Hvað hugsa Selfyssingar?

í sambandi við framtíð bæjarins?

Bærinn sá byggðist alfarið vegna brúarinnar yfir Ölfusá. Hún gerði alla uppbyggingu mögulega sem er ekki lítil. Mjólkurbú Flóamanna, Kaupfélag Árnesinga,Byko, Húsamiðjan,  SET hf. og aragrúi iðn-og verslunarfyrirtækja og ferðaþjónustufyrirtækja eins og rútufyrirtæki Guðmundar Tyrfingssonar og fleiri.

Nú er hann Leó Árnason að byggja nýjan miðbæ í fornum stíl. Vill hann ekki að fólk komi þangað að versla?

Hver er þá hugmyndin á bak við það að leggja nýjan veg fram hjá Selfossi yfir einhverja rándýra sprellibrú langt fyrir ofan Selfoss? Hvað gerir hún fyrir Selfoss?

Af hverju er ekki byggð langtum ódýrari brú ,ein eða fleiri við hlið þeirrar gömlu og vegir sem leiða umferðina inn í bæinn? Eru Hellu-, Víkur -og Hvolsvallarmenn á bak við þessar hugmyndir?

Spyr sá sem ekki veit hvað Selfyssingar hugsa sér til framtíðar?

Athugasemdir

[Þorsteinn Siglaugsson, 12.6.2019 kl. 20:55]

Kannski hugsa þeir bara ekki neitt.

[Haukur Árnason, 12.6.2019 kl. 23:52]

Hárrétt hjá þér Halldór. Þeir á Selfossi vildu að nýja brúin kæmi neðan við/nær sjónum. Rétt við flugvöllin og færa veginn fjær Ingólffjallinu, en Vegagerðinni varð ekki haggað.
Held að stuðningur hafi verið við það líka hjá þeim á Eyrarbakka og Stokkseyri.þ.e. nær sjónum.

Spurning hvaða gagn er í þingmönnum kjördæmisins.

[Ómar Ragnarsson, 13.6.2019 kl. 00:58]

Einu sinni lá Suðurlandsvegur yfir brú á Ytri-Rangá, sem var nokkru ofar en núverandi brú er. Brúin hafði orðið til þess að við hana myndaðist þorpið upphaflega. 

Þegar hugmynd vaknaði um nýja brú nokkru fyrir neðan þorpið, varð allt vitlaust vegna mikillar andstöðu við það að byggja svona "sprellibrú" langt frá þjónustunni og kaupfélaginu á Hellu. 

Ný brú myndi leiða umferðina frá þorpinu, og að það yrði að sjá til þess að "leiða umferðina inn í bæinn."

Ingólfur Jónsson kaupfélagsstjóri og þingmaður og ráðherra Sjálfstæðisflokksins lagði stöðu sína að veði með því að berjast fyrir nýrri brú í stað þess að leiða alla umferð yfir ána í gegnum hið þrönga þorp. 

Þorpsbúar fengu svolitinn styrk til þess að auðvelda þeim að aðlagast nýjum aðstæðum. 

Nýja brúin reis og nú myndu flestir hlæja ef þeir vissu, að á sínum tíma hefði það verið talið jafngilda dauðadómi yfir Hellu að "leiða umferðina frá bænum" með því að breyta brúarstæðinu. 

[Halldór Jónsson, 13.6.2019 kl. 02:02]

Halldor E. beitti sér fyrir Borgarfjarðarbrú beint inn í þorpið

[Ómar Ragnarsson, 13.6.2019 kl. 13:34]

Já, það var smá lykt af þessu hjá þeim Halldóri og Ingólfi. Þess ber að gæta, að Hvítárbrú, þótt glæsilega væri ný 1929, var gersamlega ófullnægjandi, og ný brú og ekki síður rándýr vegur yfir síkin Mýrarsýslumegin var ekki álitlegur kostur. 

Þar þurfti að aka feiknum af möl ofan í botnlaust vegarstæðið. 

Borgarfjarðarbrúin stytti líka leiðina vestur á Snæfellsnes um meira en hátt í 30 kílómetra og leiðina norður um nokkra kílómetra. 

[Halldór Jónsson, 13.6.2019 kl. 18:18]

En Hvítárbrúin finnst mér vera stórkostlega fagurt mannvirki hvað sem öðru líður. Faðir minn vann við að smíða hana og hann stakk sér af uppslættinum niður á botn og greip  með sér hamra og sagir sem smiðirnir höfðu misst.Lék þetta þangað til að hann ofkældist og skalf í sólarhring.

Árni Pálsson teiknaði brúna og mér finnst hún vera  verkfræðilegt afrek á þeim tíma fyrir tölvur.

[GÍSLI HOLGERSSON - ICELAND (IP-tala skráð) 13.6.2019 kl. 20:06]

Glæsibrúin vestan við TRYGGVA GUNNARSSONAR SKÁLANN stendur á besta stað á SELFOSSI. ÖLL stórviðskipti og Kirkjan eru á leið þeirra,sem renna gegnum Selfoss á leið til austurs.

MJÓLKURBÚ FLÓAMANNA er stolt Bænda og Íslendinga frá 1928. SELFOSS bær er glæsilega hannaður með breiðum götum, sem tekur við öllum framförum og breytingum.

SELFOSS brúin á að VERA á Sínum stað með breytingum fyrir stærri og smærri bíla, vel aðskilið á sér brautum.

AKRANES missti allt samband við "Reykjavik" eftir að  Akra borgin hætti siglingum. BORGARNES og BLÖNDUÓS halda vonandi enn sínum óbreyttu leiðum. Breyting á vegum er mjög NEIKVÆÐ. Skýringar þínar eru hárréttar varðandi staðsetningu.8.sept 1894.  Selfossbrúin er ósnertanleg.

Eru Selfossbúar að koma með nýjan flugvöll?. Máské hefst stórútflutningur með cargo flugvég frá stækkandi búum bænda, Gróðurhúsum og Sjávarútvegi til næstu stórborga erlendis?.