Neyðarbrautin er opin!

hvað svo sem Dagur Bergþóruson streitist á móti.

Á Veggnum stendur þetta:

 

"Jóhannes Loftsson verkfræðingur skrifar opið bréf til Innanríkisráðherra sem birtist í Morgunblaðinu. Þar dregur Jóhannes fram staðreynd varðandi Reykjavíkurflugvöll sem lítið hefur heyrst í umræðunni. Bréf Jóhannesar varpar ljósi á þá staðreynd að tilgangi Reykjavíkurflugvallar hefur verið breytt, án heimilda að því virðist og án þess að nokkur ætli að bera á því pólitíska ábyrgð.

Reykjavíkurborg og Innanríkisráðherra byggja niðurstöður sínar m.a. á útreikningum Eflu verkfræðistofu á nýtingarstuðli Reykjavíkurflugvallar. Svo virðist sem Eflu menn hafi unnið verkið undir miklum þrýstingi frá meirihluta borgarstjórnar þar sem verkfræðistofan á mikla hagsmuni í viðskiptum sínum við borgina eins og Veggurinn hefur áður bent á.

Jóhannes bendir á hér í grein sinni að útreikningar Eflu eru rangir samkvæmt þeim lögum og reglum sem um þá gilda. Það vekur þá spurningu hvort hér hafi hagsmunir orðið til þess að rangt var reiknað eða hvort hér hafa verið gerð afdrifamikil mistök. Jóhannes vill fá skýr svör um það hver það var sem tók ákvörðun um að breyta hlutverki Reykjavíkurflugvallar. Veggurinn tekur undir með Jóhannesi að algerlega er nauðsynlegt að upplýsa hver það var sem tók þess ákvörðun. Valdnýðslu á mögulega uppdiktuðum forsendum er ekki hægt að líða.

Bréf Jóhannesar úr Morgunblaðinu er hér birt í heilu lagi.

———

„Kæri innanríkisráðherra.

Í grein 3.1.1. í VI. hluta reglugerðar 464/2007 um flugvelli segir:

„Fjöldi og stefna flugbrauta á flugvelli ætti að vera slíkur að notkunarstuðull flugvallarins sé ekki minni en 95% fyrir flugvélarnar sem flugvöllurinn þjónar.“

Þetta þýðir að reikna þarf notkunarstuðul fyrir allar flugvélar sem flugvöllur þarf að þjónusta, ekki bara fyrir stærri áætlunarflugvélarnar sem þola meiri hliðarvind. Sá skilningur fer ekki milli mála, því ef Flugfélag Íslands mundi t.d. einhvern tímann í framtíðinni ákveða að flytja alla starfsemi sína á Keflavíkurflugvöll, þá væru eingöngu eftir minni flugvélar á Reykjavíkurflugvelli, en engir útreikningar fyrir hendi sem sýndu að krafan um nothæfisstuðul upp á 95% væri uppfyllt.

Í nýlegu áhættumati vegna lokunar neyðarbrautarinnar á Reykjavíkurflugvelli var hins vegar ekki reiknaður notkunarstuðull fyrir minni flugvélar.

Eina réttmæta forsenda þess að ekki þyrfti að taka tillit til lendingarskilyrða minni flugvéla á Reykjavíkurflugvelli væri ef fyrir lægi ákvörðun stjórnvalda um að hlutverki Reykjavíkurflugvallar væri breytt þannig að ekki ætti lengur að miða við það að Reykjavíkurflugvöllur þurfi að þjónusta minni flugvélar. Þar sem allt sjúkraflug fer fram minni flugvélum, þá er hér um meiriháttar stefnubreytingu yfirvalda að ræða, sem getur m.a. haft áhrif á hátt í 30 sjúkraflugsferðir á ári og mun nær áreiðanlega kosta mannslíf þegar fram í sækir. Fólk hefur því rétt á að vita hver ber ábyrgð á þessu.

