Rekstur Hörpu

hefur verið sveipaður leynd gagnvart almenningi.

Pétur heitinn Blöndal lagði fram á Alþingi Íslendinga eftirfarandi fyrirspurn um málefni Hörpu sem er þjóðareign og á líka að vera þjóðarstolt en ekki einhver þjóðarskömm sem ekki má ræða.

"

144. löggjafarþing 2014–2015.
     Þingskjal 1173  —  699. mál.

Fyrirspurn

 

til fjármála- og efnahagsráðherra um rekstur Hörpu, tónlistar- og ráðstefnuhúss.

 

Frá Pétri H. Blöndal.
    1.     Hve háum fjárhæðum hefur ríkissjóður varið árlega til reksturs Hörpu frá því að bygging hússins hófst? Hvert er framlagið áætlað 2015? Hverjar hafa verið tekjur, gjöld og sjóðstreymi á verðlagi hvers árs og uppreiknað miðað við vísitölu neysluverðs til mars 2015? 
    2.     Hafa framlög ríkisins til stofnana sem eru með rekstur í húsinu hækkað vegna flutnings þeirra þangað og ef svo er, hversu mikið? 
    3.     Hver er rekstrargrundvöllur Hörpu næstu 30 árin, tekjur og gjöld með og án afskrifta sem og sjóðstreymi? 
    4.     Hve há voru framlög ríkisins til tækjakaupa í Hörpu og hvað gerðu áætlanir ráð fyrir að verja mætti háum fjárhæðum til þeirra? 
    5.     Hvað er gert ráð fyrir háum fjárhæðum árlega til viðhalds hússins næstu 30 árin? 
    6.     Hve mikið kostaði glerhjúpur hússins og hver er árlegur rekstrar- og viðhaldskostn­aður hans? 
    7.     Hvers vegna hefur rekstraráætlun hússins, sem Ríkisendurskoðun fór á sínum tíma yfir og taldi í lagi, ekki gengið eftir og hver eru stærstu frávikin? 
    8.     Getur ríkissjóður hætt við skuldbindingu vegna samningsins frá 19. febrúar 2009 um að halda áfram framkvæmdum? Er ekki um að ræða skuldbindingu sem þarf að byggjast á heimild í fjárlögum, sbr. 40. og 41. gr. stjórnarskrárinnar? 


Skriflegt svar óskast."

Hvernig má það vera að viðkomandi yfirvöld komist upp með það að láta þessa fyrirspurn sem vind um eyru þjóta og svari henni ekki?

Nú er Hæstiréttur nýbúinn að breyta fasteignamatsaðferð ákveðinna húsategunda:

Svo segir í skýringabréfi frá Fasteignamati Ríkisins:

"Þjóðskrá Íslands reiknar fasteignamat samkvæmt gangverði á allar fasteignir. Við nýlegt endurmat á fasteignamati Hörpu var útbúin ný tekjumatsaðferð sem beitt verður á öll ráðstefnu og tónleikahús. Til grundvallar þeirrar aðferðar var meðal annars lagt eins og þú nefnir leiguverð tónlistarhúsa, ráðstefnurýma, skrifstofueigna og verslunareigna þar á meðal verð úr Hörpunni sjálfri."  

Nú skulu tónlistarhús, skrifstofu- og verslunarhús metin í þá veru að framvegis skulu aðeins miðað við rekstrarvirði slíkra húsa en ekki byggingakostnað. Samkvæmt þessu eru fasteignagjöld af Hörpu líklega aðeins reiknuð af hálfum byggingarkostnaði hennar.

Getur þá eigandi t.d.verslunarhúss ákveðið sér fasteignagjöld af því  sjálfur með því að ákvarða leiguverðið eftir sínu skaplyndi?

Almenningur verður eftir sem áður að greiða gjöld af sínum húseignum miðað við fasteignamat FR sem tekur mið af hæsta söluverði slíkra eigna, alveg óháð því hverjar tekjur fást af eigninni.Tilkynning þessa efnis berst skattþegni á hverjum áramótum sem kunnugt er frá sveitarfélagi.

Er þetta í samræmi við almennar jafnræðisreglur þjóðfélagsins? Eru sumir jafnari en aðrir?

Ef rekstur Hörpu eða annað atvinnuhúsnæði þolir ekki að greiða fasteignagjöld sem aðrar húseignir landsins, er þá ekki ástæða til að endurskoða leiguverð slíkra húsa í stað þess að Hæstiréttur búi til svona sérreglur fyrir ákveðna flokka mannvirkja?