Prófkjör í Kópavogi

Framundan eru væntanlega prófkjör hjá stjórnmálaflokkunum í Kópavogi vegna bæjarstjórnarkosninganna í vor. Sjálfstæðisflokkurinn verður með sitt prófkjör 20.febrúar  og aðrir flokkar huga að því að stilla upp listum sínum á  tíma, hvaða háttur sem verður á því.Rétt til þátttöku í prófkjöri Sjálfstæðisflokksins munu allir þeir hafa sem eru flokksbundnir  á kjördegi. Nokkrum titringi hafa valdið hótanir ríkisstjórnar Samfylkingar og VG um það að breyta lögum í þá veru að kjósendur skuli raða á listana en ekki flokksmennirnir sjálfir á framboðslistana. 

  Auðvitað er þessu stefnt gegn Sjálfstæðisflokknum, sem einn flokka hefur haft þann styrk að geta haldið fjölmenn prófkjör og lengst af opin öllum þeim, sem undirrita inntökubeiðni í  flokkinn á prófkjörsdegi. Ekkert fer eins í taugar litlu vinstriklíkuflokkanna og stærð og afl flokksmanna Sjálfstæðisflokksins. Þeir stilla upp sínum listum í reykfylltum bakherbergjum þar sem rútufarmar smalafjár ráða úrslitum meðan Sjálfstæðisflokkurinn heldur prófkjör sem eru almenningi opin.

Stjórnmálaflokkarnir eru nú að stilla upp listum vegna sveitarstjórnarkosninganna í maí n.k.  um allt land. Það hefur verið nokkuð útbreitt að á þessa lista hér í Kópavogi hefur  valist  fólk sem eru starfsmenn bæjarfélagsins.  Hér í Kópavogi bar Guðmundur Oddsson  lengi ægishjálm valdsmanna hér í Kópavogi samhliða því að vera skólastjóri í Þinghólsskóla. Formaður bæjarráðs Kópavogs er Ómar Stefánsson sem er starfsmaður á íþróttavöllum bæjarins. Hafsteinn Karlsson bæjarfulltrúi  og Gunnsteinn Sigurðsson bæjarstjóri eru báðir  skólastjórar hér í bænum.Jón Júlíusson bæjarfulltrúi  hefur verið   íþróttafulltrúi  bæjarins lengi.

Allir þessir fulltrúar eru þannig yfirmenn sjálfra sín í raun og veru sem mörgum eins og mér finnst skondið og óeðlilegt. Aðrir segja að það séu mannréttindi bæjarstarfsmanna að taka þátt í stjórnmálum. Um þetta má deila endalaust. En kjósendur hafa ekki sett þetta fyrir sig hingað til og það er sjálfsagt eðlilegast að þeir ráði því eins og öðru. Mér finnst þetta samt miður og vildi óska þess að óviðkomandi aðilar bænum sitji í frekar bæjarstjórn.

Nú segir einhver: Sjáið þið kallinn, nú er hann að stanga í Gunnstein Sigurðsson til að þóknast Gunnari Birgissyni. Svo er alls ekki enda er ég dyggur flokksmaður þeirra beggja.

Þessar vangaveltur mínar eiga fyrst og fremst almennt við þá langæju skoðun mína, að bæjarstarfsmenn eigi ekki að sitja jafnhliða í bæjarstjórn. Mönnum þætt áreiðanlega einkennilegt ef til dæmis skrifstofustjóri  Alþingis, ræstitæknar hússins eða húsverðir  sætu á Alþingi líka eða væru ráðherrar í ríkisstjórn. Ég hef frétt að þessu sé  ekki svona háttað í nágrannabæjunum og  ég held að í Borgarstjórn Reykjavíkur  sé  til dæmis hefð fyrir því að borgarstarfsmaður sitji ekki í borgarstjórn frá tímum Davíðs sem borgarstjóra. Gott ef ekki í Garðabæ líka.

Þetta er mín skoðun: 

Á framboðslistum séu menn annaðhvort bæjarstarfsmenn eða bæjarfulltrúar, ekki hvorutveggja.

