Agaleysið fellir Sjálfstæðisflokkinn í annað sinn.

Þegar Davíð hætti sem Borgarstjóri,  þá gat bæjarmálaflokkur sjálfstæðismanna í Reykjavík ekki komið sér saman um að 2. maður á lista tæki við af 1. manni eins og skyldan gagnvart kjósendum býður. Þar var gamli góði Villi  framarlega í flokki og vildi víst ekki samþykkja Magnús L. sem borgarstjóra.    Kjósendur sáu auðvitað,  að svona agalausum flokki var ekki treystandi og í næstu kosningum hófst margra kjörtímabila eyðimerkurganga Sjálfstæðisflokksins í Reykjavík 

Nú fer enn flokkur bæjarfulltrúa án oddvitans síns  á fund forystumanna Sjálfstæðisflokksins til að klaga. Forystan bregst við með að hleypa fólkinu út með óútkljáð mál og án þess að sækja  Villa á fundinn. Flokksaga er ekki beitt,  sem allir sannir flokksmenn vita að þeir eiga að virða.

Svandís var fljót að koma auga á það, að þetta hús var í sjálfu sér sundurþykkt og riðaði til falls.  Og Júdas beið  heldur ekki lengi í ólífulundinum.  Nú þegar þessi farsi er í fullum gangi, þá bíð ég eftir því að Reykvíkingum verði boðið uppá það aftur, að Alfreð Þorsteinsson taki við Orkuveitunni. Þá finnst mér mega segja : "Það er fullkomnað "

Væri ekki almenningi hollt að hætta að láta segja sér það oftar en þrim sinnum, að þessi eða hinn sé svo obboðslega klár, að hann verðskuldi ofurlaun.  Ég held að þessi bréfaguttar eða óprúttnir bánkastrákar séu ekkert klárari en fólk hefur gengið og gerst.  Þeir eru bara staddir á réttum tíma á réttum stað til að grípa gæsir sem gefast, siðlaust eða löglaust,  við nýjar aðstæður.  Hvað þá að einhverjir skaffarar hjá OR séu alltí einu orðnir þvílík séní af því einu að hafa verið í vinnunni sinni, að mætingin verði til ógrynni fiska metið og að fátækt fólk úti í heimi bíði eftir þessu liði öllu saman til að láta féfletta sig. Því REI er ekki guðsþakkafélag fremur en önnur slík með Jón Ásgeir og Hannes Smárason innanborðs. 

 Væri ekki rétt að allir þessir kaupréttargæjar í OR verði settir þegar í stað útá hinar eilífu veiðilendur einkaframtaksins. Mér fyndist það áhættunnar virði að láta á það reyna hvort hægt verður að ná í skaffara í þeirra stað.

Dr. Stefán Arnórsson prófessor bendir líka á, að flestöll tæknin, sem orkuveiturnar okkar vinna með, sé innflutt og frá öðrum komin, s.s. borar,rör og kranar.  Svo hvernig verða þessir miklu verðleikar "séníanna" til nema  fyrir auglýsingamennsku ? Sem viðkomandi drífa til viðbótar sjálfir að talsverðu  leyti. Aðeins hin hreinhjörtuðustu börn eru  fær um að sjá, að keisarinn er oftlega ekki í neinu.  Til viðbótar hafa svo einkaðilar hannað flest mannvirkin fyrir þessa ofurkalla sem stjórna orkuveitunum,   þannig að þessar útflutningsauðlindir geta átt sér fleiri stoðir í  teikniþreytttum  hausum og  músarkrampahöndum úti í mörkinni,  en á fínustu kontórum í höllum Alfreðs. 

Svo hvað verður ? Verður maður ekki að hafa áhyggjur af Sjálfstæðisflokknum sjálfum og því virðingarleysi sem flokksmenn eru farnir að temja sér í upphafinni sannfæringu  sinni um eigið ágæti. Allt í einu þurfa þeir ekki að vita neitt um sjálfstæðisstefnuna sjálfa heldur bara um það sem þeim dettur í hug hverju sinni. Flokkurinn er til fyrir þá en ekki þeir fyrir flokkinn.

