Kópavogshneykslið

virðist enn eiga að draga á langinn.

Aðför Steingríms Sigfússonar að bæjarstjórnarmeirihlutanum sem þá hafði staðið farsælllega í 18 ár í Kópavogi framdi hann þegar hann í skjóli nætur rak alla stjórn Lífeyrisjóðs Starfsmanna Kópavogskaupstaðar og framkvæmdastjóra frá völdum og setti sinn mann yfir lífeyrissjóðinn.

Ástæðan var að þessir aðilar höfðu verndað lífeyri eigendanna með því að ávaxta laust fé í bæjarsjóði Kópavogs, sem er 100% ábyrgðarmaður lífeyrisisjóðsins. Fleiri sjóðir á vegum bæjarfélaga gerðu eins en þar voru þóknanlegir menn við völd. Þetta var á tíma nýhrundra banka og þjóðfélagið logaði stafna á milli í hatri og tortryggni.

Að því er virðist hefur rannsókn málsins verið skipulega dregin á langinn til þess að valda sem mestum skaða á viðkomandi persónum sem eru úr öðrum stjórnmálaflokkum en ráðherrans. En nú hefur rannsókn málsins staðið í 3 ár, ég endurtek 3 ár. 3 ár til að rannsaka einfalt mál sem liggur á borðinu.

Engu var stolið, ekkert fé tapaðist, ekkert lán var afskrifað, engar vinnuferðir voru farnar, engin spilling, engin vinafyrirgreiðsla, engir búsetustyrkir í Breiðholti þegnir. Lífeyrissjóður starfsmanna Kópavogs skilaði bestu ávöxtun lífeyrissjóða landsins árið sem þessi glæpur var framinn.

Nú er víst á daginn komið að allar ákærurnar hafa verið dregnar til baka þar sem bærinn og lífeyrissjóðurinn höfðu þá eftir allt heimildir til lánaviðskipta sín á milli án þessara reglna sem voru upphaf aðgerða Steingríms. Eftir stendur víst aðallega að lánsskjölin hefðu átt að stimplast eins og víxlar þrátt fyrir að lánsskjölin voru sömu gerðar og notuð hafa verið árum saman af öllum bönkum án stimpilgjalda.

Málið verður væntanlega tekið fyirr 20. apríl og ljóst er að lítið stendur eftir af upprunalegri ákæru. Hvað stendur þá eftir annað en sýnishorn af því hvernig kommúnistar koma fram gagnvart pólitískum andstæðingum. Fyrirmynd þeirra er sem fyrr Jósef Djúgasvíli sem notaði byssuna á Búkharín eftir sýndarréttarhöldin yfir honum við lófaklapp Nóbelsskáldsins okkar.

Hinsvegar er morgunljóst hver afleiðingin er orðin fyrir þolendurna sem nú skulu stíga fyrir dómara. Mannorð viðkomandi, og alveg sérstaklega Gunnars Birgissonar, hefur verið dregið niður í svaðið og hann flæmdur úr starfi bæjarstjóra. Sigrún Bragadóttir hefur verið sett í "Berufverbot" að hætti þýskra nasista þar sem hún hefur verið útilokuð frá vinnu vegna ákærunnar sem nú er búin að svífa yfir henni í 3 ár. Og farsæll pólitískur meirihluti féll við þessar aðfarir og við tók óstarfhæfur meirihluti undir forsæti Guðríðar Arnardóttur sem gat ekki hamið sig þegar hún taldi færi til þess að breiða úr sér svo um munaði. Sú bomba sprakk í fésið á henni og ekki grétu allir þann atburð eftir aðra framgöngu hennar og félaga í stuttri valdatíð.

Það var svo með ólíkindum þegar manni bárust þær fregnir, að lögmaður Kópavogsbæjar hafi hringt í Sigrúnu Bragadóttur og ráðlagt henni að skella sem mestri af meintri sök á "terrorstjórnaraðferðir" Gunnars Birgissonar. Hún hefði verið neydd til að framkvæma vilja hans. Þetta væri hennar besta málsvörn fyrir réttinum. Sigrúnu ofbauð svo þessi tillaga lögmannsins gagnvart starfsfélaga sínum að hún kom þessu í blöðin.

