Ný Vaðlaheiðargöng?

með miklu vatni á að byggja undir stórfljót fyrir fluglestina sem á að tengja BSÍ og Keflavíkurflugvöll um Smáralind. Á virku eldsumbrotasvæði margra eldfjallakerfa.  

Auðvitað er þetta verkfræðilega leysanlegt eins og allt.Aðeins spurning um kostnað. Frá þessum göngum verður ekki hægt að skapa sjálfrennsli ef vatnið sækir á.Þarna verða nýjar áskoranir þar sem stórt neðanjarðarfljót þverar gangnastæðið. Nú á að safna 1500 milljónum til að fara í rannsóknarvinnu  fyrir þessi göng. Hvað þau muni kosta hefur ekki verið mikið rætt um og kannski best að tala sem minnst um það ef þau skyldu fara fram úr áætlunum.

En það er með þessa framkvæmd eins og Borgarlínuna að það er líklega best að tala sem minnst um það hvort hana vanti eitthvað sérstaklega. Tvíbreiður vegur fyrir bíla til Keflavíkur styttir ferðatímann þangað niður í hálfa klukkustund. Bensínkostnaður kannski þúsundkall.Fargjald með lestinni er boðað fimmþúsundkall.Það gefur auga leið að sameiginlegir sjóðir hljóta að koma að þessu máli eigi fjármagn að fást.

96 % landsmann hefur valið sér einkabílinn sem samgöngumáta.Að leggja slíka ofuráherslu á að greiða fyrir því að 4 % landsmanna komist eitthvað hraðara milli íbúðarhverfa finnst leikmanni nokkuð merkileg niðurstaða þeirra stjórnmálamanna sem maður trúði fyrir atkvæði sínu í síðustu sveitarstjórnarkosningum. Þó að þeir segi að þetta sé ekkert að fara að gerast strax, þá dugar það ekki. Að tími mislægra gatnamóta sé liðinn í Reykjavík finnst manni furðuleg yfirlýsing þar sem maður situr fastur í umferðinni á Miklubrautinni.

Þegar maður horfir á vegbrýrnar á höfuðborgarsvæðinu þá hvarflar hugurinn ósjálfrátt til Florida. Hérna virðast brýrnar vera leikvellir verkfræðinga til að búa til minnismerki um sjálfa sig með ryðfríum súlum og fleiri leikfléttum.Þar vestra eru brýrnar mest byggðar úr lurkslegum ljósdrapplitum steypueiningum sem undirstöður og grænum bitum, gjarnan úr stáli. þetta er svo einfalt í sniðum og fallegt tilsýndar þar sem þær fléttast hvor undir og yfir aðra, með halla og beygjum að mann setur hljóðan. Floridabúar ferðast á einkabílnum hvert sem þeir fara. Enda vegirnir og umferðarkerfið stórkostlegt. Strætóar ganga fyrir þá sem hafa nógan tíma og lítið fé enda þeirra tími ódýrari en  stressmanna, -hefur þó ekkert með jafnréttishugsjónina að gera.

En eins og einn gamall samstarfsmaður minn sagði einhvern tímann þegar honum líkaði eitthvað stórilla í forordningum fyrirtækisins: "Um að gera að hafa það bara nógu vitlaust" Og sagði svo upp eftir langt og gott starf.

Vitleysan verður að hafa sinn gang. það er það eina sem við getum reitt okkur á. Hvort heldur eru einkaframkvæmdir sem enda sem kostnaður þjóðarinnar eða hverskyns hugsjónir hinna stórhuguðustu meðal vor.

Vaðlaheiðarfastinn stefnir ávallt á pí eins og ég hef margsagt að gildi um flestar opinberar áætlanir sem stjórnmálamenn boða sem fagnaðarerindi sín fyrir skattgreiðendur.

 

Athugasemdir

[Valdimar Samúelsson, 27.6.2017 kl. 20:13]

Væri ekki hægt að koma upp fljóta ferju ferðum á vaðla-gangna-fljótinu.

[Jón Ingi Cæsarsson, 27.6.2017 kl. 20:58]

Enn einu sinni. Vaðlaheiðargöng eru ekki opinber framkvæmd og stjórnmálamenn eiga þar ekki hlut að máli.

En að fara með rétt mál og halda til haga sannleika og staðreyndum er ekki það sem sumum hugnast.

Og Valdimar, það var mörgum sinnum meira vatn á ferðinni í Vestfjarðargöngum og Héðinsfjarðargöngum þannig ef þig langar að sigla væri nær að fara þangað nema þú sért kulsæll og lætur þig hafa volga lækinn í Vaðlaheiðargöngum :-)

[Valdimar Samúelsson, 28.6.2017 kl. 09:41]

Jón ég vil frekar heitu ferjuna hugsaðu þér fljótaferja á heitu vatni inn í fjalli. :-)