Er allt verst núna?

varðandi húsnæðismál unga fólksins?

Þegar ég var að byggja fyrst var lánshlutfallið tæp 30 %. 340.000 krónur í tveimur hlutum í milljón krónu 120 m2 íbúð með bílskúr. Það voru nú samt einhver verðtryggingarákvæði í þeim lánum að hluta sem ég er nú búinn að gleyma enda 50 ár komin síðan. Þá voru engin önnur lán að fá nema hjá ættingjum og eitthvað stundum hjá efnissölum. Menn urðu að vinna sjálfir í byggingum sínum og búa í þeim hurðarlausum á steininum árum saman.Og frændur og vinir unnu með manni um helgar og á kvöldin.

Síðar fóru þeir í bönkunum að lána 100 % þó það sé nú gengið til baka. Það reynist nú flestum ofviða að borga af því.

Úti í Florida kosta alveg sæmileg einbýlishús með bílskúr svona 25 milljónir. Hér kostar svipað hús 80-100 milljónir. Verðtrygging krónunnar og gengisföll eru ekki skýringin.Hversvegna þá er þetta svona? 

 

 

Ég var í 38 ár í rekstri og þurfti að glíma við þetta allt, óðaverðbólgu, mörg gengisföll. Þetta var bardagi oftlega uppá líf eða dauða fyrirtækisins.   Ég upplifði margt. T.d. horfði ég á virt  iðnaðarfyrirtæki á gömlum merg greiða tekjuskatt öll sín starfsár en fara svo skyndilega á hausinn. Bókhaldið og skattalögin skynjuðu ekki verðbólguna.

 

Verðbólgan er allstaðar. Ég sá á netinu af einbýlishús eftir Frank Loyd Wright kostaði árið sem ég fæddist, 1937 , 155.000 dollara. Jafngildi 2.1 milljónar dollara núna. Það eru semsagt aðeins eftir innan við 8 sent af gamla góða dollaranum. Þannig fór 3.6 % verðbólga með dollarann. Hvaða vextir væru þá hæfilegir á dollaralánum ? Svo tala margir um að við verðum að taka upp Evru til að komast af.

Hvað vexti vilt þú lesandi góður sem bölvar verðtryggingunni fá á þína íslenzku sparikrónur ef ég bið þig um lán?  Mér þætti ákaflega vænt um ef þú vildir að gera mér tilboð í svoleiðis lán, stórt eða smátt. allt eftir því hvað þú vilt lána mér mikið. Við skulum segja bæði til eins árs og svo til 40 ára af því að þá ætla ég að kaupa mér hús.

Það sem ég er að segja er að lóðaskortsstefna sveitarstjórna í Reykjavík og víðar  kyndir verðbólguna. Væru nægar lóðir á svona 4 milljónir fyrir einbýlishús, minna en milljón á blokkaríbúð á höfuðborgarsvæðinu, þá myndi fólk byggja meira sjálft. Myndu íbúðirnar duga  sem veð fyrir áhvílandi ? Myndu fasteignasalarnir halda áfram að keyra verðið upp fyrir 300 þúsund kallinn á fermetrann ? Hvað kosta íbúðir á Blönduósi  til samanburðar?

Verkalýðsforingjarnir og Gunnar Smári  segjast vilja bæta kjör þeirra lægst launuðu. Hinir koma svo auðvitað beint í framhaldi.  Nú eru kröfurnar 30-50 % svona til að byrja með. Og svo er nóg af liði með alltof lágt kaup. Ómannsæmandi laun auðvitað. En hver ber ábyrgð á því? 

Hvað erum við að þrasa við þessa verklýðsforingja?  Af hverju hækkum við ekki bara kaupið hjá öllum um 20 % með einu pennastriki eins og ríkisstjórn Ólafs Jóhannessonar og Lúðvíks Jósepssonar gerði 1971 ? Stytti vinnuvikuna um 10 % og hækkaði allt kaup um 10 %.  Man enginn eftir því?

Svo komu bara aðrir sem vildu fá meira fyrir sig af sanngirnissjónarmiðum og mikilvægi.

Af hverju er allt svona erfitt núna? Er það verra en þegar ég var ungur?

Þá sagðist enginn hafa áhyggjur af mínum húsnæðismálum. Sjálfstæðisflokkurinn sagði þá eign fyrir alla, stétt með stétt og báknið burt. Það var gert í því af Bjarna Ben,  Eðvarði og Gvendi Jaka með Framkvæmdanefnd Byggingaráætlunar, meira en helmingi minna en vantaði þá af húsnæði.

