Þjóðarstjórnin

er að myndast hjá Birgittu. Líklega fylgist FBI grannt með gangi mála hjá henni.

Það er greinilegt að þjóðin þráði þessa stjórnarmyndun með þriggja manna og 46 atkvæða Samfylkingu heitar en að hafa þennan 8 manna Framsóknarflokk með í spilunum vegna skorts á tiltektum hjá maddömunni.

Guðna Forseta datt þessi stjórnarmöguleiki  í hug væntanlega með tilliti til langrar stjórnmálareynslu sinnar.

Guð blessi Ísland sagði karlinn. Einhverjum gæti dottið í hug að leita til Drottins með blessun ef þessi þjóðarstjórn fæðist. 

Gömul vísa endurkveðin

er þessi sem hér fylgir. Ég held að ekkert það hafi breyst sem gerir hana úrelta. Þess vegna  læt ég hana flakka hér í trausti þess að einhver hafi ekki lesið hana áður: 

"Sá sem fer í Perluna og spókar sig á útsýnispöllunum á fögrum degi getur auðveldlega orðið fyrir hughrifum af tign og kyrrð Vatnsmýrarsvæðisins. Þarna blasir við fegurð himinsins, vídd sjóndeildarhringsins og að miklu leyti ósnortin náttúra, sem flugvöllurinn gamli og góði hefur verndað í meira en hálfa öld með nærveru sinni.

 

Margir hafa horn í síðu flugvallarins og sjá fyrir sér miklar byggingar á öllu þessu svæði. Það er í raun auðvelt að sjá þessar breytingar fyrir sér af þessum sjónarhóli. Bæta síðan umferðargnýnum við þögnina í eyrunum og blanda svo brælunni frá bílunum við litina frá Snæfellsjökli fyrir sínum innri augum.  Fyrir mitt leyti kem ég ekki auga á þær dásemdir, sem þessi skipti eiga að færa mannfólkinu. Varla hefur  Jóhannes Kjarval haft þær myndir í huga  þegar honum vitraðist það, að  norðurljósin gætu nálgast fætur mannanna  einmitt þarna í Öskjuhlið.

 

Eftir alla þá miklu talnaturna, sem reistir voru um söluhagnað lóða á flugvallarsvæðinu, gáfu menn umhugsunarlaust lungann úr svæðinu endurgjaldslaust til Háskólans Í Reykjavík. Þetta gerðist eftir að Garðabær vildi bjóða skólanum til sín. Yfirtromp R-listans sáluga sem Háskólinn þáði.

 

Sagt var eitt sinn, að bókvitið verði ekki í askana látið. Víst er að ekki mun þetta háskólasvæði  gefa af sér neinar tekjur  í borgarsjóð.   Það mun hinsvegar færa umhverfið úr lagi  og valda óafturkræfum spjöllum á Vatnsmýrinni og flugvellinum.

 

Allt er þetta óþarfi. Það eru margir staðir sem eru heppilegri fyrir Háskólann í Reykjavík en þarna suður af Beneventum í kallfæri við Háskóla Íslands. Umferðarmálin frá þeim Háskóla eru ennþá óleyst . Vandamálin munu aukast til muna með umferð frá nýju  Hátæknisjúkrahúsi, nýrri Samgöngumiðstöð og svo síðast frá Háskólanum í Reykjavík. Þvílíka hugljómun getur ekki sett að venjulegum vegfaranda á Hringbraut seinnipart dags ?

 

Ríkið á mikið land við Keldur. Það eru falleg svæði norður af Rauðavatni, við Rauðhóla, Reynisvatn  og svo má telja. Víðast hvar  í heiminum eru háskólar að flytja útfyrir bæina.  Til dæmis er minn gamli skóli í miðri Stuttgart löngu farinn útí sveit.

 

Höfuðborgin þarfnast flugvallarins. Hvaða borg á sambærilegan “City Airport”  með  sjávarbakka á tvær hliðar ?  Reykjavíkurflugvöll  á að efla og auka flug frá honum. Samgöngur eru undirstaða efnahagslífs allra þjóða, það gerði Daríos Persakóngur sér ljóst fyrir margt löngu. Flugumferð er mun fyrirferðarminni en bifreiðafjöldinn og mengar minna. Eldgos á Hellisheiði eða á Reykjanesi gætu líka skyndilega kallað á flugsamgöngur frá  höfuðborgarsvæðinu.  Hraunin þar runnu aðeins á gærdegi  jarðsögunnar.

