Fiðluleikur meðan Róm brennur !

Atvinnuleysið í landinu nálgast nú sautján þúsund. Fjórum  sinnum fjöldi mótmælenda á Austurvelli þegar mest gekk á í óeirðunum í vetur. Og  síðan  aðstandendafjöldann utanum þennan hóp til viðbótar ?   Sjá menn fyrir sér slíkan mannfjölda ?    

Í eldsbjarmanum frá  Austurvallarindíánunum ákvað  Samfylkingin að sýna af sér það ábyrgðarleysi að rjúfa þing um vetur og stefna þjóðinni í  kosningar.  Í þeim  tilgangi að  fjölga  þóknanlegum þingmönnum  fyrir skæruliðana á kostnað Sjálfstæðisflokksins.    Í stað þeirrar  pólitísku skrautsýningar og sóunar á almannafé sem komandi Alþingiskosningar eru, þá  finnst mér að  núverandi þingmenn hefðu átt að sýna af sér þá ábyrgð að mynda fremur þjóðstjórn gegn neyðinni sem framundan er.  Kosningar núna eru því  fyrir mér ámóta ótímabært sukk og framboðið til Öryggisráðsins var á sínum tíma.    Fiðluleikur Ingibjargar, Steingríms og Sigmundar Davíðs þegar Róm er að brenna.   

En auðvitað er tómt mál að tala um þetta núna þegar allt er búið og gert.  Forseti vor  sló  enda  taktinn að þessu  öllu skælbrosandi frá Bessastöðum.  Þetta er  lag og ljóð  eftir hans höfði.   Gömlu úlfshárin þekkja  einhverjir þegar  þeir sjá þau. Skoðanakönnun sýnir greinilega að nú er fólk  farið að efast um ágæti slíks  konungdóms fyrir  Íslendinga sem forsetatíð Ólafs Ragnars Grímssonar er orðin.  Margar raddir heyrast nú um það að endurskoða þurfi stjórnarskrána með grundvallarbreytingar á ráðherraveldinu og forsetaembættinu fyrir augum. Oft heyrist nefnt að þjóðkjósa forseta með meirihluta á bak við sig, sem gegni embætti forsætisráðherra til fjögurra ára. Hann skipi ráðherra eftir sínu höfði.  Þannig náist fram sú þrískipting valdsins sem margir eru langeygðir eftir.

Vinstri stjórnir endast  sögulega  illa.  Mér býður í grun að það verði ekki  fjögur ár í aðrar kosningar eftir þessar skyndikosningar  í apríl.   Í stað  þessa sjónleiks hefði kröftunum  betur verið  beitt að aðkallandi málum.   Alþingiskosningarnar á miðjum vetri  verða því Íslands óhamingju fremur að vopni í stað þess að beina kröftunum að hinni miklu vá atvinnuleysisins.

 Nú sýnir skoðanakönnun að hinn pólitíski veruleiki er að renna upp fyrir landsmönnum. Slagorðavaðall vinstriflokkanna í ríkisstjórn sýnir sig að vera til lítils  gagns og leysa fárra vandamál.  Framsóknarflokkurinn virðist síður en svo hafa aflað sér trausts með ótraustri framgöngu  sinni. Sjálfstæðisflokkurinn er kominn á nýja siglingu upp úr öldudalnum.

Niðurstöður kosninganna munu því tæplega leiða til þess  stóra  sigurs sem upphafsmennirnir ætluðu. Vandræði þjóðarinnar   munu hinsvegar tæplega hafa minnkað þegar sýningin er  afstaðin. Kosningarnar verða því fremur  fiðluleikur meðan Róm brennur heldur en það sem þjóðin þarfnast um þessar mundir. En svona er þetta bara.        

Athugasemdir

[Óskar Helgi Helgason (IP-tala skráð) 5.3.2009 kl. 23:53]

Heill og sæll; verkfræðingur góður !

Mig býður í grun; að staða íslenzka samfélagsins, sé mun alvarlegri, en fólk(ef skyldi kalla);; eins og, Geir H. Haarde - Ingibjörg S. Gísladóttir - Steingrímur J. Sigfússon - Jóhanna Sigurðardóttir og Sigmundur Davíð Gunnlaugsson, vilja vera láta.

Nema; þau hafi verið keypt, til þagnarinnar ?

Það eru ekki; allir dagar í böggli, eins og gamla fólkið kvað, forðum, Halldór minn !

