PR mál Sjálfstæðisflokksins

eru lítið fagnaðarefni hins almenna flokksmanns að því að mér heyrist. Flokksmenn viðurkenna fúslega að formaðurinn beri höfuð og herðar yfir samþingmenn sína.En þar lýkur sögunni.Þeir tala um forystuleysi og skort á eldmóði. Eldmóði er yfirleitt ekki fyrir að fara hjá kontóristum. Til þess þarf aðra hæfileika og einbeitingu.

Það er eiginlega fagnaðarviðburður að formaðurinn drepur niður penna til þess að fara yfir hvað áunnist hefur í stjórnartíð flokksins á þeim erfiðu tímum sem við á lifum.

Bjarni Benediktsson skrifar í Fréttablaðið í dag:

"Sólskin síðustu daga er táknrænt fyrir tímana sem nú fara í hönd. Það birtir til og hlýnar og við lesum góðar fréttir dag eftir dag. Vel yfir 100 þúsund Íslendingar hafa fengið allavega fyrri skammt bóluefnis. Bjartsýni eykst hjá íslenskum fyrirtækjum og fleiri sjá fram á fjölgun starfsfólks en fækkun. Þotur hefja sig til flugs og það styttist í að heimurinn opnist á ný, hægt og rólega.

Undanfarið höfum við sett fram skýrar áætlanir um framvinduna. Gangi allt að óskum vonumst við til að draga úr sóttvarnaaðgerðum innanlands næstu vikur og afnema þær loks í lok júní, þegar meirihluti fullorðinna hefur fengið minnst eina sprautu. Við endurheimtum brátt eðlilegt líf.

Fyrir helgi kynntum við auk þess framlengingu og smíði nýrra úrræða til að styðja áfram við fólk á lokametrunum. Nefna má framlengda úttekt séreignar og framlengda og útvíkkaða viðspyrnustyrki, þar sem lágmark tekjufalls lækkar niður í 40%, afturvirkt.

Við greiðum út sérstakan barnabótaauka, framlengjum og útvíkkum lokunarstyrki, heimilum hliðrun stuðningslána og framlengjum frestun skattgreiðslna.

Við innleiðum styrki til endurráðninga, kynnum græna fjárfestingarhvata og nýja ferðagjöf. Áfram mætti lengi telja. Alls eru úrræðin á annan tug og var lögð sérstök áhersla á að hlusta á ábendingar úti í samfélaginu um hvað mætti gera enn betur.

Þrátt fyrir allt hefur gengið vel síðustu mánuði. Kaupmáttur jókst í fyrra þrátt fyrir heimsfaraldurinn og innlend eftirspurn dróst lítið saman.

Að mati Alþjóðagjaldeyrissjóðsins stuðluðu viðbrögð stjórnvalda að betri þróun en flestir gerðu ráð fyrir, en við byggðum á traustum grunni hagstjórnar síðustu ára. Aðgerðirnar veittu ekki bara skjól, heldur einnig nauðsynlegt súrefni til fyrirtækja til að halda sjó og ná vopnum sínum á ný þegar birtir til.

Við þetta bætist fjárfesting í nýsköpun, rannsóknum og þróun – sem saman munu stuðla að fjölda nýrra starfa og draga hratt úr atvinnuleysi á komandi misserum.

Veturinn einkenndist af óvissu og vörn, en nú horfum við til framtíðar. Sumarið verður tími endurreisnar og sóknar."

Þetta er vel orðuð lýsing á því sem ríkisstjórnin hefur aðhafst í vandanum sem við er að etja. En ef þetta er ekki þulið upp fyrir kjósendum líta þeir á þetta sem náttúrulögmál sem sé engum sérstökum að þakka. Bara sjálfsagðir hlutir sem hafi dottið af himnum ofan.

 

Við flokksmenn ætlumst til þess að forystuliðið hafi forystu um að forframa flokkinn nú í aðdraganda kosninga. Þð væri skelfilegt fyrir þjóðina ef litlu ljótu flokkarnir eiga að hagnast á því að betur hafi gengið en til stóð á tímabili og kjósendur átti sig ekki á því að þeir litlu ljótu áttu þar engan hlut að máli í hlálega lélegri stjórnarandstöðu sinni.

Sjálfstæðisflokkurinn verður að fara að verða sýnilegri sem flokkur og halda betur fram hugsjónum sínum.Hann á að hafa aflið til þess.

Hann verður að taka af skarið með að Viðreisn hafi klofið sig frá til þess eins að ganga í ESB. Það fullveldisframsal styðji Sjálfstæðisflokkurinn aldrei heldur vilji frjálst og óháð Ísland eins og verið hefur frá lýðveldisstofnun 1944.

PR mál Sjálfstæðisflokksins eru ekki í því lagi sem flokksmenn vilja. Þeim finnst að tali flokkurinn ekki fyrir sjálfum sér þá geri það enginn fyrir hann.

Allir verða að leggjast á eitt og síst má formaðurinn spara sig í þeirri PR baráttu.

Athugasemdir

[Tómas Ibsen Halldórsson, 4.5.2021 kl. 14:54]

Góðir og öflugir flokksformenn hrífa flokksmeðlimi með sér og ná út fyrir raðir eigin flokks. Góðir flokksformenn eru þeir sem flokksmenn bera traust til og flokksmen tilbúnir að fylkja sér bak við. Svo er ekki að sjá hvað BB varðar. Hann talar ekki skírt um þau málefni sem skipta máli s.s. ESB, Orkupakka o.fl. virðist vera tvístíga í mikilvægum málaflokkum.

Hann virðist ekki treysta mönnum sem setið hafa lengur en eitt kjörtímabil á þingi þegar kemur að ráðherra vali. Góður flokksformaður og hugsjónamaður missir ekki frá sér fylgi eins og BB hefur gert.

Góður flokksformaður rústa ekki fylgi flokks síns en heldur þétt utanum það og eykur frekar fylgið heldur en hitt.

Góður flokksformaður lætur ekki stjórnmálaályktanir flokks síns sem vind um eyru þjóta. En það er það sem BB hefur gert.

Sjálfstæðisflokkurinn hefur tapað verulegu fylgi í tíð BB.

Sjálfstæðisflokkurinn er ekki svipur hjá sjón.