Maður spyr sig hvernig maður getur gert svona gagnvart samstarfsmanni sínum til 20 ára og velgjörðamanni? Þetta kemur mér virkilega í opna skjöldu. Ég spyr mig hvernig getur þessi vinur minn setið áfram í fullum sóma sem lögmaður Kópavogs eftir þessa uppákomu undir meirihluta sem veltur á þessum "terrorista" Gunnari Birgissyni? En meirihluti þessi veltur á hverjum einum manni í eins manns meirihluta. Taka aðrir bæjarfulltrúar ekki upp neina þykkju fyrir einn félaga sinn sem svo er leikinn opinberlega af starfsmanni bæjarins? Er þetta bara allt í lagi í þeirra augum? Ég er svo persónulega mjög leiður yfir þessu öllu þar sem ég hef aldrei reynt nema gott eitt af þessum lögmanni og talið hann til vina minna og tel enn. Ég skil þetta bara ekki.

En pólitík er pólitík. Það er auðvitað að allir kveinka sér við að taka á þessu máli hins þrautreynda lögmanns með svo langa starfsreynslu hjá bænum. Ég hef ekki heyrt um neina sáttafundi í málinu og veit ekki um slíkt. En það hlýtur að vera pínlegt ástand þarna á bæjarkontórnum ef menn talast ekki við og auðvitað óþolandi til lengdar.

Ég hef heyrt um aðferð sem var víst notuð eitt sinn í sjórnarráðinu við þær aðstæður að ráðuneytisstjóri vildi ákveððið losna við starfsmann sem ekki vildi fara sem opinber starfsmaður. Hún var sú að taka bæði tölvuna og símann af skrifstofu viðkomandi starfsmanns og láta hann engin verkefni hafa. Honum leiddist að lokum. En svona gerir maður víst ekki lengur.

Kópavogshneykslið heldur því áfram undir púkablístru Steingríms J. Sigfússonar. Þar sjá menn hvernig kommúnistar nota öll meðöl til að klekkja á pólitískum andstæðingum sínum eins og Landsdómsmálið gegn Geir Haarde er annað dæmi um.

Fékk ekki Búkharín uppreisn æru seint og síðarmeir? Verður ekki alveg sama hvaða niðurstöðu þetta mál fær, skaðinn er skeður? Það nægir eitt Steingrími áreiðanlega fyllilega til að flokka Kópavogshneyskslið sem vel heppnaða björgunaraðgerð í ráðherratíð sinni.

Athugasemdir

[Hreinn Sigurðsson, 14.4.2012 kl. 19:29]

Ég er sammála þér Halldór, þessi aðför þeirra sem kenna sig við vinstri mennsku er einkar ógeðfelld.

Ekki síður en skítlegt eðli þeirra þingmanna sem vildu einungis ákæra Geir H Haarde í landsdómsmálinu en sleppa sínum manni sem þó bar ábyrgð á öllu klabbinu eins og glögglega kemur fram hér: http://www.youtube.com/watch?v=Hf793vUAkFQ

[Helga Kristjánsdóttir, 14.4.2012 kl. 23:19]

Þetta er ógeðfellt í meira legi,hef hætt að fylgjast með þessu,en mótmælti oft hér meðan orrahríðin var sem mest. Einhversstaðar sá ég yfirlýsingu frá Dodda,um þetta leiðinda mál,seint mun ég trúa nokkru illu upp á hann.

[Halldór Jónsson, 15.4.2012 kl. 10:59]

Já Hreinn, það var manni mikil raun að sjá hvernig 4 þingmenn Samfylkingar hlupu saman í samsærið gegn Geir.

Og Helga,mér finnst agalegt að sjá hann Þórð okkar lenda svona í þessu máli. Auðvitað vitum við hvorugt hvað honum gekk til, manni finnst þetta svo ólíkt þeim Þórði sem við bæði þekkjum. En það hefur bara ekki birst nein sannfærandi skýring á þessu frá honum.Ég vildi ekki vera í þeirri stöðu sjálfur sem mér sýnist hann vera í. Maður hefði kannski getað sagt eithvað svona í fylleríi og séð eftir því. En Þórður er stakur reglumaður að því ég best veit og ekki hefur heyrst að hann sjái eftir þessu.

[Ellert Júlíusson, 17.4.2012 kl. 13:40]

Enginn mun vita hvað fólki gekk til í þessu máli. Hvernig stóð til dæmis á því að Sigrún hringir nokkrum dögum seinna til að fá "frekari útskýringu" á orðum Þórðar...og vill svo merkilega til að hún er með upptökutæki við hendina. Það væri gaman að vita undan hvaða rifjum sú framkvæmd er runnin!

Þetta lyktar allt saman og þegar upp er staðið þá held ég að margir séu með svarta samvisku í þessu máli, og þá ekki endilega því sem er tengt lífeyrissjóðsmálinu sjálfu.