Með beztu kveðjum; úr Árnesþingi /

Óskar Helgi Helgason 

[Jón Steinar Ragnarsson, 6.3.2009 kl. 03:07]

Er einveldi sjálfstæðisflokksins það sem þú vilt? Áttu enga blygðun til minn kæri. Hver kveikti í Róm?

[Einhver Ágúst, 6.3.2009 kl. 09:44]

Sögulega eru líka "Vinstri stjórnir" afar fáar og hafa einsog nú tekið við eftir óráðsíu Sjálfstæðismanna og Framsóknar og uppskorið miklar óvinsældir, þetta sýnist mér þú vera nógu gamall til að muna.

Og afturhaldskommatittir voru hér ekki beint vinsælir með hlerunum, frelsissviptingum og tilheyrandi kúgun, eru þessi úrsérgengnu hugmyndir ykkar gamla fóksins um stefnur í pólitík sem kenndar eru við hægri og vinstri ekki að niðurlotum komnar?

Ég kalla eftir nýrri hugsun, hugsun sem ekki greinir okkur í pakk og aðal, ríka og fátæka, heimska og gáfaða....íslending og útlendinga. Hugsun sem forðar okkur frá karpi og tímasóun og mannhatri.

Ég tel okkur vera á leið inní siðabót og endursköpun, að hluta til afturhvarf til gamalla gilda og að hluta til möguleiki til að taka upp nýjar hugmyndir, svosem að við getum ekki orðið sammála öll en með málamiðlunum og samstarfi getum við unni bug á þessu "ástandi". 

Það er oft þannig í náttúrunni að við erfiðar aðstæður stökkbreytast dýr og plöntur til að lifa af, fiskar fá fætur og vængi og lifa af verri tíð en vð erum stödd í hér með upphituð hús og ólgandi matarkistuna alltumkring.

Gangi þér vel

[Jón Magnússon, 6.3.2009 kl. 11:18]

Þakka þér fyrir þessa færslu Halldór þetta er allt saman satt og rétt og vonandi hefur þú rétt fyrir þér varðandi sókn gegn vinstri öflunum fram að kosningum.

[Þór Jóhannesson, 6.3.2009 kl. 11:18]

Fyrstu fjóra mánuðina eftir kerfishrun, hugmyndfræðihrun og bankahrun Sjálfstæðisflokksins er hægt að tala um að pólitíkusar - og sér í lagi forsætisráðherra - hafi spilað á fiðlur meðan Róm brennur.

Nú aftur á móti er varla þverfóta fyrir brennuvörgunum á brunastað - og því lítill friður til þeirrar vinnu sem þarf en sem betur fer er hér öflug og sterk vinstristjórn sem lætur brunavargana ekki stöðva sig þó það sé verulega pirrandi að sjá þá kveikja nýja og nýja elda hvervetna.

Auðvaldssinar kunna ekki að skammast sín - svo mikið hefur a.m.k. 75% þjóðarinnar áttað sig á.

[Ragnar L Benediktsson, 7.3.2009 kl. 13:01]

Það er nú það, hverjir kveiktu í Róm  voru það ekki Sjálfstæðis-og Framsóknarflokkar ? Solla greyið tók svo við í miðjum brunanum, hún hefði betur látið það ógert. Og nú sitjum við uppi með stjórn sem er í vonlausri aðstöðu til að leysa vandann. Mín skoðun er að það á að senda alla þingmennina  heim og banna þeim að taka þátt í stjórnmálum í 20 ár. Skipa þjóðstjórn sem hefur það verkefni að greiða úr flækjunum og breyta stjórnarskránni til nútímans.  Þar á eftir að kjósa einstaklinga til að stjórna þessu klakasreri, eða bjóða út á EES svæðinu stjórn landssins

[Einhver Ágúst, 9.3.2009 kl. 13:55]

Nonni Magg mættur á kantinn!!! hahaha með svona vini þarftu enga óvini Halldór minn....

Vandamálið er vandleyst og að ráðast geng ríkisstjórn sem tók við þessum hörmungum er frekar ómaklegt, að hafa rétt fyrir sér er ofmetinn hlutur.....að samfélaginu okkar batni er það sem við þurfum og svona úrelt hægri vinstri öfgastefna mun koma okkur dýpra og dýpra oní öldudalinn....vonandi berum við gæfu til að stökkbreyta hugsun okkar og atgervi einsog stökkfiskar í drullupolli. Stundum er kostur að ríkið fylgist með stundum er kostur ð amarkaðurinn ráði.....hvað sagði ekki Nóbelsskáldið?