæðagreiðslu ?

Er þjóðin sjálf í jafnvel smáu úrtaki betur til þess fallin að taka þátt í slíkum þjóðaratkvæðagreiðslum. sérstaklega ef þær verða nokkuð tíðar eins og í Sviss. heldur en kjörnir fulltrúar afgreiði málin?

Í Sviss er þáttökuleysi sagt nokkuð áhyggjuefni. Er hætt við að þetta beina lýðsræðistal eins og síbylja Péturs Gunnlaugssonar á Útvarpi Sögu hljómar, verði bara leiðigjarnt til lengdar rétt eins og almenningur er orðinn leiður á pexinu á Alþingi?.

Eða er bara ekkert að marka neitt?

Athugasemdir

[Guðbjörg Snót Jónsdóttir (IP-tala skráð) 21.2.2016 kl. 13:16]

Ég hef löngum sagt, að það sé lítið að marka skoðanakannanir, enda sagði Ingibjörg Sólrún einhvern tíma, að þær væru ekki kosningar, sem er rétt. Tökum t.d. þessar svokölluðu skoðanakannanir, sem Rúv er sífellt að gera. Mér finnst jafnan lítið að marka þær, enda segi ég, að hver sem er getur látið gera skoðanakannanir um allan fjárann og látið þær koma út, eins og þeir vilja hafa þær. Við gætum gert skoðanakönnun um eitthvað, sem okkur finnst vera hagsmunamál eða sérstakt þjóðþrifamál, og komið því þannig fyrir, að þeir, sem við teljum, að myndu vera samþykkir því, ja, eða þá mótfallnir, séu í meirihluta. Væri mikið að marka slíka könnun? Þess vegna tek ég öllum skoðanakönnunum með fyrirvara.