Nú er ekkert hægt nema veina og jarma yfir heimsins ranglæti. Ég man ekkert hvernig öryrkjum og eldra fólki leið þá þegar Björgvin var ungur. En var það endilega betra en núna? Fólk var margt fátækt í þá daga man ég. Það var margt erfitt.

Það var jafnvel erfitt að fá leigðan kjallara á þeim árum og leigan tók þriðjunginn af tekjunum fyrir skatt minnir mig. Enginn vorkenndi manni opinberlega.

Af hverju er allt verst núna?

Athugasemdir

[Eðvarð L. Árnason (IP-tala skráð) 3.11.2018 kl. 21:52]

Af hverju er allt verst núna?

Spyr vinur minn Halldór. Svar ætti að vera flestum nokkuð ljóst. Í fyrri tíð t.d. um og eftir miðja síðustu öld, voru einu  tekjur landsins af sjávarfangi. Þrátt fyrir litlar tekjur landsins gátu einstaklingar með dugnaði komið þaki yfir höfuð sér, og sínum.   Tekjur fólks  voru jafnari og þjóðarbáknið minna. 

En svo kom blessuð spillingin sem glöggur ritstjóri sagði að hefði hafist með framsali á aflaheimildum og braski með þjóðarauðlindina,sem áður dugði svo vel.  Þá fitnuðu  einstakir eins og púkinn á fjósbitanum, en aðrir urðu að þrengja sína mittisól. Í dag getur meðalmaðurinn ekki fengið byggingarlóð og byggt yfir sig og sína, það er af sem áður var.

Í fyrri tíð var hægt margt þrátt fyrir lítinn auð þjóðarinnar,  eins og byggja spítala og skólabyggingar, og byggja upp þjóðvegir.  Nú verandi ráðstjórn getur ekki einusinni holufyllt vanhirta vegi, sem þjóðin byggði upp áður fyrr.

Nú er vælt af getulitlum ráðherra, að setja á vegtolla á þjóðvegi, sem þjóðin er þegar löngu búinn að greiða upp.

Af hverju er allt verst núna?? Svar hlýtur að vara einfalt, Ofurbólgið siðspillt og  getulaust stjórnkerfi. 

[Símon Pétur frá Hákoti (IP-tala skráð) 3.11.2018 kl. 22:13]

Bið þig Halldór, að lesa einu sinni, tvisvar sinnum, þrisvar sinnum og jafnvel enn oftar athigasemd Eðvarðs hér að framan.  Hún segir allt sem segja þarf.  Skilningurinn er ljós viskunnar.  Skilurðu nú Halldór minn?  Nei?  Lestu þá enn og aftur athugasemd Eðvarðs.  

[Borgari (IP-tala skráð) 4.11.2018 kl. 07:47]

"Ofurbólgið siðspillt og  getulaust stjórnkerfi" - vonandi ekki lýsing á glærusýningu Dags um daginn um hvernig hann vill byggja upp gífurlega flókið úthlutarkerfi á "ódýrum íbúðum" fyrir útvalda á völdum stöðum í borginni.

[Hallgrímur Hrafn Gíslason, 4.11.2018 kl. 09:02]

Verðtryggð íbúðarlán að hluta, komu fyrst um 1978.  Þitt fyrsta lán hefur horfið mjög fljótt á sjöunda og áttunda áratugnum með neikvæða vexti í þeirri óðaverðbólgu sem var þá Mér sýndist að borgin væri að fá um 7 millur fyrir einbýlishúsalóð í síðasta útboði til braskarana. sem selja þetta aftur á um og yfir tuttugu millur. Nú geturðu fengið efnispakka í 200fm. einbýlishús á innan við 20 millur,þá er grunnurinn eftir + lóðargjóld sem er helmingurinn af íbúðarpakkanum.

Það er líka klikkun kostnaður við húsgrunn, fyrst að moka efni uppúr honum og keyra því fleiri tugi km til urðunar og svo malarefni í grunninn aftur enn lengri vegalengd í stað þess að vera með húsið á súlum

[Halldór Jónsson, 4.11.2018 kl. 19:29]

Ósammála ykkur báðum, Edda löggu og Símoni Pétri frá Hákoti. Þið eruð búnir að keyra ykkar vegi sem þið borguðuð. Nú á að leggja nýja vegi sem þið eigið að borga fyrir með afnotagjöldum.

[Halldór Jónsson, 4.11.2018 kl. 19:30]

Það var verðtrygging að hluta á mínu láni frá 1968 held ég