Athugasemdir

[Baldur Hermannsson, 2.1.2010 kl. 15:14]

Prófkjör eru óyndisúrræði. Ættingjar og venslamenn taka sig saman, styðja frambjóðanda með fjárframlögum til að koma henni Ölmu Dís eða Arnari Mána í atvinnu við stjórn bæjarmála. Alma Dís og Arnar Máni eru nýútskrifuð, með próf í félagsfræði og stjórnmálafræði. Þau hafa aldrei unnið fyrir sér. Þeim býðst að vinna í fiski en þau eru of fín til þess. Þá er betra að sitja í bæjarstjórn.

Öflugir menn eru hættir að taka þátt í þessu. Mest eru þetta menn sem hafa kollsiglt sig á atvinnumarkaðinum eða eru hreinlega ekki farnir að vinna fyrir sér. Þarna er fólk sem kemur nýútskrifað úr Háskólanum, án reynslu og þroska. Ég er mótfallinn prófkjörum. Ég vil þroskað fólk með víðtæka og farsæla reynslu úr atvinnulífi og mannlegum samskiptum.

[Jón Baldur Lorange, 2.1.2010 kl. 18:10]

Ágætis hugvekja hjá þér Halldór í upphafi nýs árs. Sammála þér að óheppilegt er að vera bæði bæjarstarfsmaður og bæjarfulltrúi. Þarna hljóta hagsmunir að rekast saman á stundum. Hins vegar er ég þér ekki sammála með opin prófkjör eins og þau hafa farið fram á síðustu árum. Þar er ég sammála nafna mínum.

Þeir sem veljast saman í stjórnmálaflokk vegna sömu hugsjóna eiga að hafa dug og þor til þess að velja hæft, heiðarlegt og hugað fólk til forystu. Aldrei er meiri þörf en nú að Sjálfstæðisflokkurinn bjóði fram hæfa og dugmikla forystusveit fyrir bæjarmálum í Kópavogi sem annars staðar.

[Anna Sigríður Guðmundsdóttir, 2.1.2010 kl. 19:30]

Halldór minn. Farðu nú varlega og mundu að þú varst flokks-munaðarlaus, og ekki að ástæðulausu. En einhverjir verða víst að stjórna í hreppum landsins. Það verður að finna fólk sem skilur sjónarmið allra en ekki bara sumra. Það er í mínum huga réttrátt. Gangi þér vel. Kv. Anna.

[Pétur Halldórsson (IP-tala skráð) 2.1.2010 kl. 22:20]

Algerlega sammála um að Bæjarstarfsmenn geti ekki og eigi ekki að vera bæjarfulltrúar um leið.Það er gersamlega óþolandi.

Ég get hins vegar alls ekki skilið þessa klisju um að opin prófkjör séu slæm.

[Jón Baldur Lorange, 2.1.2010 kl. 22:28]

Ef það kostar 3-15 milljónir til að ná árangri í opnu prófkjöri eins og dæmin sýna sbr. nýlega úttekt Ríkisendurskoðunar, hvernig á það venjulegur launamaður að hafa efni á þátttöku ef hann þá leggur það á sig að standa í slíkri eldskírn? Ja, nema með því að þiggja styrki frá ,,fjársterkum aðilum" eða fyrirtækjum sem veldur síðan eðlilegri tortryggni.

[Halldór Jónsson, 2.1.2010 kl. 23:26]

Jón Baldur,

það kostar ekki mikið að ná efstu sætum hjá litlu klíkuflokkunum, inntökugjöld á keyptum atkvæðum og kruðerí.  En það er alveg rétt, að frambjóðandi einn í Sjálfstæðisflokknum hefur sagt við mig að öll launin fyrir hálft kjörtímabilið dugi ekki til að borga prófkjörskostnaðinn. Þessvegna er gott ef einhverjir geta hjálpað þessum greyjum sem vilja bæta heiminn af hugsjón fyrir okkur letingjana sem viljum engu til hætta.

Það er nú hinsvegar svo að prófkjörin eru eina aðferðin sem skapar frið um lista Sjálfstæðismanna sem er lýðræðisflokkur fjöldans. Þar gengur bara ekki þessi klíkustarfsemi og kunningjasamfélag sem viðhaft er hjá kommatittunum hvað sem þeir kalla sig.

[Ómar Bjarki Smárason, 3.1.2010 kl. 00:00]

Mikið sammála þessu hjá þér, Halldór. En er nú ekki kominn tími til að þú farir fram sjálfur. Þú ert bæði réttsýnn og tiltölulega lítið spilltur. Það er þörf á slíku fólki í pólitík.....