Hefurðu komið í Heiðmörkina?

og horft á ævintýralandið sem gæti helst líkst Nangyjala í kvöldskuggunum. Mikið er víst að í kvöld uppgötvaði ég að það var orðið of langt síðan. 

Ég fór frá Maríuhellum að vestan við Vífilsstaði þaðan sem maður var tíður gestur í gamla daga í hestamennskunni. Nú keyrðu ég svo þvert í gegnum þetta mikla land,svona hrikalega stórt og margbreytilegt.  Í gegn um stórskóga eins og maður á að venjast í útlöndum, í gegn um ævintýralega dali og bergmyndanir, um bakka veiðivatna. Það var farið að rökkva sem jók á áhrifin til að gera þetta að vökudraumi.

Þvílíkir menn sem stóðu að því að Heiðmörkin var gerð að friðlandi 1947 og hversu mikið við eigum framsýni þeirra og hugsjónaeldi að þakka sem hófu baráttuna fyrir stofnun friðlandsins. Guðmundur Marteinsson, Hákon Bjarnason, Valtýr Stefánsson, Einar G.E. Sæmundsen svo einhverjir séu nefndir af frumherjunum. Og auðvitað allir stjórnmálamennirnir frá þessum tíma sem gerðu þetta að veruleika með velvild, framsýni og áhuga. Og svo öll félagasamtökin sem erjuðu landið og klæddu það skógi án þess að spyrja um laun. Og starfið heldur áfram með Skógræktarfélagi Reykjavíkur sem við eigum öll að styrkja.

Af þessu verki geta allir þátttakendur verið stoltir. Íslendingar eiga fjársjóð sem á engan sinn jafningja. Þessa 3000 hektara Heiðmörk vaxna að fjórðungi með skóglendi eigum við öll í dag sem ómetanlegan fjársjóð sem okkur ber að varðveita og bæta sem best fyrir komandi kynslóðir.

Athugasemdir

[Helga Kristjánsdóttir, 12.5.2015 kl. 02:05]

Vonandi eru merki viðkomandi félaga og átthagafélaga komin upp.Það er sérstaklega gaman að koma í Normannslaget (man ekki stafst.)og ég var að heyra að þeir leigðu svæðið út til skemmtana halds.Heyrðum oft harmonikku hljóma,þegar við heimsóttum reitinn okkar Dýrafjarðar (lundur),sem er rétt hjá hinu megin við götuslóðann. 

[Valdimar H Jóhannesson, 12.5.2015 kl. 11:53]

Alls staðar þar sem eldhugarnir gengu til verks á síðsutu öld með Hákon Bjarnason í broddi fylkingar eru ævintýrin að gerast og eldmóður þeirra lifir enn meðal þjóðarinnar. Þökk sé þeim öllum.

[Halldór Jónsson, 17.5.2015 kl. 16:21]

Já Helga, ævintýri hvað öll félögin gerðu þarna.

Valdimar, þakk þér fyrir þín maklegu orð um minn góða föðurbróður. Hann var Johnny Appleseed okkar þjóðar sem með trúboði sínu og fordæmi breytti afstöðu heillar þjóðar til skógræktar. Í mínu ungdæmi heyrði maður háðsglósurnar um Hákon og aðra skógræktarmennsem ætlaði að rækta eldspýtur fyrir þjóðina eins og dvergfururnar við Rauðavatn sönnuðu best. Ég man þegar hvert smáatriði var dýrmætt í baráttunni fyrir hugsjóninni að þeir skógræktarmenn bönnuðu öllum að pissa nema á tré þegar við vorum að vinna í mörkinni.

Mú er bara spurning um hversu mikið við getum sett niður. Það er allt Q.E.D, hér vx allt eins vel og annarsstaðar.