Blöð dagsins

hafa nú fengið afgreiðslu hjá mér.

Helst til tíðinda er að prófessor doktor Þorvaldur Gylfason skrifa ágæta og fræðandi grein í Fréttó. Alveg afbragð og laus við venjulegar grillur, stjórnarskráratkvæðagreiðslur og ESB-bull. Hann getur þetta strákurinn.

Hann ræðir um merkilegt mál hvernig Norðmenn eru vakandi yfir því að yztu byggðirnar leggist ekki af með því að bankar og aðrir gleymi þeim ekki. Þessu er nefnkilega öfugt farið á Íslandi og óskandi að dr. Þorvaldur færi að skoða það hversu þessu er varið hérlendis.

Hér magnar Höfuðborgarsvelgurinn eins og ég kalla hann upp spennu í efnahagslífinu, keyrir upp húsnæðisverð unga fólksins og vinnur systematiskt gegn landsbyggðinni, t.d. með því að hvorki bankar sem önnur ríkisfyrirtæki  sjá ástæðu til að auglýsa í lókalblöðum landsbyggðarinnar. Það er bara Moggi og Fréttó sem skrifa mest um það sem er að gerast í  svelgnum sem fá auglýsingar hjá opinberum og raunar mörgum öðrum fyrirtækjum. Þeir sem hafa unnið við að afla auglýsinga í stórblöð á landsbyggðinni eins og SÁM FÓSTRA  þekkja þetta af 1.handar reynslu. Auglýsingastofur virðast margar vera sama sinnis, það er nóg að kynna vörur í Reykjavíkurmiðlum og þar með er landið afgreitt.

Grétar Snær skrifa magnaða ádrepu um hvernig Sjálfstæðisflokkurinn og aðrir eru að meðhöndla gamla fólkið. Raunar er Jón Ragnar líka að skrifa um þetta mál og gerir vel í að verja innræti flokksins. En Grétar Snær lýsir gjörðum flokksins hvað sem innrætinu líður.

Grétar segir m.a.:

"... Kjararáð er sjálfstætt ráð sem er falið það verkefni að ákveða laun og starfskjör æðstu embættismanna ríkisins. Í þeim hópi eru t.d. alþingismenn, ráðherrar, dómarar og ráðuneytisstjórar svo einhverjir séu nefndir.

Nú hefur ráðið komist að þeirri niðurstöðu að laun ráðuneytisstjóra, þrátt fyrir 9,3% launahækkun frá 1. mars 2015, séu algjör sultarlaun miðað við þá miklu ábyrgð sem þeir bera, hver svo sem hún nú er, og því beri nauðsyn til að hækka þau um 36-40%, þ.e.a.s. dagvinnulaun á mánuði. Að auki skal nú hækka „fasta yfirvinnu“ (sem áður hét „ómæld yfirvinna“) um litlar 450 þúsund krónur, úr 50 þúsund krónum á mánuði í 500 þúsund, lítil 900% – takk fyrir. Þessa „föstu yfirvinnu“ fá ráðuneytisstjórar greidda burt séð frá því hvort þeir skila einhverri yfirvinnu eða ekki.

Hér er ekki um neitt annað að ræða en dulbúna og svívirðilega launahækkun og með þessu hafa heildarlaun ráðuneytisstjóra hækkað, frá áramótum, um 73% á mánuði (72,7% fyrir þá sem vilja hafa þetta nákvæmt)...."

Maður er bara klumsa ef þetta er rétt hjá Grétari.

Jón Ragnar segir 

svo m.a.:

".... Sjálfstæðismenn eru alls engir aumingjar – þvert á móti dugandi fólk sem er best treystandi til að reka heilbrigðis og velferðarmál af ábyrgð, ásamt að byggja upp traustan efnahag sem staðist getur áföll. En við mættum gjarna svara fullum hálsi þeim sem saka okkur um siðblindu – það má enginn sitja þegjandi undir slíku."

Já ég segi nú Jón Ragnar, hvað finnst þér um það sem Grétar segir?

 

Og svo með þetta með milljarða á skúffubotnunum. Það er búið að ákveða að endurgreiða kvikmyndafélögum 25% af framleiðslukostnaði kvikmynda sem eru gerðar hér á landi. Alls kyns fólk er að setja um fleiri milljarðaverkefni í kvikmyndaiðnaði út á þetta. 

Ekki éta aldraðir og öryrkjar þessa peninga heldur frekar ráðuneytisstjórar. Hvaðan fær ríkið tekjur fyrir þessu á móti? Bara óbeint með hagvexti og hádújúlækæsland?

Ég spyr enn: Sjálfstæðisflokkur og Jón Ragnar, eru ekki að koma kosningar? Hafið þið séð sjónvarpsþætti Píratastelpnanna? Hvað ætlið þið að gera?

Svona eru blöð dagsins inspírerandi.

Athugasemdir

[Jón Ríkharðsson, 7.7.2016 kl. 13:13]

Mér er ljúft bæði og skylt að svara spurningunni sem þú beindir að mér Halldór minn.

Að sjálfsögðu voru þessar hækkanir rennblaut tuska í andlitið á fólki sem neyðist til að skrimta af lágum launum. Það er risavaxin gjá milli þings og þjóðar sem þarf að brúa - það verður ekki gert meðan stjórnvöld bregðast ekki við. Það þýðir ekkert að segja að hinn almenni launamaður þurfi að gæta hófs í launahækkunum og á sama tíma svona hækkanir til embættismanna - svo ekki sé talað um afturvirkar hækkanir til þingmanna á sama tíma og ekki var hægt að veita öldruðum og öryrkjum það sama.

Það skapast engin sátt ef hægt er að hækka verulega hjá ákveðnum hópum en ekki öllum.

Svo leiðist mér þegar þingmenn væla yfir lágum launum - þeir eyða hellings pening í að markaðssetja sig og grátbiðja fólk um að kjósa sig á þing. Þingfarakaupið er kannski ekki há laun - en það ættu flestir að ná að skrimta af 700.000. á mánuði.

Þá hef ég svarað þessari spurningu vinur - en þá seinni langar mig að ræða við þig beint, þannig að þú átt mögulega von á símtali frá mér þegar ég kem í land.

Sendi svo kæra kveðju frá Vestfjarðamiðum.