Af hverju Sjálfstæðisflokkurinn?

frekar en aðrir flokkar?

Það skiptir máli að greina stefnu flokksins og gera sér ljóst í hverju stefna flokksins er frábrugðin til dæmis landssöluflokkunum,Samfylkingunni og Viðreisn sem eiga þá hugsjón eina að gangast undir erlent vald í Brussel. Hætta að hugsa sjálfstætt og og taka bara við fyrirskipunum frá 27 öðrum stærri ríkjum en Ísland er. Taka upp gjaldmiðilinn Evru og mynda tollabandalag gegn meirihluta heimsins og takmarka þannig verslunarfrelsi Íslands

Og svo að þetta sé ekki nóg vilja þessir flokkar stofna her með þessum ríkjum og gera Íslendinga herskylda í Evrópuhernum.

Fyrirlitlegri stjórnmálastefnu get ég ekki gert mér í hugarlund sem Íslendingur sem var á Þingvöllum við lýðveldisstofnunina 17.júní 1944 og upplifði það stolt sem þar ríkti þá.

Óli Björn Kárason hefur hugsað mikið um hversvegna hann fylgir Sjálfstæðisflokknum. Hann hefur gert upp við sig að hann fylgir aldrei Viðreisn þó að sá flokkur þykist vera honum andlega skyldur. Fullveldisfyrirlitningin greinir Viðreisn frá Sjálfstæðisflokknum þannig að þar á milli verða engar brýr byggðar nema af Viðreisn sjái eignhagsmuni í slíkri kaupmennsku sem ég vona að ekki þurfi nokkru sinni að kaupa af slíkum valdabraskflokki.

Óli Björn sækist eftir 2. sæti í Suðvesturkjördæmi í prófkjöri. Dóttir mín Karen Elísabet sækist eftir 3. sæti á lista Sjálfstæðisflokksins í sama kjördæmi.Hún er sömuleiðis eins og Óli Björn alveg skýr á því hversvegna hún er Sjálfstæðismaður en ekki ESB sinni í Viðreisn eða Samfylkingarkrati.

Það þarf víst ekki lengi að hvetja mig til að taka þátt í prófkjörinu í kraganum hjá Sjálfstæðiflokknum sem fer fram í sumar.

Og af hverju ég kýs Sjálfstæðisflokkinn í haust en ekki landsöluflokka  er augljóst mál. 

Athugasemdir

[Vagn (IP-tala skráð) 12.5.2021 kl. 22:02]

Hræðsla Sjálfstæðisflokksins við lýðræðið er áberandi í þessu ESB máli. Þeir vilja ekki fyrir neina muni að þjóðin fái að ákveða hvort inn verði farið eða ekki. Og stefna Viðreisnar, klofningsframboðs lýðveldissinna úr Sjálfstæðisflokknum, er að samningar verði kláraðir og þjóðin fái að velja. Fyrir það eru þeir kallaðir landsöluflokkur af þeim sem hræðast lýðræðið og óttast vilja þjóðarinnar.

Minnir okkur á að Sjálfstæðisflokkurinn var helsti stuðningsaðili og verndari hernámsliðs Bandaríkjamanna. Gæðingar flokksins fengu frjálsar hendur við að mjólka þá kú og stinga innkomunni í eigin vasa. Og Sjálfstæðisflokkurinn mátti ekki heyra minnst á að þjóðin fengi eitthvað val í þeim málum. Munum einnig að Sjálfstæðisflokkurinn, þegar Davíð Oddsson var einræðisherra, kom okkur í EES án þess að þjóðin hefði nokkuð um það að segja og ekki lét hann þjóðina heldur ákveða með Schengen. Og gleymum ekki að í skjóli myrkurs kvittaði síðan sami Davíð Oddsson, einræðisherra í boði Sjálfstæðisflokksins, undir þátttöku okkar í innrás og stríði í fjarlægu landi sem vitað var að farið var í á fölskum forsendum. Ímynd þjóðarsálarinnar um að við værum friðsöm þjóð var endanlega drepin.

Landsala, meðan þeir græða, virðist vera mikið nær hug og hjarta Sjálfstæðisflokksins en lýðræðisástin sem lítið fer fyrir. Og eina hernaðarbrölt okkar litlu þjóðar er skilgetið afkvæmi Sjálfstæðisflokksins. Leitun er að flokki sem sýnt hefur stolti, draumum og vonum lýðveldisstofnunarinnar 1944 meiri fyrirlitningu.

Já, síðan 17. júní 1944 hafa eigendur Sjálfstæðisflokksins hlegið leynt og ljóst að þúsundum fífla sem þá komu saman veifandi fánum í rigningunni.