 

Njótum samvista við víddina , fegurðina og flugvöllinn.  Eiturspúandi blikkbeljur og magnþrungnir steypuklumpar eru ekki því fegurri sem fleiri koma saman. Dreifð byggð er betri byggð og  barnvænni en Barafjöld.  Mannfólkið þarf  staði þar sem  norðurljósin geta fundið fætur þess. 

 

Verndum Vatnsmýrina, flugvöllinn,fegurðina  og  fuglana  meðan þess er enn kostur."

Það er búið eð vinna mörg skemmdarverk á Reykjavíkurflugvelli af þeim meirihluta sem hefur helsetið Borgarstjórn Reykjavíkur síðan að íhaldið gerði í buxurnar sínar um árið og sýndi að það var ekki trausts kjósenda vert. Eftirlét R-listanum Borgina sem hefur ekki beðið þess bætur síðan. Og er líklega ekki á leið með að skipta því komma og krataliði sem þar hefur stjórnað síðan.

Gömul vísa um Reykjavíkurflugvöll nær ekki að vekja Borgarbúa til umhugsunar,

Mannleg þekking

er skráð á eitt kort sem sýnir samtengingu allra greina í eðlisfræði og heimspeki.

http://interestingengineering.com/one-map-explains-entirety-physics-connected/

Dominic Walliman hefur teiknað upp eina mynd sem tengir saman allar greinar eðlisfræðinnar og heimspekinnar frá upphafi til þessa dags, frá Newton til nútíma skammtafræði.

Skemmtileg framsetning hjá Walliman á mannlegri þekkingu.

Birgitta bar dót

sitt á borð fyrir flokkaflóruna til vinstri við skynsemina.

Var þjóðin að biðja um áframhald viðræðna við ESB?

Var þjóðin að biðja um gerbyltingu í sjávarútvegi með því að leggja 200 milljarða auðlindagjald á hann eins og Samfylkingin lagði til?

Var þjóðin að biðja um að kála 60 milljarða nettóstöðu gagnvart útlöndum?

Var þjóðin að biðja um skattahækkanir?

Var þjóðin að biðja um myntráð og gengisfall eins og Benedikt flokkseigandi Viðreisnar?

Var þjóðin að biðja um atvinnuleysi upp á tugi prósenta eins og stærðfræðingurinn Smári McCarthy forsætisráðherraefni Pírata taldi ákjósanlegt?

Vantar einhvern nýja stjórnarskrá umfram allt annað eins og Þorvaldur Gylfason klifar stöðugt á? 

Það er fjör í dótabúðinni hjá Birgittu.

 

Vinstri græn eru vesælli

en maður hélt í barnaskap sínum. Maður hélt að það væri hægt að kveikja ljós hjá þessum leðurblökum og lýsa upp myrkrið sem ríkir í þeirra vansælu sálum.

Nei, þar ríkir öfundin eins og óánægja með allt og alla sem einhverju jákvæðu vilja leggja lið. Allan gróður sem hefur sig upp úr móanum verður að skella ofan af í þeirri trú að þá spretti sá lægri betur. Og það sem verra er, að þeir virðast  njóta eymdarinnar hvar sem hana er að finna.

Þessa lífssýn og neikvæðni þessa fólks virðist ekki hægt að laga. Það getur engu sáð og ekkert uppskorið, það sér aðeins böl og þraut og þjóðfélag öfundar og óánægju. Það er eins og það líti aldrei glaðan dag og vilji heldur alls ekki að neinn upplifi slíkt.

Það er ekki hægt að ná samstarfi með þessu þunglynda fólki.Það veit heldur ekki sjálft hvernig það getur náð einhverju fram í leit sinni að meira þunglyndi.

Vesalings grunnhyggna fólkið í þessum flokki er ekki af þessari öld.