Efling

er milljarðakompaní sem kommúnistar hertóku með 8 % atkvæða í stjórnarkjöri.

Sú yfirtaka hefur væntanlega skilað þeim persónulegum hagnaði en kostað þjóðfélagið ómældar fjárhæðir vegna afleiddra athafna. Valdafólkið hefur svo líklega komið fyrir sogrörum sínum í sjóði félagsins en hreinsað út alla starfsmenn sem hafa aðrar skoðanir.

Svo segir í Staksteinum Morgunblaðsins:

"Verkalýðsfélagið Efling hefur í þeim kórónuveirufaraldri sem geisað hefur vikum saman hér á landi haldið úti verkföllum í viðbót við nær óviðráðanlega ógn. Þetta hefur verið óskiljanlegt flestu fólki og algerlega úr takti við ástandið í samfélaginu.



Svo kom að því að verkföllin voru hætt að skipta máli enda lítið starf í skólum og æ færri sem hafa áhuga á að senda börn sín þangað og þá slær Efling verkföllum sínum á frest.

Tilgangurinn virðist eingöngu að spara verkfallssjóðinn og halda í það litla álit sem forysta félagsins nýtur enn.



Enginn skyldi halda að frestun verkfallanna sé af góðum hug, að samningsviljinn hafi gert vart við sig eða að kröfurnar hafi nálgast raunveruleikann, enda fylgja hótanir um að setja af stað jafnvel enn meiri verkfallsaðgerðir „innan nokkurra vikna“.



Að auki fylgdi tilkynningu um frestun árás á þau sveitarfélög sem ekki vilja beygja sig undir fráleitar kröfur um að semja langt umfram það sem aðrir hafa gert. Það er að segja aðrir en Dagur.



Í tilkynningunni segir að þessi sveitarfélög hafi verið ósvífin og að þau hafi „kosið að nýta sér faraldurinn á einstaklega ómerkilegan hátt til að hamla eðlilegum framgangi viðræðna“. Þá er því hnýtt við að skömm Sambands íslenskra sveitarfélaga sé mikil. Þetta eru ótrúleg öfugmæli, jafnvel komin frá sendlum sósíalistaleiðtogans."

Væntanlega er átt við Gunnar Smára Egilsson.

Þetta er í rauninni athyglisvert. Að harðsnúin klíka skuli geta lagt undir sig verkalýðsfélag með milljarða í sjóðum og efnt til slíkra viðburða á vinnumarkaði í nafni samúðar með hinum fátæku. Verður við það búið til lengdar að örlítill minnihluti geti lagt undir sig jafn áhrifamikil félög á vinnumarkaði og Efling er?

En hvaðan á það fé að koma sem minnkar fátækt hjá völdum hópum? Hverjir þurfa að reiða það fram úr sínum vösum? Foreldrar leikskólabarna? Barnlaust fólk? Aldraðir og öryrkjar með sköttum sínum? 

Hafa menn heyrt eitthvað frá forystufólki Eflingar um þau atriði?