Aðalfundur BYR 13.maí.n.k.

Á fjölmennum fundi hollvina BYR á Grand Hotel í dag, var tilkynnt um aðalfund 13.maí n.k.

Þar var samþykkt ruglingsleg ályktun að mínum dómi um að stjórnvöld skuli sjá til þess að aðeins grandvarir og heiðarlegir menn verði valdir til forystu í BYR. Ég hélt að stofnfjáreigendur ættu að velja stjórnina en ekki stjórnvöld. Fundarboðandi útskýrði að með þessu væri verið að ákalla stjórnvöld um að láta núverandi stjórn ekki komast með það að fara með atkvæðavægi á aðalfundinum sem byggði á veðsettri stofnfjáreign. En núverandi stofnfjáreigendur munu allir vera með veðsett bréf. Gott og vel, ef þetta er hægt þá geta almennir stofnfjáreigendur hugsanlega boðið fram. Ekki ég, því ég skulda Glitni fyrir mitt bréf og það er víst að veði fyrir skuldinni. En bréfið er einskis virði og óseljanlegt með öllu.

Stjórnin fór öðruvísi að. Hún skammtaði sér 1100 milljóna yfirdrátt, sem er búið að hækka síðan um vextina, og keypti af sér sín bréf sjálf sem fóru yfir í félag í þeirra eigu. Þetta eru náttúrlega hreinir bankabófar sem sitja í stjórn BYR sem hafa gróflega mismunað öðrum stofnfjáreigendum. Það væri blóðugt ef þeir eiga að komast upp með að halda völdunum í gegnum bréfin sem þeir eru búnir að selja og moka úr sjóðum BYR í eigin vasa.

Hver ætlar að hafa frumkvæði að því að koma saman lista til að bjóða fram á móti bófunum veit ég ekki. En ég vona að slíkir menn fyrirfinnist.

Ef menn vilja reka endurskoðandann, sem margir telja fyllilega tímabært eftir síðustu atburði, þá verða menn að fara rétt að því og vera með annan endurskoðanda kláran á fundinum.

BYR er fyrirtæki sem við stofnfjáreigendur eigum að verja og hugsa vel um. Fyrirtækið hefur lent í ræningjahöndum Baugs og bandítta.  Þaðan verður að reyna að frelsa fyrirtækið sem er þá annar  bankinn af tveimur sem er ekki hreinn ríkisbanki. MP banki er hinn einkabankinn, sem á alla mína samúð. En því miður blandast hann í skuggaleg viðskipti BYR-bandíttanna með stofnfjárbréf og þyrfti nauðsynlega að geta hreinsað sig af samneyti við þessa aðila. 

Athugasemdir

[Pétur Halldórsson (IP-tala skráð) 13.4.2009 kl. 15:58]

Heitir hann ekki Birgir Ómar, stór vesír í sjálfstæðisflokknum í Kópavogi. Sem gat leyst út stofnfé í desember þegar aðrir fengu það ekki , með þeim aðferðum sem lýst er í Kastljósi sl þriðjudagskvöld.

Kallast hann þá ekki bankadrullusokkur og BYR-bandítt?? Ég kann töluvert fleiri lýsingarorð yfir svona manni sem honum.Lögreglan þarf að ná í Birgir Ómar á undan öðrum stofnfjáreigendum sem fengu ekki leyst út sín bréf á sama tíma og Bigir Ómar sem naut óeðlilegrar fyrirgreiðslu í krafti stærðar sinnar á stofnfé.!!!!.

Ég veit um nýlegt dæmi þar sem skilvísum stofnfjáreiganda í BYR var neitað að greiða skuld við bankann með innlausn á stofnfé!!!

[Pétur Halldórsson (IP-tala skráð) 13.4.2009 kl. 18:45]

http://dagskra.ruv.is/streaming/sjonvarpid/?file=4431357

Þetta er athygilvert viðtal í Kastljósi. um Byr og bófana þar .

[Halldór Jónsson, 17.4.2009 kl. 20:15]

Já, ég þekki marga sem horfa fram á gjaldþrot vegna lánanna sem þeir tóku til að efla BYR eftir hvatningu stjórnarmannanna. En Birgir Ómar var einmitt einn  mesti frumkvöðull að því að renna SPK inní BYR.

Ég var áður í stjórn með BÓH í SPK og átti þar með honum gott og skemmtilegt samstarf. Mér þykir ákaflega leitt að hann skuli blandast inní skítamál af þessu tagi því Birgir hefur alltaf reynst mér sem góður vinur sem ég met mikils. Ég vildi bara að SPK væri komið aftur, það var skemmtilegt fyrirtæki með afbragðs fólki. Ég skildi aldrei hversvegna við gátum ekki bara haldið áfram með það eins og það var.

Það hefur verið talað um það í mín eyru að reyna að endurreisa fyrirtækið SPK ,  nú þegar fyrir liggur hvernig tókst til með hina leiðina. Kannske verður eitthvað gert í því ?