Ljón Norðursins

er stórfengleg bók sem mér barst í hendur og ég mæli eindregið með að menn lesi.

Höfundurinn er Bjarki Bjarnason sem skapar ljóðrænt ævintýri  um þann sérstæða athafnamann Leó Árnason frá Víkum á Skaga. Hann fer ungur að heiman og á síðan ótrúlegt líf athafna og dugnaðar næstu áratugi. Upp úr miðjum aldri missir hann heilsuna og miklar veraldlegar eigur sínar en gengur þá Listagyðjunni á hönd og Guð Almáttugur bjargar honum úr sálarháska og leiðir hann síðan með sér um andlegar víðáttur þegar hann á í miklum nauðum.

Sonarsonur söguhetjunnar Leós Árnasonar og alnafni gefur bókina út árið 2016.Sá er þekktur einnig þekktur athafnamaður og fjörbolti eins og afinn var á léttasta skeiði og hefur hann að mínum dómi unnið þarft verk með útgáfunni.

Söguhetjan lifði tímana tvenna. Meðal mestu athafnamanna landsins um langa tíma. En lifir svo annað líf síðan gerólíku hinu fyrra eftir geðhvarfasýki sem yfir hann hellist á miðjum aldri.

Hann var á þeim árum ótrúlega sérstæður í fasi og framgöngu. Ég hitti hann þá heima hjá Ólafi Jónssyni athafnamanní í Hlöðum við Auturveg. Líður mér hann seint úr minni hversu hann var mikill stuðningsmaður dr.Gunnars Thoroddsen á  þeirri stundu sem ekki voru allir sammála um.

Mér var sögð sú saga, að þegar Sverrir Kristjánsson sá mikli sagnfræðingur var allur og kista hans stóð fyrir altari og kirkjunni hafði verið lokað, þá hefði kirkjuhurðinni skyndilega verið hrundið upp og mannvera með barðasíðan hatt og íklædd svartri skikkju með eldlitu fóðri sem flaksaðist til yfir svörtum fötum snaraðist inn gólfið með köldum gusti. Sumum viðstöddum hélt við yfirliði við þessa sýn. Þessi hefði gengið að kistunni snúðugt, hefði svo slegið bylmingshögg í hana með silfurbúnum staf sínum. Og stikað síðan sömu leið til dyra. Þar hefði Ljón Norðursins kvatt vin sinn Sverri Kristjánsson hinstu kveðju.Ég tek fram að ég hef þessa sögu eftir öðrum.

En bókin Ljón Norðursins gerist eiginlega á mörkum ævintýra og veruleika, drauma og vöku, svo meistaralega fer höfundur með efnið sem verður lífssaga mannsins sem kallaði sig svo eftiminnilega Ljón Norðursins en hét öðru nafni Leó Árnason og var athafnamaður frá Víkum á Skaga,byggingameistari hundruða húsa, hótelhaldari, Ísborgarstjóri með stórmennum þeirra tíma, fiskverkandi með meiru þar til að nýr kafli lífs hans hófst án þess að hann fengi rönd við reist.

Lesandinn verður sjálfur að dæma um það hvor maðurinn sé honum áhugaverðari, Leó Árnason hinn ofurduglegi þúsundþjalasmiður frá Víkum á Skaga eða listamaðurinn Ljón Norðursins. Hvorugur lætur hann ósnertan.

Athugasemdir

[Pétur Örn Björnsson (IP-tala skráð) 25.6.2017 kl. 15:05]

Ég man vel ljón norðursins á síðara stigi lífs hans, hann var sérstæður og mikilúðlegur í ponsjónum á Krók benskunnar.  Fór þar hamförum í listsköpun, sem minnti um margt á Samúel að vestan, byggði þar skúlpúra mikla í garði frænda sinna á bílaverkstæðinu Áka.  Þeir voru allir góðir drengir, ættaðir af Skaganum.  Þótti þeim öllum sopinn góður sem Skagfirðinga er háttur, eigi til leiðinda heldur gleðinnar og sköpunarinnar einnar.  Það er til hins góða þegar einstaklingar þora að vera sem þeim sýnist, þó án þess að nokkur beri skaða af.  Þannig var með Leó og alla hans frændur.

[Halldór Jónsson, 25.6.2017 kl. 18:16]

Pétur,

ég var að keyra trukk hjá honum RARIK 1956 þá fór ég oft með hann til viðhalds á bílaverkstæðið ÁKA á Sauðárkróki. Segðu mér meira hvernig þeir tengdust Leó. Var ekki nafnið ÁKI eftir upphafsstöfum strákanna á verkstæðinu? Þetta voru prýðis strákar og góðir fagmenn man ég.

[Pétur Örn Björnsson (IP-tala skráð) 25.6.2017 kl. 18:54]

Sæll Halldór,

jú, það er rétt, Á stóð fyrir Árna, mikinn sjálfstæðismann og félaga pabba, Björn Daníelsson, í bæjarmálapólitíkinni og I stóð fyrir Ingólf (Olla á Áka) bróður Árna.  Mig brestur hins vegar minni fyrir hvern káið stóð, en sá var ekki bróðir þeirra.  Pálmi Jónsson var þar einnig, mikill og góður sjálfstæðismaður.  Varðandi skyldleikann, þá minnir mig að Leó hafi verið föður- eða móðurbróðir þeirra.  Á þessum tíma skiptust menn mjög í flokka hvort þeir skiptu við frjálsa menn eða kaupfélagið, mín fjölskylda var öll alin upp við að skipta við hina frjálsu menn :-)  Nú ræður KS þar öllu.  

[Pétur Örn Björnsson (IP-tala skráð) 25.6.2017 kl. 19:22]

Ein viðbót, þeir bræður Árni og Ingólfur voru Guðmundssynir, góðir drengir á allan hátt.