Bankabófar

Ekki birtir yfir þeirri mynd sem menn hafa fengið af helstu stjórnendum bankanna, Núna birtist mönnum athæfi stjórnarmanna í BYR sem er ekkert skárra en þeirra í SPRON nema miklu verra.

Það er alkunna að rotturnar flýja í land þegar þær skynja að skipið muni sökkva undan þeim. Rottueðlið er greinilega útbreidd meðal íslenzkra  bankastjórnenda. Stjórnarmenn koma sínum aurum í skjól þegar þeir vita hvert stefnir en láta aðra hluthafa, sem kusu þá í trúnaðarstörf, éta það sem úti frýs. 

Endurskoðandi BYR, Sigurður Jónsson hjá KMPG skrifar í ársreikninginn fyrir 2008 "

" Engin óvenjuleg viðskipti voru milli tengdra aðila  ársins 2008."  

Svakalega er þetta flinkur endurskoðandi. Hann  hefur ekki hugmynd um rottuganginn í stjórn fyrirtækisins. Hann hefur ekki hugmynd um hversvegna virðisrýrnun útlána verður uppá 28 milljarða króna. Sem hlýtur að vera vegna þess að engar trygggingar hafa verið teknar fyrir lánveitingum.

Hann segir líka: " Í því felst að stjórni hefur sett sér starfsreglur til að tryggja jafnræði við umfjöllun og afgreiðslu mála sem koma fyrir stjórn sjóðsins til að tryggja óháða málsmeðferð og koma í veg fyrir hagsmunaárekstra "

Fyrir þessa endurskoðun þiggur  Sigurður 36 milljónir króna .  Mikið  er þetta flott fyrir stofnfjáreigendur sem sitja uppi með skuldir hjá Glitni vegna þess að þeir voru plataðir til að taka lán til að kaupa nú óseljanleg stofnbréf í BYR. Og horfa svo á það að á  árinu 2008 selja stjórnarmennirnir sín bréf með lánum frá BYR. Fyllsta jafnræði ! Er það ekki  Sigurður endurskoðandi og engin óvenjuleg viðskipti  ha ? 

Allstaðar meðal siðaðra þjóða væri búið að handtaka og setja höfuðpaurana í gæsluvarðhald til þess að þeir geti ekki spillt sakargögnum frekar.  Í stað þess geta þeir valsað í bókhaldinu og eytt þeim skjölum sem þeim sýnist.  Svona hefur vinnulagið verið í öllum bönkunum frá falli þeirra. Eva Joly eða ekki, -bófarnir  virðast hafa óheftan aðgang að skjölum fyrirtækjanna.  Ekki var þetta  svona  í Hafskipsmálinu á sínum tíma.

Ég vona að stofnfjáreigendur fjölmenni á GrandHotel kl. 5. Það verður svona drama í masochisma að hlusta á skýrslu um það hvernig við vorum niðurlægð, svikin og smánuð af liðinu  sem við lyftum til æðstu trúnaðarstarfa í félaginu. 

 

 

Athugasemdir

[Jón Valur Jensson, 8.4.2009 kl. 13:08]

Rétt mælir þú hér, Halldór, og það verður fróðlegt að frétta af þessu stóralvarlega máli.

En vel hefðir þú getað skrifað hér um annað fréttnæmt mál og byrjað þá grein með líkum hætti: "Ekki birtir yfir þeirri mynd sem menn hafa fengið af" Sjálfstæðisflokknum á þessum síðustu og verstu tímum. 30 milljónir króna frá FL Group 29. des. 2006, þremur dögum áður en ný lög tóku við um fjárreiður stjórnmálaflokkanna, hljóta að vera áfall fyrir alla siðferðislega þenkjandi Sjálfstæðismenn. Þessi upphæð ein sér hefði nú dugað nýju framboðunum geysivel fyrir komandi kosningar, en henni til viðbótar naut Sjálfstæðisflokkurinn 56 millj. kr. styrkja frá lögaðilum árið 2007 og á annað hundrað millj. kr. úr ríkissjóði – úr vösum skattborgara!

Það er þér í sjálfsvald sett að gera athugasemd við þetta eða skrifa um það sérstaka grein, en það get ég sagt þér, að nú situr flokkurinn okkar í súpunni.

Á Vísisbloggi mínu á ég tvær nýjar greinar um þetta mál og hvet þar til þess, að flokkurinn afneiti mammón og beygi sig undir kristin siðferðisgildi.

Það hlýtur að vera von okkar beggja, að flokkurinn reisi sig við siðferðislega.

[Halldór Jónsson, 8.4.2009 kl. 13:14]

Já, þetta er flott hjá uppljóstraranum, að geta tengt Sjálfstæðisflokkinn við FL Group, Hannes Smárason og Jón Ásgeir. Kostar flokkin 5 % í kosningunum. Hvort sem hann myndi senda ávísun til þrotabússins eða ekki.

NEMA upplýst verði hversu mikið hinir heilögu flokkarnir fengu. Þaðð spyr enginn að því auðvitað.

[Jón Valur Jensson, 8.4.2009 kl. 14:05]

Jú, Halldór, Fréttastofa Bylgjunnar og Stöðvar 2 spurði einnig um þau mál, hjá Samfylkingu og Vinstri grænum, í hádegisfréttum í dag, og svörin koma fram í tilvísuðu Vísisbloggi mínu. – Sjáumst!

[Eiður Svanberg Guðnason, 8.4.2009 kl. 15:50]

Sæll Halldór, verður ekki að gera  ráð  fyrir  að bófaflokkurinn sem  stjórnar Byr sé  við  nokkuð  góða ,,fjárhagslega  heilsu" eftir það sem á undan er gengið ?

[Árni Gunnarsson, 8.4.2009 kl. 18:05]

Ég vona nú bara að hann Sveinn Margeirsson frá Mælifellsá fylgi þessu máli þeirra hjónanna eftir. Hann er búinn að vera einn sterkasti langhlaupari landsins um langt skeið. Og illa er honum í ætt skotið ef hann reynist vera skaplaus pilturinn sá.

En þetta með FL Group. Samfylkingunni kakar við rass að svara um þetta mál. Vinstri grænir hafa verið með allt bókhald opið frá fyrstu tíð skilst mér.

Framsóknarflokkurinn, æi, hvað skyldi nú muna um eitt mál í viðbót?

[Ómar Bjarki Smárason, 8.4.2009 kl. 18:14]

Ekki blæs nú BYR-lega á ykkur núna. Eins gott að halda sig í hæfilegri fjarlægð meðan þetta "óveður" gengur yfir og kannski eins gott að fá ekki tækifæri til að kjósa að þessu sinni.  Annars hef ég oft lagt til, kannski svona meira í gríni en alvöru, að kórónunni yfir innganginum á ónefndu húsi í miðborginni verði skipt út fyrir banana... siðferðið í okkar ágæta landi er alla vega litlu skárra en í mörgum ríkjum Suður Ameríku... og er það miður.

[Halldór Jónsson, 8.4.2009 kl. 20:07]

Takk fyrir öll. Ómar, þetta með bananann finnst mér góð hugmynd og við hæfi.