Eitt jákvætt

hefur nýja byggingareglugerðin í för með sér. Það má túlka hana sem skyldu til að setja sprinklerkerfi í allar nýjar íbúðir. Þetta bendir Björgvin Víglundsson, sá ágæti verkfræðingur, á í Morgunblaðinu í dag. Hann kemst að þessari einföldu niðurstöðu með því að bera saman kröfur um algilda hönnun sem nái yfir rýmingartíma eins og hjá Norðmönnum.

Þetta er atriði sem væri til stórkostlegra framfara í húsagerð landsmanna.Hér á landi deyja því miður margir í brunum sem verða í heimahúsum. Fólk brennur inni í steinsteyptum og vönduðum íbúðum. Lítill eldur í sjónvarpi og húsgögnum getur auðveldlega orðið banvænn á örfáum mínútum.

Slíkt skeður ekki þar sem starfhæft úðakerfi eða sprinkler eins og við köllum það er fyrir hendi. Það er til saga af manni í Scottsdale Arizona, þar sem úðakerfi er skylda í öllum nýjum húsum, að glæpamenn ætluðu að drepa félaga sinn sem lá rænjulaus í rúmi sínu. Þeir gegnvættu hann og rúmið í bensíni og kveiktu í og hlupu. Þeir gáðu ekki að því að þarna var úðakerfi sem slökkti svo fljótt í að maðurinn lifði. Það eru til margar ótrúlegar kvikmyndir af virkni vatnsúðakerfa sem fólki er hollt að skoða.www.youtube.com.

Ég er ekki sammála vini mínum Björgvini um að þetta kalli á niðurhengd loft í öllum íbúðum. Það eru margar einfaldari lausnir til. Og fólk þarf ekki að vera með áhyggjur af óþarfa ræsingu með vatnstjóni, það er lítil hætta á því og er auk þess smámál í samanburði við það sem í húfi er,-mannslífin.

Þar sem er sprinkler þar deyr enginn í eldsvoða. Svo einfalt er það.

Þetta er þó eitt jákvætt við nýju reglugerðina sem menn eru annars ekki allt og hrifnir af.

Athugasemdir

[Stefán Þ Ingólfsson, 12.12.2012 kl. 12:13]

Ég er hræddur um að þetta myndi hækka byggingarkostnað úr hófi. Auk þess myndi skapast sú hætta að þeir, sem ekki geta haft fótaferð, drukkni hreinlega í rúmum sínum.

[Halldór Jónsson, 12.12.2012 kl. 21:37]

Sæll Stefán

ég held að svona einföld sprinklerlögn í blokkaríbúð þyrfti ekki að kosta nema mjög fáa hundraðþúsundkalla án flókins stýribúnaðar. Ekki fullkominn lögn heldur lífsbjörgun. Lögð í mjóu plasti utan á í kverk. Vatnsþokubúnaður væri æskilegri en líklega dýrari ennþá. En hvers virði er mannslíf eða þriðjugráðu bruni?

Í alvöru er vatnið svo lítið að ég held að fiskifluga ætti erfitt með að drukkna í því.Kallinn í Scottsdale drukknaði ekki þó rænulaus væri þegar kveikt var í.