Grunaður eða dæmdur glæpamaður.

Í Bandaríkjunum og líklega víðast hvar annarsstaðar nema hugsanlega í Afríku myndu bankar ekki eiga í neinum samningum eða viðskiptum við dæmda eða grunaða glæpamenn. Hugtökin Felon eða suspected Felon eru notuð um þá sem dæmdir hafa verið fyrir glæpi eða eru sterklega grunaðir um glæpsamlegan verknað. Þessir menn eru ekki teknir góðir og gildir.

Hér er talað í þá veru, að dæmdir glæpamenn séu að fullu gjaldgengir í þjóðfélaginu, þeir séu jafnvel betri en aðrir af því þeir séu svo snjallir. Bankar standa í miklum afskriftaviðræðum við menn sem hafa réttarstöðu grunaðra í risavöxnum fjársvikamálum tengdum sömu bönkum.  Er þetta ef til vill fyllilega eðilegt ef bankastjórarnir sjálfir eru ekki af mikið öðruvísi siðferðisstigi með langa hala á eftir sér af hinum og þessum misgerðum og svindli, þó þeir hafi ekki verið opinberlega ákærðir.

 Wallenberg hinn sænski kunni manna best að ná völdum í félögum útá minnihluta atkvæða og er skólabókardæmi í fyrirtækjayfirtökum. Útrásarvíkingar okkar eru margir þrællesnir í slíkum fræðum og greindir vel. Árangur þeirra var eftir líka því þar sem slóð fjandsamlegra yfirtaka skildi eftir sig sviðna jörð í fyrirtækjum sem fyrri kynslóðir höfðu byggt upp í sveita síns andlits. Það þurfti bara snör handtök og fljóta fætur siðblinds þjófsins til að rústa störfum kynslóða. Og hann notar hluta af þýfinu til að kaupa sér vernd stjórnmálamann og flokka þannig að hann heldur ótrauður áfram. Og við hin bara horfum andaktug á. Við ráðum bara ekkert við svona séní, hvorki réttarkerfið, dómsvaldið né þorir ríkisvaldið að móðga þá þar sem þeir halda á styrkjunum til flokks alþýðunnar.

Einn banki sér fram á að stærsti viðskiptavinur hans er að fara á hausinn 2007. Hann tekur allar bitastæðustu eignir þrotafélagsins útúr félaginu á 5 % og selur þær með 100 % láni frá sér yfir í annað félag í eigu forsvarsmannanna  sem fá að skulda bankanum þessi 5 % og stjórna félaginu.  Hinir kröfuhafarnir sitja eftir með 95 % af kröfum sínum og fá jafnvel ekki neitt. Allavega dregst málið og dregst og mikil viðskipti eiga sér stað á hverjum degi. Koma ekki venjulega dagar og koma ráð ? Gömlu eigendurnir eiga að hafa 5 % félagið undir sér af því að þeir eru svo klárir á rekstur. Enginn betri segja þeir sjálfir. 

Nú segir bankinn eftir að almenningur lætur pirring í ljós yfir fyrirhugaðri afgreiðslu að það eigi að selja þetta 5 % félag á markaði. Hvaða markaði spyrja hugsanlega þeir sem hafa tapað bæði fé og trú á samfélagið eftir hremmingar af þessum mönnum ? En fyrri stjórnendur eiga alltaf að fá 20 % svo þeir geti ráðið starfseminni áfram.  Kjölfestufjárfesta, kallaði einhver stjórnmálasnillingurinn þetta fyrirbrigði. Þeir ráða svo öllu með þolinmóðum sjóðsstjórum sem stýra þolinmóðu fjármagni almennings og hjásetu þeirra litlu.  

Þetta er ekkert öðruvísi í grunninn eins og þegar upphaflega félagið var selt almenningi. Þá lánuðu sjálfir stjórnendurnir sjálfum sér peninga almennings og keyptu félagið úr almenningseigu til sjálfs sín með peningum félagsins sjálfs. Og voru ekki einu sinni sakfelldir fyrir verknaðinn þar sem þeir höfðu hjörð af bestu lögfræðingum landsins til að sauma að vesölum dómurunum.  Þetta eru svo góðir menn og hafa gert svo mikið fyrir almenning prédika þeir svo dag og nótt í fjölmiðlum sínum.

Endanlegu gæðin og hagnaðurinn af því sem almenningur hélt að væri hagstæð viðskipti með lífsnauðsynjar birtast í því að almenningi er réttur reikningur uppá uppá eina landsframleiðslu eða svo sem fyrsta félagið fór á hausinn með. Fyrirtækin  sem snéru að almenningi eru á 5 % af fallíttinu að komast í eigu sömu mannanna aftur með hjálp svindlaranna í bankanum, sem almenningur átti.

Veltir enginn fyrir sér hvað hægt sé að bjóða almenningi upp á ? Er þol og sauðarháttur Íslendinga endalaus ? Eru þeir orðnir siðblindir allir sem einn ? Dæmdir glæpamenn sitja í æðstu stöðum og engum finnst neitt sérstakt að því ?  Bankaræningjar eru eins og hverjir aðrir viðskiptamenn í banka ?. Nei annars, betri viðskiptamenn af því þeir eru svo klárir ? 

Er enginn munur á grunuðum eða dæmdum glæpamanni og á ógrunuðum manni með hreina sakaskrá ?

Athugasemdir

[Helga Kristjánsdóttir, 11.2.2010 kl. 00:58]

Djöls verkun.