Forsetinn skeiðar út í móa

þegar hann fer að setja þinginu fyrir um hvað það eigi að fjalla í setningarræðu sinni. En öll ræðan snérist í rauninni um Stjórnarskrármál og hvaða áhrif tillögur stjórnlagaráðs hefðu á endurkjör hans eða framboðsgrundvöll annarra á sumri komanda.  Algerlert ofmat á þýðingu einhverrar nýrrar Stjórnarskrár fyrir daglegt líf í landi verðbólgu, atvinnuleysis og landflótta. Ef atkvæðisréttur væri jafnaður er í raun ekkert að núverandi plaggi, sem kemur í veg fyrir að nota það lengi enn. Ein lítil viðbót frá Alþingi dygði til þess.

Að Alþingi eigi að fara að eyða öllum sínum tíma í að fjalla um torskilda  túrbó-tillögu Thorvaldar Gylfasonar og meðreiðarsveina hans í stjórnlagaráði er út í hött við þær aðstæður sem við blasa. Verkefnið sem Ólafur Ragnar fjallaði um er svo miklu stærra og yfirgripsmeira en svo, að því verði lokið í einhverjum hvelli með öðrum málum fyrir næstu Forsetakosningar. Enda hugmyndir hans um mikilvægi embættis síns nú og í framtíðinni  heldur ekki í hlutfalli við raunverleika þjóðarinnar.

Hefur ekki einmitt  dr.Ólafur sannað það best sjálfur með embættisfærslu sinni, að Stjórnarskráin í núverandi mynd dugar okkur alveg og þess vegna liggi ekkert á að breyta henni í einhverju hastverki núna?  Það eru svo margir mætir menn búnir að reyna að smíða nýja stjórnaskrár sem ævistarf án þess að hafa getað leyst það til fulls, að þessi fyrirliggjandi moðsuðugerð, sem snýr öllu á haus í stjórnskipuninni, fyrir utan að vera þversagnafull og illa grunduð í mörgum atriðum, á ekkert erindi til þess að taka upp tíma Alþingis frá viðblasandi vandamálum eins og atvinnuleysi, gjaldþrotum heimilanna og framtíð atvinnurekstrarins. Væntingar fólksins standa til allt annars af Alþingi Íslendinga.

Forði okkur hamingjan frá því að Alþingi fari að ræða þessa stjórnlagaráðshugarflugu Jóhönnu Sigurðardóttur sem stofnað var til í einu af hennar brelluköstum til að blekkja fólkið og afvegaleiða frá allsherjar vandamálum þjóðarinnar og getuleysi hennar sjálfrar til að leysa þau.

Megi Alþingi snúa sér að vandamálum samfélagsins en láti ekki Forsetann skeiða með sig út í málþófsmóa um  stjórnarskrá og drepa þannig mikilvægustu málunum á dreif eina ferðina enn.

Athugasemdir

[Ómar Bjarki Smárason, 2.10.2011 kl. 14:46]

Er ekki upplagt fyrir ráðherrana að stíga út af þingi í anda væntanlegrar stjórnarskrár og láta þinginu eftir að fjalla um nýju stjórnskrána og ráðherrarnir einbeiti sér þannig að lausn vandamála frekar en að þvælast fyrir þinginu...? 

Annars er það í anda þessarar ríkisstjórnar að finna sér verkefni önnur en þau sem þau ættu að vera að vinna að, fyrst ESB og nú bætist ný stjórnarskrá við....

Gott væri nú að hafa það ákvæði í stjórnarskrá að forsetinn gæti sent einstaka þingmenn og e.t.v. þingið allt í frí og boðað til kosninga... einhver verður að taka af skarið svo þeirri vitleysu sem viðgengst í ríkisstjórn og á Alþingi fari nú að linna. Það er ömurlegt að þurfa að horfa upp á þetta öllu lengur.