Og mikið rosalega hlýtur Björn Ingi Hrafnsson að eiga glæsta framtíð fyrir sér í íslenzkum stjórnmálum. Hann hlýtur að verða  það bjarg,  sem  framsóknarmenn  framtíðarinnar  geta byggt á. Kannske fáum við að fylgjast með honum á næstunni okkur til ánægju eins  fóstra  hans forðum í Spaugstofunni .

 

 

Athugasemdir

[Katrín, 13.10.2007 kl. 10:34]

Það er lygilegt að sjá söguna endurtaka sig.  Mér skilst að a.m.k. þrír innan borgarstjórnarflokks sjálfstæðismanna hafi talið sig réttborinn arftaka Villa og á meðan það riflildi fór fram var meirihlutanum bókstaflega stolið.  Reyndar tel ég að þarna hefði Vilhjálmur átt að segja af sér strax til að bjarga því sem bjarga varð og sjálfst.fl. átt að mynda meirihluta með VG.  Menn eiga að setja flokkinn ofar sjálfum sér...ekki satt???

[Guðmundur Jónas Kristjánsson, 13.10.2007 kl. 11:55]

Hef aldrei skilið áhuga sumra  sjálfstæðismanna á samvinnu við vinstri-róttæklingana, anarkistana og hina afdönkuðu sósóalista í Vinstri-grænum.....

[Katrín, 14.10.2007 kl. 21:10]

 Það er mín skoðun að betra er að vinna með þeim sem eru ekkert annað en það sem þeir segjast vera en þeim sem eru það sem ,,kúnninn vill" og var lengi orðað við framsóknarmennsku en má nú einnif orða við jafnaðarmennsku...

[Halldór Jónsson, 14.10.2007 kl. 23:21]

Sæl  Kata mín, gaman að fá þig í heimsókn. Nú er sms málið komið upp. Bingi hafði séð eitt sem sagði sjálfstæðismenn til í allt án Villa.  En þá misstu fréttamenn RUV áhugann, þeir voru ekkert að ganga á Þorbjörgu Helgu með spurningar um hvort hún hefði sent Svandísi slíkt, sem Svandís komst upp með að vísa frá.

Það voru sem sagt allir að dobbelcrossa alla eins og í Smart Spæjara. Verði Reykvíkingum að góðu.

[Halldór Jónsson, 14.10.2007 kl. 23:22]

Já og Guðmundur Jónas, takk fyrir þín orð sem ég er í rauninni sammála, þar sem ég hef yfirleitt ekki komið auga á snertifletina við það lið.

[Magnús Þór Hafsteinsson, 15.10.2007 kl. 00:00]

"Hvað þá að einhverjir skaffarar hjá OR séu alltí einu orðnir þvílík séní af því einu að hafa verið í vinnunni sinni, að mætingin verði til ógrynni fiska metið og að fátækt fólk úti í heimi bíði eftir þessu liði öllu saman til að láta féfletta sig. Því REI er ekki guðsþakkafélag fremur en önnur slík með Jón Ásgeir og Hannes Smárason innanborðs. 

 Væri ekki rétt að allir þessir kaupréttargæjar í OR verði settir þegar í stað útá hinar eilífu veiðilendur einkaframtaksins. Mér fyndist það áhættunnar virði að láta á það reyna hvort hægt verður að ná í skaffara í þeirra stað".

Góður pistill. Ofangreind tilvitnun eins og töluð úr mínum huga. Hef verið að hugsa á svipuðum nótum.

[Jón Valur Jensson, 17.10.2007 kl. 04:22]

Snilldarpenni ertu, Halldór.

[Ágúst H Bjarnason, 19.10.2007 kl. 23:15]

Þetta er góð grein hjá þér frændi.

[Halldór Jónsson, 22.10.2007 kl. 08:15]

Takk fyrir þetta allir saman