Þjóðin borgar

fyrir þrautir nýja varðskipsin okkar Þórs. Þær virðast ætla að teygjast á langinn. Glæsifleyið liggur viku eftir viku bundið við bryggju hér í Reykjavík og sagt er að ekkert virki til að gera við titringinn í vélunum sem hrista olíupönnurnar jafnharðan lausar.

Vera kann að sköpulag skipsins hafi raskast við slysið í skipasmíðastöðinni í Chile og fréttir greindu frá á sínum tíma. Undirritaður hefur oft velt fyrir sér hvort hinn forni byggingarmáti skipa hafi hér áhrif. En í skipasmíði eru vélar og gírar yfirleitt beintengdir eftir línu án hjöruliða á milli eins og til dæmis þegar menn byggja vörubíla. Þessi aðferð skipasmiða gerir það erfitt að láta vélbúnað ganga ef línunin hefur raskast.Þetta þóttist maður sjá á stuttum ferli í skipaútgerð fyrir margt löngu.

En ef maður veltir þjóðhagkvæmni varðskipabygginga fyrir sér, og ekki voru allir sannfærðir um þörfina fyrir þetta skip á sínum tíma, þá spyr maður sig, hvernig í veröldinni menn fengu það út að það borgaði sig að láta byggja skipið í S-Ameríku í stað þess að smíða það innanlands? Hefur ekki sjaldnast verið tekið tillit til þjóðhagkvæmni í samanburði tilboða og þess hvílík ruðningsáhrif smíði svona skips hefur í umhverfi sínu? Eru allir þeir skattar og innlend eyðsla sem inn koma af smiðunum yfirleitt metin rétt þegar tilboð eru borin saman?

Eru Íslendingar ekki sífellt að láta byggja skip og skrokka í útlöndum staðinn fyrir að horfa á heildarmyndina? Horfa skammsýnt aðeins á krónur og aura? Á meðan deyr innlend þekking á skipasmíðum smám saman út í landinu. Er einhver leið að skilja það að hafa ekki látið ekki smíða varðskipið þór innanlands á sínum tíma? Ætli skipið væri ekki núna á sjó en ekki bundið við bryggju? Hverfur ekki mismunurinn á tilboðunum út um gluggann í viðgerðarkostnaði? Hefur þetta ekki allt skeð áður?

Megum við sjá reikninginn hæstvirtir borðalagðir Landhelgisstjórar? Þjóðin á nefnilega að borga reikninginn fyrir Þór.

Athugasemdir

[Eyjólfur G Svavarsson, 10.1.2012 kl. 17:06]

Ég er ansi hræddur um að það þurfi að nálgast reikninginn á annan hátt, ef hann er þá nálgunarhæfur!!!! En gaman væri að sjá útreikning á því hverju heimasmíði hefði skilað í formi skatta af tekjum Iðnaðarmanna, og bara svona í heildina tekið. Hvað kostaði að sækja skipið, og hvað kostuðu eftirlitsferðirnar, og ferðir ýmissa iðnaðarmanna bæði Íslenskra og erlendra í hverskonar verk úti?

[Jón Jónsson, 11.1.2012 kl. 06:24]

Skip eru smíðuð eins og þú segir á einum stað en ekki byggð: Hús eða byggingar eru byggð. Annars góð grein hjá þér Halldór.

[Hrólfur Þ Hraundal, 11.1.2012 kl. 07:29]

Ég er á því að það hafi verið þörf fyrir svona skip en að það hafi verið þörf á að smíða það í Suðurameríku það er ég ekki viss um.  

En þar sem búið er að eyðileggja skipasmíða iðnaðinn á Íslandi þá var ekki hægt að smíða það hér.  Að endurreisa skipasmíða iðnaðinn hér aftur borgar sig ekki því þá þarf að eyðileggja hann aftur.

Erlendar skipasmíða stöðvar eiga það líka til að gefa afsér ýmislegt sem ekki kemur skipasmíðum beint við.