Snert Hörpu mína himinborna dís !

Einhver sem var ekki boðinn við Hörpuvígsluna stakk niður penna:

Kvæðið um smáfuglana

Snert Hörpu-stjóra, himinborna dís
svo heyri hún mitt bænakvak, ó, plís:
Mig dreymir um að ganga í húsið glæst,
. . . á gestalistann settu nafn mitt næst!

Ég svekktur sit hér sjónvarpstækið við,
í sálu minni finn ég engan frið:
Þeir sýna Dorrit - sú er glæsileg!
Þar situr elítan - en hér sit ég.

Þar situr einn sem setti Hörpu á haus
í heiðursstúku æru- og auralaus,
en ég sem tók í Landsbankanum lán
. . . má lufsast heima í sófa, hvílík smán!

Þau heyra í glerhjúp ljúfan goluþyt,
um gesti leikur gull- og perluglit,
en ég sit heima í flíspeysu með snakk
og sötra bjór og hugsa: Ég er pakk!

Höf. ókunnur

Það er góðs viti að húmorinn hefur ekki yfirgefið okkur venjulegu Íslendinga, sem eiga að borga reikninginn.

Athugasemdir

[Helga Kristjánsdóttir, 18.5.2011 kl. 22:20]

Hæ! Ég sem ætlaði að láta þetta fara frá mér,hélt þú værir með frumgerðina.  Ég hló,ég skelli,skelli hló,,,   nei húmorinn heldur oft í manni lífinu. Mb.kv.

[Ómar Bjarki Smárason, 18.5.2011 kl. 23:15]

Ég vissi að þú varst sár, Halldór, yfir því að fá ekki boð á opnunina en það kemur mér á óvart hvað þú ert hagmæltur.....!

[Halldór Jónsson, 19.5.2011 kl. 07:58]

Það stendur nú þarna að ég er ekki öfundurinn Ómar Bjarki

[Sigurður Rósant, 19.5.2011 kl. 22:50]

Svona, verum ekki of bölsýn í dýfunni. Kate Melua gæti róað margan Íslendinginn á tónleikum í þessu fallega húsi, þó hún sé úr flóttafjölskyldu frá Georgíu.

Var einmitt að horfa á klukkustundar prógram á DR 1 þar sem hún spilaði og söng á opnum tónleikum fyrir rólega Íra í sömu kreppu og við.