Sem yfirmaður samgöngumála átt þú sem innanríkisráðherra að geta svarað þessu. Var þetta ákvörðun ríkisstjórnarinnar? Var þetta ákvörðun þín, innanríkisráðherra? Var þetta ákveðið af Samgöngustofu sem fór yfir áhættumatið um lokun neyðarbrautarinnar? Var þetta ákveðið af ISAVIA sem stýrði áhættumatinu… eða var það Verkfræðistofan Efla sem reiknaði notkunarstuðulinn og ákvað að breyta hlutverki Reykjavíkurflugvallar? Hver ákvað að breyta hlutverki Reykjavíkurflugvallar?

Reikniskekkjur má leiðrétta
Ef þú, innanríkisráðherra, hefur ekki komið að þessari ákvörðun, þá er þetta ólögleg reikniskekkja, því hvorki ráðgjafaverkfræðistofur né undirstofnanir þínar mega taka sér slíkt vald.

Mögulega væri hægt að stöðva þetta einfaldlega með því að ítreka það við Samgöngustofu, sem yfirfór áhættumatið, að ISAVIA hafði enga heimild til að breyta hlutverki Reykjavíkurflugvallar í áhættumatinu. Í ljósi þessara nýju upplýsinga er ekki útilokað að Samgöngustofa gæti hafnað öllum frekari leyfisveitingum vegna breytinga flugvallarins eða dregið til baka útgefin leyfi.

Ef af einhverjum ástæðum, lagalegum eða stjórnskipunarlegum, ekki er hægt að beita þessari aðferð, þá hvílir siðferðisleg skylda á Alþingi að grípa inn í á einhvern hátt. Það er einfaldlega ekki boðlegt að Alþingi sitji hjá og láti reikniskekkju ráða jafn afdrifaríkri ákvörðun og þessari sem getur haft áhrif á líf og heilsu fjölda fólks.“

 

Það er engum blöðum um að fletta að lokun brautarinnar er óhæfuverk log ólöglegt. Virt verkfræðistofa liggur undir ámæli fyrir að skrifa áhættumat fyrir Reykjavíkurflugvöll á röngum forsendum sem þjóna pólitískum tilgangi.

 

Innanríkisráðherra ber skylda til að láta þetta mál til sín taka með röggsömum hætti.  

 

 

 

Athugasemdir

[Jónatan Karlsson, 15.5.2017 kl. 22:04]

Sæll Halldór.

Þessi beinskeytta ákæra Jóhannesar Loftssonar stendur sannarlega meitluð á vegginn, þó svo embætti innanríkisráðherra sé gufað upp og eftir standi Sigríður Á. Andersen með dómsmálin og Jón Gunnarsson með samgöngu og sveitastjórnarmál.

Jón þessi sagði reyndará Sprengisandi s.l. sunnudag að heildar útgjöld til vegamála á Íslandi þetta ár yrðu u.þ.b. 11 milljarðar.

Þetta sama fólk samþykkti nýlega að bæta a.m.k. fjórum milljörðum við Vaðlaheiðargöngin og bara si svona láta almenning axla ábyrgðina og fyrirsjáanlegt 20 til 30 milljarða tapið á því glæpsamlega kjördæmapoti.

Það er því miður ekki líklegt að þetta fólk taki af skarið og stöðvi framkvæmdir Valsmanna í Vatnsmýri, né annað gróðabrall íslensks aðals.

[Valur Arnarson, 16.5.2017 kl. 14:35]

Sæll Halldór sem og aðrir gestir þínir,

Vissulega er einkennilegt hvað Framsókn og Sjálfstæðisflokkur hafa lítið staðið í lappirnar í þessu máli öllu, þrátt fyrir fögur fyrirheit, og má þar sérstaklega nefna Bjarna Ben núverandi forsætisráðherra en honum til varnar átti hann ekkert val eftir dóm Hæstaréttar varðandi lokun Reykjavíkurflugvallar.

Sök Samfylkingar og Vinstri grænna er hins vegar mikil í málinu þar sem Dagur B. og Katrín Jakobs, þáverandi fjármálaráðherra, gerðu bindandi samning 1. mars 2013 um skipulag og uppbyggingu á landi ríkisins við Skerjafjörð. Aðeins þyrfti að bíða eftir lokun brautarinn til að afsal yrði afhent. Þessi aðför að flugvallarsvæðinu verður þessu fólki til ævarandi skammar.